৩-১০. আনন্দত্থেৰঅপদানৱণ্ণনা
আৰামদ্ৱাৰা নিক্খম্মাতিআদিকং আযস্মতো আনন্দত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে হংসৱতীনগৰে সত্থু ৱেমাতিকভাতা হুত্ৱা নিব্বত্তি. সুমনোতিস্স নামং অহোসি. পিতা পনস্স নন্দৰাজা নাম. সো অত্তনো পুত্তস্স সুমনকুমাৰস্স ৱযপ্পত্তস্স হংসৱতীনগৰতো ৱীসযোজনসতে ঠানে ভোগনগৰং অদাসি. সো কদাচি কদাচি আগন্ত্ৱা সত্থাৰঞ্চ পিতৰঞ্চ পস্সতি. তদা ৰাজা সত্থাৰঞ্চ সতসহস্সপৰিমাণং ভিক্খুসঙ্ঘঞ্চ সযমেৱ সক্কচ্চং উপট্ঠহি, অঞ্ঞেসং উপট্ঠাতুং ন দেতি.
তেন সমযেন পচ্চন্তো কুপিতো অহোসি. কুমাৰো তস্স কুপিতভাৱং ৰঞ্ঞো অনাৰোচেত্ৱা সযমেৱ তং ৱূপসমেসি. তং সুত্ৱা ৰাজা তুট্ঠমানসো ‘‘ৱৰং তে তাৱ দম্মি, গণ্হাহী’’তি আহ. কুমাৰো ‘‘সত্থাৰং ভিক্খুসঙ্ঘঞ্চ তেমাসং উপট্ঠহন্তো জীৱিতং অৱঞ্ঝং কাতুং ইচ্ছামী’’তি আহ. ‘‘এতং ন সক্কা, অঞ্ঞং ৱদেহী’’তি. ‘‘দেৱ, খত্তিযানং দ্ৱে কথা নাম নত্থি, এতং মে দেহি, ন ময্হং অঞ্ঞেনত্থো, সচে সত্থা অনুজানাতি, দিন্নমেৱা’’তি. সো ‘‘সত্থু চিত্তং জানিস্সামী’’তি ৱিহাৰং গতো. তেন চ সমযেন ভগৱা গন্ধকুটিং পৱিট্ঠো হোতি. সো ভিক্খূ উপসঙ্কমিত্ৱা ‘‘অহং, ভন্তে, ভগৱন্তং দস্সনায আগতো, দস্সেথ ম’’ন্তি. ভিক্খূ ‘‘সুমনো নাম থেৰো সত্থু উপট্ঠাকো, তস্স সন্তিকং গচ্ছাহী’’তি আহংসু. সো থেৰস্স সন্তিকং গন্ত্ৱা ‘‘সত্থাৰং, ভন্তে, দস্সেথা’’তি আহ. অথ থেৰো তস্স পস্সন্তস্সেৱ পথৱিযং নিমুজ্জিত্ৱা ভগৱন্তং উপসঙ্কমিত্ৱা ‘‘ৰাজপুত্তো, ভন্তে, তুম্হাকং দস্সনায আগতো’’তি আহ. ‘‘তেন হি ভিক্খু বহি আসনং পঞ্ঞপেহী’’তি. থেৰো পুনপি বুদ্ধাসনং গহেত্ৱা অন্তোগন্ধকুটিযং নিমুজ্জিত্ৱা তস্স পস্সন্তস্স বহিপৰিৱেণে পাতুভৱিত্ৱা গন্ধকুটিপৰিৱেণে আসনং পঞ্ঞাপেসি. কুমাৰো তং দিস্ৱা ‘‘মহন্তো ৱতাযং ভিক্খূ’’তি চিত্তং উপ্পাদেসি.
