১-১০.উদকাসনদাযকত্থেৰঅপদানাদিৱণ্ণনা

চতুৱীসতিমে ৱগ্গে পঠমদুতিযাপদানানি উত্তানানেৱ.

৯. ততিযাপদানে অৰুণৱতিযা নগৰেতি আ সমন্ততো আলোকং কৰোন্তো উণতি উগ্গচ্ছতীতি অৰুণো, সো তস্মিং ৱিজ্জতীতি অৰুণৱতী, তস্মিং নগৰে আলোকং কৰোন্তো সূৰিযো উগ্গচ্ছতীতি অত্থো. সেসনগৰেসুপি সূৰিযুগ্গমনে ৱিজ্জমানেপি ৱিসেসৱচনং সব্বচতুপ্পদানং মহিযং সযনেপি সতি মহিযং সযতীতি মহিংসোতি ৱচনং ৱিয ৰূড়্হিৱসেন ৱুত্তন্তি ৱেদিতব্বং. অথ ৱা পাকাৰপাসাদহম্মিযাদীসু সুৱণ্ণৰজতমণিমুত্তাদিসত্তৰতনপভাহি অৰুণুগ্গমনং ৱিয পভাৱতী অৰুণৱতী নাম, তস্মিং অৰুণৱতিযা নগৰে, পূপিকো পূপৱিক্কযেন জীৱিকং কপ্পেন্তো অহোসিন্তি অত্থো.

১৪. চতুত্থাপদানে তিৱৰাযং পুৰে ৰম্মেতি তীহি পাকাৰেহি পৰিৱাৰিতা পৰিক্খিত্তাতি তিৱৰা, খজ্জভোজ্জাদিউপভোগৱত্থাভৰণাদিনচ্চগীতাদীহি ৰমণীযন্তি ৰম্মং, তস্মিং তিৱৰাযং পুৰে নগৰে ৰম্মে নড়কাৰো অহং অহোসিন্তি সম্বন্ধো.

পঞ্চমাপদানং উত্তানত্থমেৱ.

২৩. ছট্ঠাপদানে ৱণ্ণকাৰো অহং তদাতি নীলপীতৰত্তাদিৱণ্ণৱসেন ৱত্থানি কৰোতি ৰঞ্জেতীতি ৱণ্ণকাৰো. ৱত্থৰজকো হুত্ৱা চেতিযে ৱত্থেহি অচ্ছাদনসমযে নানাৱণ্ণেহি দুস্সানি ৰঞ্জেসিন্তি অত্থো.

২৭. সত্তমাপদানে পিযালং পুপ্ফিতং দিস্ৱাতি সুপুপ্ফিতং পিযালৰুক্খং দিস্ৱা. গতমগ্গে খিপিং অহন্তি অহং মিগলুদ্দো নেসাদো হুত্ৱা পিযালপুপ্ফং ওচিনিত্ৱা বুদ্ধস্স গতমগ্গে খিপিং পূজেসিন্তি অত্থো.

৩০. অট্ঠমাপদানে সকে সিপ্পে অপত্থদ্ধোতি অত্তনো তক্কব্যাকৰণাদিসিপ্পস্মিং অপত্থদ্ধো পতিট্ঠিতো ছেকো অহং কাননং অগমং গতো সম্বুদ্ধং যন্তং দিস্ৱানাতি ৱনন্তৰে গচ্ছন্তং ৱিপস্সিং সম্বুদ্ধং পস্সিত্ৱা. অম্বযাগং অদাসহন্তি অহং অম্বদানং অদাসিন্তি অত্থো.

৩৩. নৱমাপদানে জগতী কাৰিতা ময্হন্তি অত্থদস্সিস্স ভগৱতো সৰীৰধাতুনিধাপিতচেতিযে জগতি ছিন্নভিন্নআলিন্দপুপ্ফাধানসঙ্খাতা জগতি মযা কাৰিতা কাৰাপিতাতি অত্থো.

দসমাপদানং উত্তানত্থমেৱাতি.

চতুৱীসতিমৱগ্গৱণ্ণনা সমত্তা.