২৬. থোমকৱগ্গো

১-১০. থোমকত্থেৰঅপদানাদিৱণ্ণনা

ছব্বীসতিমে ৱগ্গে পঠমাপদানং উত্তানমেৱ.

৫-৬. দুতিযাপদানে ৱিজহিত্ৱা দেৱৱণ্ণন্তি দেৱতা সৰীৰং ৱিজহিত্ৱা ছড্ডেত্ৱা, মনুস্সসৰীৰং নিম্মিনিত্ৱাতি অত্থো. অধিকাৰং কত্তুকামোতি অধিককিৰিযং পুঞ্ঞসম্ভাৰং কত্তুকামো দেৱৰো নাম অহং দেৱৰাজা ভৰিযায সহ বুদ্ধসেট্ঠস্স সাসনে সাদৰতায ইধ ইমস্মিং মনুস্সলোকে আগমিং আগতোতি অত্থো. তস্স ভিক্খা মযা দিন্নাতি পদুমুত্তৰস্স ভগৱতো যো নামেন দেৱলো নাম সাৱকো অহোসি, তস্স সাৱকস্স মযা ৱিপ্পসন্নেন চেতসা ভিক্খা দিন্না পিণ্ডপাতো দিন্নোতি অত্থো.

৯-১০. ততিযাপদানে আনন্দো নাম সম্বুদ্ধোতি আনন্দং তুট্ঠিং জননতো আনন্দো নাম পচ্চেকবুদ্ধোতি অত্থো. অমনুস্সম্হি কাননেতি অমনুস্সপৰিগ্গহে কাননে মহাঅৰঞ্ঞে পৰিনিব্বাযি অনুপাদিসেসনিব্বানধাতুযা অন্তৰধাযি, অদস্সনং অগমাসীতি অত্থো. সৰীৰং তত্থ ঝাপেসিন্তি অহং দেৱলোকা ইধাগন্ত্ৱা তস্স ভগৱতো সৰীৰং তত্থ অৰঞ্ঞে ঝাপেসিং দহনং অকাসিন্তি অত্থো.

চতুত্থপঞ্চমাপদানানি উত্তানানেৱ.

২০. ছট্ঠাপদানে অহোসিং চন্দনো নামাতি নামেন পণ্ণত্তিৱসেন চন্দনো নাম. সম্বুদ্ধস্সত্ৰজোতি পচ্চেকসম্বুদ্ধভূততো পুব্বে তস্স অত্ৰজো পুত্তো অহং. একোপাহনো মযা দিন্নোতি একং উপাহনযুগং মযা দিন্নং. বোধিং সম্পজ্জ মে তুৱন্তি তেন উপাহনযুগেন মে ময্হং সাৱকবোধিং তুৱং সম্পজ্জ নিপ্ফাদেহীতি অত্থো.

২৩-২৪. সত্তমাপদানে মঞ্জৰিকং কৰিত্ৱানাতি মঞ্জেট্ঠিপুপ্ফং হৰিতচঙ্কোটকং গহেত্ৱা ৰথিযং ৱীথিযা পটিপজ্জিং অহং তথা পটিপন্নোৱ ভিক্খুসঙ্ঘপুৰক্খতং ভিক্খুসঙ্ঘেন পৰিৱুতং সমণানগ্গং সমণানং ভিক্খূনং অগ্গং সেট্ঠং সম্মাসম্বুদ্ধং অদ্দসন্তি সম্বন্ধো. বুদ্ধস্স অভিৰোপযিন্তি দিস্ৱা চ পন তং পুপ্ফং উভোহি হত্থেহি পগ্গয্হ উক্খিপিত্ৱা বুদ্ধস্স ফুস্সস্স ভগৱতো অভিৰোপযিং পূজেসিন্তি অত্থো.

২৮-২৯. অট্ঠমাপদানে অলোণপণ্ণভক্খোম্হীতি খীৰপণ্ণাদীনি উঞ্ছাচৰিযায আহৰিত্ৱা লোণৱিৰহিতানি পণ্ণানি পচিত্ৱা ভক্খামি, অলোণপণ্ণভক্খো অম্হি ভৱামীতি অত্থো. নিযমেসু চ সংৱুতোতি নিযমসঞ্ঞিতেসু পাণাতিপাতাৱেৰমণিআদীসু নিচ্চপঞ্চসীলেসু সংৱুতো পিহিতোতি অত্থো. পাতৰাসে অনুপ্পত্তেতি পুৰেভত্তকালে অনুপ্পত্তে. সিদ্ধত্থো উপগচ্ছি মন্তি মম সমীপং সিদ্ধত্থো ভগৱা উপগঞ্ছি সম্পাপুণি. তাহং বুদ্ধস্স পাদাসিন্তি অহং তং অলোণপণ্ণং তস্স বুদ্ধস্স অদাসিন্তি অত্থো.

নৱমাপদানং উত্তানমেৱ.

৩৭-৩৮. দসমাপদানে সিখিনং সিখিনং যথাতি সৰীৰতো নিক্খন্তছব্বণ্ণৰংসীহি ওভাসযন্তং জলন্তং সিখীনং সিখীভগৱন্তং সিখীনং যথা জলমানঅগ্গিক্খন্ধং ৱিয. অগ্গজং পুপ্ফমাদাযাতি অগ্গজনামকং পুপ্ফং গহেত্ৱা বুদ্ধস্স সিখিস্স ভগৱতো অভিৰোপযিং পূজেসিন্তি অত্থো.

ছব্বীসতিমৱগ্গৱণ্ণনা সমত্তা.