ভগৱাপি গন্ধকুটিতো নিক্খমিত্ৱা পঞ্ঞত্তাসনে নিসীদি. ৰাজপুত্তো সত্থাৰং ৱন্দিত্ৱা পটিসন্থাৰং কত্ৱা ‘‘অযং, ভন্তে, থেৰো তুম্হাকং সাসনে ৱল্লভো মঞ্ঞে’’তি? ‘‘আম, কুমাৰ, ৱল্লভো’’তি. ‘‘কিং কত্ৱা, ভন্তে, এস ৱল্লভো’’তি? ‘‘দানাদীনি পুঞ্ঞানি কত্ৱা’’তি. ‘‘ভগৱা, অহম্পি অযং থেৰো ৱিয অনাগতে বুদ্ধসাসনে ৱল্লভো হোতুকামো’’তি সো বুদ্ধপ্পমুখস্স সঙ্ঘস্স সত্তাহং খন্ধাৱাৰে ভত্তং দত্ৱা সত্তমে দিৱসে, ‘‘ভন্তে, মযা পিতু সন্তিকা তুম্হাকং তেমাসং পটিজগ্গনৱৰো লদ্ধো, তেমাসং মে ৱস্সাৱাসং অধিৱাসেথা’’তি ৱত্ৱা সত্থু অধিৱাসনং ৱিদিত্ৱা সপৰিৱাৰং ভগৱন্তং গহেত্ৱা যোজনে যোজনে সত্থু ভিক্খুসঙ্ঘস্স চ ৱসনানুচ্ছৱিকে ৱিহাৰে কাৰেত্ৱা তত্থ তত্থ ৱসাপেন্তো অত্তনো ৱসনট্ঠানসমীপে সতসহস্সেন কীতে সোভননামকে উয্যানে সতসহস্সেন কাৰিতং ৱিহাৰং পৱেসাপেত্ৱা –
‘‘সতসহস্সেন মে কীতং, সতসহস্সেন কাৰিতং;
সোভনং নাম উয্যানং, পটিগ্গণ্হ মহামুনী’’তি. –
উদকং পাতেসি. সো ৱস্সূপনাযিকদিৱসে সত্থু মহাদানং পৱত্তেত্ৱা ‘‘ইমিনা নীহাৰেন দানং দদেয্যাথা’’তি পুত্তদাৰে অমচ্চে চ দানে কিচ্চকৰণে চ নিযোজেত্ৱা সযং সুমনত্থেৰস্স ৱসনট্ঠানসমীপেযেৱ ৱসন্তো এৱং অত্তনো ৱসনট্ঠানে সত্থাৰং তেমাসং উপট্ঠহি. উপকট্ঠায পন পৱাৰণায গামং পৱিসিত্ৱা সত্তাহং মহাদানং পৱত্তেত্ৱা সত্তমে দিৱসে সত্থু ভিক্খুসঙ্ঘস্স চ পাদমূলে তিচীৱৰে ঠপেত্ৱা ৱন্দিত্ৱা ‘‘ভন্তে, যদেতং মযা খন্ধাৱাৰতো পট্ঠায পুঞ্ঞং কতং, ন তং সক্কসম্পত্তিআদীনং অত্থায কতং, অথ খো অহম্পি সুমনত্থেৰো ৱিয অনাগতে একস্স বুদ্ধস্স উপট্ঠাকো ৱল্লভো ভৱেয্য’’ন্তি পত্থনং অকাসি. সত্থা তস্স অনন্তৰাযতং দিস্ৱা ব্যাকৰিত্ৱা পক্কামি.
সো তস্মিং বুদ্ধুপ্পাদে ৱস্সসতসহস্সং পুঞ্ঞানি কত্ৱা ততো পৰম্পি তত্থ তত্থ ভৱে উড়াৰানি পুঞ্ঞকম্মানি উপচিনিত্ৱা দেৱমনুস্সেসু সংসৰন্তো কস্সপভগৱতো কালে কুলগেহে নিব্বত্তো ৱিঞ্ঞুতং পত্ৱা একস্স থেৰস্স পিণ্ডায চৰতো পত্তগ্গহণত্থং উত্তৰসাটকং কত্ৱা পূজং অকাসি. পুন সগ্গে নিব্বত্তিত্ৱা ততো চুতো বাৰাণসিৰাজা হুত্ৱা অট্ঠ পচ্চেকবুদ্ধে দিস্ৱা তে ভোজেত্ৱা অত্তনো মঙ্গলুয্যানে অট্ঠ পণ্ণসালাযো কাৰেত্ৱা তেসং নিসীদনত্থায অট্ঠ সব্বৰতনমযপীঠে চেৱ মণিআধাৰকে চ পটিযাদেত্ৱা দসৱস্সসহস্সানি উপট্ঠানং অকাসি, এতানি পাকটানি.
