৯. সোপাকত্থেৰঅপদানৱণ্ণনা

পব্ভাৰং সোধযন্তস্সাতিআদিকং আযস্মতো সোপাকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে অঞ্ঞতৰস্স কুটুম্বিকস্স পুত্তো হুত্ৱা নিব্বত্তি. একদিৱসং সত্থাৰং দিস্ৱা বীজপূৰফলানি সত্থু উপনেসি, পৰিভুঞ্জি ভগৱা তস্সানুকম্পং উপাদায. সো ভিক্খু সত্থৰি সঙ্ঘে চ অভিপ্পসন্নো সলাকভত্তং পট্ঠপেত্ৱা সঙ্ঘুদ্দেসৱসেন তিণ্ণং ভিক্খূনং যাৱতাযুকং খীৰভত্তং অদাসি. সো তেহি পুঞ্ঞেহি অপৰাপৰং দেৱমনুস্সেসু সম্পত্তিযো অনুভৱন্তো একদা মনুস্সযোনিযং নিব্বত্তো একস্স পচ্চেকবুদ্ধস্স খীৰভত্তং অদাসি.

এৱং তত্থ তত্থ পুঞ্ঞানি কত্ৱা সুগতীসুযেৱ পৰিব্ভমন্তো ইমস্মিং বুদ্ধুপ্পাদে পুৰিমকম্মনিস্সন্দেন সাৱত্থিযং অঞ্ঞতৰায দুগ্গতিত্থিযা কুচ্ছিম্হি পটিসন্ধিং গণ্হি. সা তং দসমাসে কুচ্ছিনা পৰিহৰিত্ৱা পৰিপক্কে গব্ভে ৱিজাযনকালে ৱিজাযিতুং অসক্কোন্তী মুচ্ছং আপজ্জিত্ৱা বহুৱেলং মতা ৱিয নিপজ্জি. ঞাতকা ‘‘মতা’’তি সঞ্ঞায সুসানং নেত্ৱা চিতকং আৰোপেত্ৱা দেৱতানুভাৱেন ৱাতৱুট্ঠিযা উট্ঠিতায অগ্গিং অদত্ৱা পক্কমিংসু. দাৰকো পচ্ছিমভৱিকত্তা দেৱতানুভাৱেনেৱ অৰোগো হুত্ৱা মাতুকুচ্ছিতো নিক্খমি. মাতা পন কালমকাসি. দেৱতা মনুস্সৰূপেনুপগম্ম তং গহেত্ৱা সুসানগোপকস্স গেহে ঠপেত্ৱা কতিপাহং কালং পতিৰূপেন আহাৰেন পোসেসি. ততো পৰং সুসানগোপকো অত্তনো পুত্তং কত্ৱা ৱড্ঢেসি. সো তথা ৱড্ঢেন্তো তস্স পুত্তেন সুপ্পিযেন নাম দাৰকেন সদ্ধিং কীড়ন্তো ৱিচৰি. তস্স সুসানে জাতসংৱড্ঢভাৱতো সোপাকোতি সমঞ্ঞা অহোসি.

অথেকদিৱসং সত্তৱস্সিকং তং ভগৱা পচ্চূসৱেলাযং ঞাণজালং পত্থৰিত্ৱা ৱেনেয্যবন্ধৱে ওলোকেন্তো ঞাণজালস্স অন্তোগতং দিস্ৱা সুসানট্ঠানং অগমাসি. দাৰকো পুব্বহেতুনা চোদিযমানো পসন্নমানসো সত্থাৰং উপসঙ্কমিত্ৱা ৱন্দিত্ৱা অট্ঠাসি. সত্থা তস্স ধম্মং কথেসি. সো ধম্মং সুত্ৱা পব্বজ্জং যাচিত্ৱা পিতৰা ‘‘অনুঞ্ঞাতোসী’’তি ৱুত্তো পিতৰং সত্থু সন্তিকং আনেসি. তস্স পিতা সত্থাৰং ৱন্দিত্ৱা ‘‘ইমং দাৰকং পব্বাজেথ, ভন্তে’’তি অনুজানি, তং পব্বাজেত্ৱা ভগৱা মেত্তাভাৱনায নিযোজেসি. সো মেত্তাকম্মট্ঠানং গহেত্ৱা সুসানে ৱিহৰন্তো নচিৰস্সেৱ মেত্তাঝানং পাদকং কত্ৱা ৱিপস্সনং ৱড্ঢেত্ৱা অৰহত্তং সচ্ছাকাসি. অৰহা হুত্ৱাপি অঞ্ঞেসং সোসানিকভিক্খূনং মেত্তাভাৱনাৱিধিং দস্সেন্তো ‘‘যথাপি একপুত্তস্মি’’ন্তি (থেৰগা. ৩৩) গাথং অভাসি. ইদং ৱুত্তং হোতি – যথা একপুত্তকে পিযে মনাপে মাতা পিতা চ কুসলী একন্তহিতেসী ভৱেয্য, এৱং পুৰত্থিমাদিভেদাসু সব্বাসু দিসাসু কামভৱাদিভেদেসু ৱা সব্বেসু ভৱেসু দহৰাদিভেদাসু সব্বাসু অৱত্থাসুপি ঠিতেসু সব্বেসু সত্তেসু একন্তহিতেসিতায কুসলী ভৱেয্য ‘‘মিত্তো, উদাসিনো, পচ্চত্থিকো’’তি সীমং অকত্ৱা সীমায সম্ভেদৱসেন সব্বত্থ একৰসং মেত্তং ভাৱেয্যাতি ইমং পন গাথং ৱত্ৱা ‘‘সচে তুম্হে আযস্মন্তো এৱং মেত্তং ভাৱেয্যাথ, যে তে ভগৱতা ‘সুখং সুপতী’তিআদিনা (অ. নি. ১১.১৫; পৰি. ৩৩১; মি. প. ৪.৪.৬) একাদস মেত্তানিসংসা চ ৱুত্তা, একংসেন তেসং ভাগিনো ভৱথা’’তি ওৱাদং অদাসি.

