১০. সুমঙ্গলত্থেৰঅপদানৱণ্ণনা

আহুতিং যিট্ঠুকামোতিআদিকং আযস্মতো সুমঙ্গলত্থেৰস্স অপদানং. অযম্পাযস্মা পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পিযদস্সিস্স ভগৱতো কালে ৰুক্খদেৱতা হুত্ৱা নিব্বত্তি. সো একদিৱসং সত্থাৰং ন্হত্ৱা একচীৱৰং ঠিতং দিস্ৱা সোমনস্সপ্পত্তো অপ্ফোটেসি. সো তেন পুঞ্ঞেন দেৱমনুস্সেসু সংসৰন্তো ইমস্মিং বুদ্ধুপ্পাদে সাৱত্থিযা অৱিদূৰে অঞ্ঞতৰস্মিং গামকে তাদিসেন কম্মনিস্সন্দেন দলিদ্দকুলে নিব্বত্তি, তস্স সুমঙ্গলোতি নামং অহোসি. সো ৱযপ্পত্তো খুজ্জকাসিতনঙ্গলকুদ্দালপৰিক্খাৰো হুত্ৱা কসিযা জীৱিকং কপ্পেসি. সো একদিৱসং ৰঞ্ঞা পসেনদিনা কোসলেন ভগৱতো ভিক্খুসঙ্ঘস্স চ মহাদানে পৱত্তিযমানে দানূপকৰণানি গহেত্ৱা আগচ্ছন্তেহি মনুস্সেহি সদ্ধিং দধিঘটং গহেত্ৱা আগতো ভিক্খূনং সক্কাৰসম্মানং দিস্ৱা ‘‘ইমে সমণা সক্যপুত্তিযা সুখুমৱত্থনিৱত্থা সুভোজনানি ভুঞ্জিত্ৱা নিৱাতেসু সেনাসনেসু ৱিহৰন্তি, যংনূনাহম্পি পব্বজেয্য’’ন্তি চিন্তেত্ৱা অঞ্ঞতৰং মহাথেৰং উপসঙ্কমিত্ৱা অত্তনো পব্বজাধিপ্পাযং নিৱেদেসি. সো তং কৰুণাযন্তো পব্বাজেত্ৱা কম্মট্ঠানং আচিক্খি. সো অৰঞ্ঞে ৱিহৰন্তো এককৱিহাৰে নিব্বিন্নো উক্কণ্ঠিতো হুত্ৱা ৱিব্ভমিতুকামো ঞাতিগামং গচ্ছন্তো অন্তৰামগ্গে কচ্ছং বন্ধিত্ৱা খেত্তং কসন্তে কিলিট্ঠৱত্থনিৱত্থে সমন্ততো ৰজোকিণ্ণসৰীৰে ৱাতাতপেন সুস্সন্তে খেত্তং কস্সকে মনুস্সে দিস্ৱা ‘‘মহন্তং ৱতিমে সত্তা জীৱিকনিমিত্তং দুক্খং পচ্চনুভৱন্তী’’তি সংৱেগং পটিলভি. ঞাণস্স পৰিপাকগতত্তা চস্স যথাগহিতং কম্মট্ঠানং উপট্ঠাসি. সো অঞ্ঞতৰং ৰুক্খমূলং উপগন্ত্ৱা ৱিৱেকং লভিত্ৱা যোনিসোমনসিকৰোন্তো ৱিপস্সনং ৱড্ঢেত্ৱা মগ্গপটিপাটিযা অৰহত্তং পাপুণি.

১২৪. এৱং সো পত্তঅৰহত্তফলো অত্তনো পুব্বকম্মং সৰিত্ৱা সোমনস্সৱসেন পুব্বচৰিতাপদানং পকাসেন্তো আহুতিং যিট্ঠুকামোহন্তিআদিমাহ. তত্থ আহুতিন্তি অন্নপানাদিঅনেকৱিধং পূজাসক্কাৰূপকৰণং. যিট্ঠুকামোতি যজিতুকামো, দানং দাতুকামো অহং. পটিযাদেত্ৱান ভোজনন্তি আহাৰং পটিযাদেত্ৱা নিপ্ফাদেত্ৱা. ব্ৰাহ্মণে পটিমানেন্তোতি পটিগ্গাহকে সুদ্ধপব্বজিতে পৰিযেসন্তো. ৱিসালে মাড়কে ঠিতোতি পৰিসুদ্ধপণ্ডৰপুলিনতলাভিৰামে ৱিপুলে মাড়কে ঠিতো.

১২৫-৭. অথদ্দসাসিং সম্বুদ্ধন্তিআদীসু মহাযসং মহাপৰিৱাৰং সব্বলোকং সকলসত্তলোকং ৱিনেতানং ৱিসেসেন নেতাৰং নিব্বানসম্পাপকং সযম্ভুং সযমেৱ ভূতং অনাচৰিযকং অগ্গপুগ্গলং সেট্ঠপুগ্গলং ভগৱন্তং ভগ্যৱন্তাদিগুণযুত্তং জুতিমন্তং নীলপীতাদিপভাসম্পন্নং সাৱকেহি পুৰক্খতং পৰিৱাৰিতং আদিচ্চমিৱ সূৰিযমিৱ ৰোচন্তং সোভমানং ৰথিযং ৱীথিযং পটিপন্নকং গচ্ছন্তং পিযদস্সিং নাম সম্বুদ্ধং অদ্দসিন্তি সম্বন্ধো. অঞ্জলিং পগ্গহেত্ৱানাতি বন্ধঞ্জলিপুটং সিৰসি কত্ৱা সকং চিত্তং অত্তনো চিত্তং পসাদযিং ইত্থম্ভূতস্স ভগৱতো গুণে পসাদেসিং পসন্নমকাসিন্তি অত্থো. মনসাৱ নিমন্তেসিন্তি চিত্তেন পৱাৰেসিং. আগচ্ছতু মহামুনীতি মহিতো পূজাৰহো মুনি ভগৱা মম নিৱেসনং আগচ্ছতু.