কপ্পসতসহস্সং পন তত্থ তত্থ ভৱে পুঞ্ঞানি উপচিনন্তো অম্হাকং বোধিসত্তেন সদ্ধিং তুসিতপুৰে নিব্বত্তিত্ৱা ততো চুতো অমিতোদনসক্কস্স গেহে নিব্বত্তিত্ৱা সব্বে ঞাতকে আনন্দিতে কৰোন্তো জাতোতি আনন্দোত্ৱেৱ নামং লভি. সো অনুক্কমেন ৱযপ্পত্তো কতাভিনিক্খমনে সম্মাসম্বোধিং পত্ৱা পৱত্তিতৱৰধম্মচক্কে পঠমং কপিলৱত্থুং গন্ত্ৱা ততো নিক্খমন্তে ভগৱতি তস্স পৰিৱাৰত্থং পব্বজিতুং নিক্খমন্তেহি ভদ্দিযাদীহি সদ্ধিং নিক্খমিত্ৱা ভগৱতো সন্তিকে পব্বজিত্ৱা আযস্মতো পুণ্ণস্স মন্তাণিপুত্তস্স সন্তিকে ধম্মকথং সুত্ৱা সোতাপত্তিফলে পতিট্ঠহি.
তেন চ সমযেন ভগৱতো পঠমবোধিযং ৱীসতিৱস্সানি অনিবদ্ধা উপট্ঠাকা অহেসুং. একদা নাগসমালো পত্তচীৱৰং গহেত্ৱা ৱিচৰতি, একদা নাগিতো, একদা উপৱানো, একদা সুনক্খত্তো, একদা চুন্দো সমণুদ্দেসো, একদা সাগতো, একদা মেঘিযো, তে যেভুয্যেন সত্থু চিত্তং নাৰাধযিংসু. অথেকদিৱসং ভগৱা গন্ধকুটিপৰিৱেণে পঞ্ঞত্তৱৰবুদ্ধাসনে ভিক্খুসঙ্ঘপৰিৱুতো নিসিন্নো ভিক্খূ আমন্তেসি – ‘‘অহং, ভিক্খৱে, ইদানি মহল্লকো একচ্চে ভিক্খূ ‘ইমিনা মগ্গেন গচ্ছামী’তি ৱুত্তে অঞ্ঞেন মগ্গেন গচ্ছন্তি, একচ্চে ময্হং পত্তচীৱৰং ভূমিযং নিক্খিপন্তি, ময্হং নিবদ্ধুপট্ঠাকং একং ভিক্খুং ৱিজানথা’’তি. তং সুত্ৱা ভিক্খূনং ধম্মসংৱেগো উদপাদি. অথাযস্মা সাৰিপুত্তো উট্ঠায ভগৱন্তং ৱন্দিত্ৱা ‘‘অহং, ভন্তে, তুম্হে উপট্ঠহিস্সামী’’তি আহ. তং ভগৱা পটিক্খিপি. এতেনুপাযেন মহামোগ্গল্লানং আদিং কত্ৱা সব্বে মহাসাৱকা ‘‘অহং উপট্ঠহিস্সামি, অহং উপট্ঠহিস্সামী’’তি উট্ঠহিংসু ঠপেত্ৱা আযস্মন্তং আনন্দং. তেপি ভগৱা পটিক্খিপি.