১১২. এৱং সো পত্তফলাধিগমো অত্তনো কতপুঞ্ঞং পচ্চৱেক্খিত্ৱা সঞ্জাতসোমনস্সো পুব্বচৰিতাপদানং দস্সেন্তো পব্ভাৰং সোধযন্তস্সাতিআদিমাহ. তত্থ পব্ভাৰন্তি সিলাপব্বতস্স ৱিৱেকট্ঠানং, তং পব্বজিতানুৰূপত্তা ইট্ঠকপাকাৰং কত্ৱা দ্ৱাৰকৱাটং যোজেত্ৱা ভিক্খূনং ৱসনত্থায অদাসি, পকাৰেন ভৰো পত্থেতব্বোতি পব্ভাৰো, তং সোধযন্তস্স মম সন্তিকং সিদ্ধত্থো নাম ভগৱা আগচ্ছি পাপুণি.

১১৩. বুদ্ধং উপগতং দিস্ৱাতি এৱং মম সন্তিকং আগতং দিস্ৱা তাদিনো ইট্ঠানিট্ঠেসু অকম্পিযসভাৱত্তা তাদিগুণযুত্তস্স লোকজেট্ঠস্স বুদ্ধস্স সন্থৰং তিণপণ্ণাদিসন্থৰং কট্ঠত্থৰং পঞ্ঞাপেত্ৱা নিট্ঠাপেত্ৱা পুপ্ফাসনং পুপ্ফমযং আসনং অহং অদাসিং.

১১৪. পুপ্ফাসনে নিসীদিত্ৱাতি তস্মিং পঞ্ঞত্তে পুপ্ফাসনে নিসীদিত্ৱা লোকনাযকো সিদ্ধত্থো ভগৱা. মমঞ্চ গতিমঞ্ঞাযাতি ময্হং গতিং আযতিং উপ্পত্তিট্ঠানং অঞ্ঞায জানিত্ৱা অনিচ্চতং অনিচ্চভাৱং উদাহৰি কথেসি.

১১৫. অনিচ্চা ৱত সঙ্খাৰাতি ৱত একন্তেন সঙ্খাৰা পচ্চযেহি সমেচ্চ সমাগন্ত্ৱা কৰীযমানা সব্বে সপ্পচ্চযধম্মা হুত্ৱা অভাৱট্ঠেন অনিচ্চা. উপ্পাদৱযধম্মিনোতি উপ্পজ্জিত্ৱা ৱিনস্সনসভাৱা উপ্পজ্জিত্ৱা পাতুভৱিত্ৱা এতে সঙ্খাৰা নিৰুজ্ঝন্তি ৱিনস্সন্তীতি অত্থো. তেসং ৱূপসমো সুখোতি তেসং সঙ্খাৰানং ৱিসেসেন উপসমো সুখো, তেসং ৱূপসমকৰং নিব্বানমেৱ একন্তসুখন্তি অত্থো.

১১৬. ইদং ৱত্ৱান সব্বঞ্ঞূতি সব্বধম্মজাননকো ভগৱা লোকানং জেট্ঠো ৱুড্ঢো নৰানং আসভো পধানো ৱীৰো ইদং অনিচ্চপটিসংযুত্তং ধম্মদেসনং ৱত্ৱান কথেত্ৱা অম্বৰে আকাসে হংসৰাজা ইৱ নভং আকাসং অব্ভুগ্গমীতি সম্বন্ধো.

১১৭. সকং দিট্ঠিং অত্তনো লদ্ধিং খন্তিং ৰুচিং অজ্ঝাসযং জহিত্ৱান পহায. ভাৱযানিচ্চসঞ্ঞহন্তি অনিচ্চে অনিচ্চন্তি পৱত্তসঞ্ঞং অহং ভাৱযিং ৱড্ঢেসিং মনসি অকাসিং. তত্থ কালং কতো অহন্তি তত্থ তিস্সং জাতিযং ততো জাতিতো অহং কালং কতো মতো.

১১৮. দ্ৱে সম্পত্তী অনুভোত্ৱাতি মনুস্সসম্পত্তিদিব্বসম্পত্তিসঙ্খাতা দ্ৱে সম্পত্তিযো অনুভৱিত্ৱা. সুক্কমূলেন চোদিতোতি পুৰাণকুসলমূলেন, মূলভূতেন কুসলেন ৱা চোদিতো সঞ্চোদিতো. পচ্ছিমে ভৱে সম্পত্তেতি পৰিযোসানে ভৱে সম্পত্তে পাপুণিতে. সপাকযোনুপাগমিন্তি সকং পচিতভত্তং সপাকং যোনিং উপাগমিং. যস্স কুলস্স অত্তনো পচিতভত্তং অঞ্ঞেহি অভুঞ্জনীযং, তস্মিং চণ্ডালকুলে নিব্বত্তোস্মীতি অত্থো. অথ ৱা সা ৱুচ্চতি সুনখো, সুনখোচ্ছিট্ঠভত্তভুঞ্জনকচণ্ডালকুলে জাতোতি অত্থো. সেসং উত্তানত্থমেৱাতি.

সোপাকত্থেৰঅপদানৱণ্ণনা সমত্তা.