৯. ৱটংসকিযত্থেৰঅপদানৱণ্ণনা

সুমেধো নাম নামেনাতিআদিকং আযস্মতো ৱটংসকিযত্থেৰস্স অপদানং. অযম্পি পুৰিমমুনিন্দেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সুমেধস্স ভগৱতো কালে কুলগেহে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা তত্থ আদীনৱং দিস্ৱা গেহং পহায তাপসপব্বজ্জং পব্বজিত্ৱা মহাৱনে ৱিহাসি. তস্মিং সমযে সুমেধো ভগৱা ৱিৱেককামতায তং ৱনং সম্পাপুণি. অথ সো তাপসো ভগৱন্তং দিস্ৱা পসন্নমানসো ৱিকসিতং সড়লপুপ্ফং গহেত্ৱা ৱটংসকাকাৰেন গন্থেত্ৱা ভগৱতো পাদমূলে ঠপেত্ৱা পূজেসি. ভগৱা তস্স চিত্তপ্পসাদত্থায অনুমোদনমকাসি. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে কুলে জাতো ৱুদ্ধিমন্ৱায সদ্ধো পসন্নো পব্বজিত্ৱা নচিৰস্সেৱ অৰহা অহোসি.

৪৩. সো অপৰভাগে পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সুমেধো নাম নামেনাতিআদি ৱুত্তং. ৱিৱেকমনুব্ৰূহন্তোতি জনাকিণ্ণতং পহায জনৱিৱেকং চিত্তৱিৱেকঞ্চ অনুব্ৰূহন্তো ৱড্ঢেন্তো বহুলীকৰোন্তো মহাৱনং অজ্ঝোগাহি পাৱিসীতি অত্থো. সেসং উত্তানত্থমেৱাতি.

ৱটংসকিযত্থেৰঅপদানৱণ্ণনা সমত্তা.