আনন্দো পন তুণ্হীযেৱ নিসীদি. অথ নং ভিক্খূ আহংসু – ‘‘আৱুসো, ত্ৱম্পি সত্থু উপট্ঠাকট্ঠানং যাচাহী’’তি. ‘‘যাচিত্ৱা লদ্ধুপট্ঠানং নাম কীদিসং হোতি? সচে ৰুচ্চতি, সত্থা সযমেৱ ৱক্খতী’’তি. অথ ভগৱা – ‘‘ন, ভিক্খৱে, আনন্দো অঞ্ঞেহি উস্সাহেতব্বো, সযমেৱ জানিত্ৱা মং উপট্ঠহিস্সতী’’তি আহ. ততো ভিক্খূ ‘‘উট্ঠেহি, আৱুসো আনন্দ, সত্থাৰং উপট্ঠাকট্ঠানং যাচাহী’’তি আহংসু. থেৰো উট্ঠহিত্ৱা ‘‘সচে মে, ভন্তে, ভগৱা অত্তনা লদ্ধং পণীতং চীৱৰং ন দস্সতি, পণীতং পিণ্ডপাতং ন দস্সতি, একগন্ধকুটিযং ৱসিতুং ন দস্সতি, নিমন্তনং গহেত্ৱা ন গমিস্সতি, এৱাহং ভগৱন্তং উপট্ঠহিস্সামী’’তি আহ. ‘‘এত্তকে গুণে লভতো সত্থু উপট্ঠানং কো ভাৰো’’তি উপৱাদমোচনত্থং ইমে চত্তাৰো পটিক্খেপা, ‘‘সচে, ভন্তে, ভগৱা মযা গহিতং নিমন্তনং গমিস্সতি, সচাহং দেসন্তৰতো আগতাগতে তাৱদেৱ দস্সেতুং লভামি, যদা মে কঙ্খা উপ্পজ্জতি, তাৱদেৱ ভগৱন্তং উপসঙ্কমিত্ৱা পুচ্ছিতুং লভামি, সচে ভগৱা পৰম্মুখা দেসিতং ধম্মং পুন ময্হং ব্যাকৰিস্সসি, এৱাহং ভগৱন্তং উপট্ঠহিস্সামি’’. ‘‘এত্তকম্পি সত্থু সন্তিকে অনুগ্গহং ন লভতী’’তি উপৱাদমোচনত্থঞ্চেৱ ধম্মভণ্ডাগাৰিকভাৱপৰিপূৰণত্থঞ্চ ইমা চতস্সো যাচনাতি ইমে অট্ঠ ৱৰে গহেত্ৱা নিবদ্ধুপট্ঠাকো অহোসি. তস্সেৱ ঠানন্তৰস্স অত্থায কপ্পসতসহস্সং পূৰিতানং পাৰমীনং ফলং পাপুণি.
সো উপট্ঠাকট্ঠানং লদ্ধদিৱসতো পট্ঠায দসবলং দুৱিধেন উদকেন তিৱিধেন দন্তকট্ঠেন হত্থপাদপৰিকম্মেন পিট্ঠিপৰিকম্মেন গন্ধকুটিপৰিৱেণসম্মজ্জনেনাতি এৱমাদীহি কিচ্চেহি উপট্ঠহন্তো – ‘‘ইমায নাম ৱেলায সত্থু ইদং নাম লদ্ধুং ৱট্টতি, ইদং নাম কাতুং ৱট্টতী’’তি দিৱসভাগং সন্তিকাৱচৰো হুত্ৱা ৰত্তিভাগে মহন্তং দণ্ডদীপিকং গহেত্ৱা গন্ধকুটিপৰিৱেণং নৱৱাৰে অনুপৰিযাযতি সত্থৰি পক্কোসন্তে পটিৱচনদানায, থিনমিদ্ধৱিনোদনত্থং. অথ নং সত্থা জেতৱনে অৰিযগণমজ্ঝে নিসিন্নো অনেকপৰিযাযেন পসংসিত্ৱা বহুস্সুতানং সতিমন্তানং গতিমন্তানং ধিতিমন্তানং উপট্ঠাকানঞ্চ ভিক্খূনং অগ্গট্ঠানে ঠপেসি.
এৱং সত্থাৰা পঞ্চসু ঠানেসু এতদগ্গে ঠপিতো চতূহি অচ্ছৰিযব্ভূতধম্মেহি সমন্নাগতো সত্থু ধম্মকোসাৰক্খো অযং মহাথেৰো সেখোৱ সমানো সত্থৰি পৰিনিব্বুতে হেট্ঠা ৱুত্তনযেন ভিক্খূহি সমুত্তেজিতো দেৱতায চ সংৱেজিতো ‘‘স্ৱেযেৱ চ দানি ধম্মসঙ্গীতি কাতব্বা, ন খো পন মেতং পতিৰূপং, য্ৱাযং সেখো সকৰণীযো অসেখেহি থেৰেহি সদ্ধিং ধম্মং গাযিতুং সন্নিপাতং গন্তু’’ন্তি সঞ্জাতুস্সাহো ৱিপস্সনং পট্ঠপেত্ৱা বহুদেৱ ৰত্তিং ৱিপস্সনায কম্মং কৰোন্তো চঙ্কমে ৱীৰিযসমতং অলভিত্ৱা ততো ৱিহাৰং পৱিসিত্ৱা সযনে নিসীদিত্ৱা সযিতুকামো কাযং আৱট্টেসি. অপত্তঞ্চ সীসং বিম্বোহনং, পাদা চ ভূমিতো মুত্তমত্তা, একস্মিং অন্তৰে অনুপাদায আসৱেহি চিত্তং ৱিমুচ্চি, ছড়ভিঞ্ঞো অহোসি.