১২৮. মম সঙ্কপ্পমঞ্ঞাযাতি ময্হং চিত্তসঙ্কপ্পং ঞত্ৱা লোকে সত্তলোকে অনুত্তৰো উত্তৰৱিৰহিতো সত্থা খীণাসৱসহস্সেহি অৰহন্তসহস্সেহি পৰিৱুতো মম দ্ৱাৰং ময্হং গেহদ্ৱাৰং উপাগমি সম্পাপুণি.

১২৯. তস্স সম্পত্তস্স সত্থুনো এৱং নমক্কাৰমকাসিং. পুৰিসাজঞ্ঞ পুৰিসানং আজঞ্ঞ, সেট্ঠ, মম নমক্কাৰো তে তুয্হং অত্থু ভৱতু. পুৰিসুত্তম পুৰিসানং উত্তম অধিকগুণৱিসিট্ঠ তে তুয্হং মম নমক্কাৰো অত্থু. পাসাদং পসাদজনকং মম নিৱেসনং অভিৰুহিত্ৱা সীহাসনে উত্তমাসনে নিসীদতন্তি আযাচিন্তি অত্থো.

১৩০. দন্তো দন্তপৰিৱাৰোতি সযং দ্ৱাৰত্তযেন দন্তো তথা দন্তাহি ভিক্খুভিক্খুনীউপাসকউপাসিকাসঙ্খাতাহি চতূহি পৰিসাহি পৰিৱাৰিতো. তিণ্ণো তাৰযতং ৱৰোতি সযং তিণ্ণো সংসাৰতো উত্তিণ্ণো নিক্খন্তো তাৰযতং তাৰযন্তানং ৱিসিট্ঠপুগ্গলানং ৱৰো উত্তমো ভগৱা মমাৰাধনেন পাসাদং অভিৰুহিত্ৱা পৱৰাসনে উত্তমাসনে নিসীদি নিসজ্জং কপ্পেসি.

১৩১. যং মে অত্থি সকে গেহেতি অত্তনো গেহে যং আমিসং পচ্চুপট্ঠিতং সম্পাদিতং ৰাসিকতং অত্থি. তাহং বুদ্ধস্স পাদাসিন্তি বুদ্ধস্স বুদ্ধপ্পমুখস্স সঙ্ঘস্স তং আমিসং পাদাসিং প-কাৰেন আদৰেন ৱা অদাসিন্তি অত্থো. পসন্নো সেহি পাণিভীতি অত্তনো দ্ৱীহি হত্থেহি পস্সন্নচিত্তো গহেত্ৱা পাদাসিন্তি অত্থো.

১৩২. পসন্নচিত্তো পসাদিতমনসঙ্কপ্পো সুমনো সুন্দৰমনো. ৱেদজাতো জাতৱেদো উপ্পন্নসোমনস্সো কতঞ্জলী সিৰসি ঠপিতঅঞ্জলিপুটো বুদ্ধসেট্ঠং নমস্সামি সেট্ঠস্স বুদ্ধস্স পণামং কৰোমীতি অত্থো. অহো বুদ্ধস্সুড়াৰতাতি পটিৱিদ্ধচতুসচ্চস্স সত্থুনো উড়াৰতা মহন্তভাৱো অহো অচ্ছৰিযন্তি অত্থো.

১৩৩. অট্ঠন্নং পযিৰূপাসতন্তি পযিৰুপাসন্তানং ভুঞ্জং ভুঞ্জন্তানং অট্ঠন্নং অৰিযপুগ্গলানং অন্তৰে খীণাসৱা অৰহন্তোৱ বহূতি অত্থো. তুয্হেৱেসো আনুভাৱোতি এসো আকাসচৰণউম্মুজ্জননিমুজ্জনাদিআনুভাৱো তুয্হেৱ তুয্হং এৱ আনুভাৱো, নাঞ্ঞেসং. সৰণং তং উপেমহন্তি তং ইত্থম্ভূতং তুৱং সৰণং তাণং লেণং পৰাযনন্তি উপেমি গচ্ছামি জানামি ৱাতি অত্থো.

১৩৪. লোকজেট্ঠো নৰাসভো পিযদস্সী ভগৱা ভিক্খুসঙ্ঘমজ্ঝে নিসীদিত্ৱা ইমা ব্যাকৰণগাথা অভাসথ কথেসীতি অত্থো. সেসং সুৱিঞ্ঞেয্যমেৱাতি.

সুমঙ্গলত্থেৰঅপদানৱণ্ণনা সমত্তা.

দুতিযস্স সীহাসনৱগ্গস্স ৱণ্ণনা সমত্তা.