৬৪৪. এৱং ছড়ভিঞ্ঞাদিগুণপটিমণ্ডিতো উপট্ঠাকাদিগুণেহি এতদগ্গট্ঠানং পত্তো অত্তনো পুব্বকম্মং সৰিত্ৱা সোমনস্সৱসেন পুব্বচৰিতাপদানং দস্সেন্তো আৰামদ্ৱাৰা নিক্খম্মাতিআদিমাহ. তত্থ আৰামদ্ৱাৰাতি সব্বসত্তানং ধম্মদেসনত্থায ৱিহাৰদ্ৱাৰতো নিক্খমিত্ৱা বহিদ্ৱাৰসমীপে কতমণ্ডপমজ্ঝে সুপঞ্ঞত্তৱৰবুদ্ধাসনে নিসিন্নো পদুমুত্তৰো নাম মহামুনি সম্মাসম্বুদ্ধো. ৱস্সন্তো অমতং ৱুট্ঠিন্তি ধম্মদেসনামহাঅমতধাৰাহি ধম্মৱস্সং ৱস্সন্তো. নিব্বাপেসি মহাজনন্তি মহাজনস্স চিত্তসন্তানগতকিলেসগ্গিং নিব্বাপেসি ৱূপসমেসি, মহাজনং নিব্বানামতপানেন সন্তিং সীতিভাৱং পাপেসীতি অত্থো.
৬৪৫. সতসহস্সং তে ধীৰাতি পৰিৱাৰসম্পত্তিং দস্সেন্তো আহ. ছহি অভিঞ্ঞাহি ইদ্ধিৱিধাদিঞাণকোট্ঠাসেহি সমন্নাগতা অনেকসতসহস্সচক্কৱাড়েসু খণেন গন্তুং সমত্থাহি ইদ্ধীহি সমন্নাগতত্তা মহিদ্ধিকাতে ধীৰা সতসহস্সখীণাসৱা ছাযাৱ অনপাযিনীতি কত্থচি অনপগতা ছাযা ইৱ তং সম্বুদ্ধং পদুমুত্তৰং ভগৱন্তং পৰিৱাৰেন্তি পৰিৱাৰেত্ৱা ধম্মং সুণন্তীতি অত্থো.
৬৪৬. হত্থিক্খন্ধগতো আসিন্তি তদা ভগৱতো ধম্মদেসনাসমযে অহং হত্থিপিট্ঠে নিসিন্নো আসিং অহোসিন্তি অত্থো. সেতচ্ছত্তং ৱৰুত্তমন্তি পত্থেতব্বং উত্তমং সেতচ্ছত্তং মম মত্থকে ধাৰযন্তো হত্থিপিট্ঠে নিসিন্নোতি সম্বন্ধো. সুচাৰুৰূপং দিস্ৱানাতি সুন্দৰং চাৰুং মনোহৰৰূপৱন্তং ধম্মং দেসিযমানং সম্বুদ্ধং দিস্ৱা মে ময্হং ৱিত্তি সন্তুট্ঠি সোমনস্সং উদপজ্জথ উপ্পজ্জতীতি অত্থো.
৬৪৭. ওৰুয্হ হত্থিক্খন্ধম্হাতি তং ভগৱন্তং নিসিন্নং দিস্ৱা হত্থিপিট্ঠিতো ওৰুয্হ ওৰোহিত্ৱা নৰাসভং নৰৱসভং উপগচ্ছিং সমীপং গতোতি অত্থো. ৰতনমযছত্তং মেতি ৰতনভূসিতং মে ময্হং ছত্তং বুদ্ধসেট্ঠস্স মত্থকে ধাৰযিন্তি সম্বন্ধো.
৬৪৮. মম সঙ্কপ্পমঞ্ঞাযাতি ময্হং পসাদেন উপ্পন্নং সঙ্কপ্পং ঞত্ৱা ইসীনং অন্তৰে মহন্তভূতো সো পদুমুত্তৰো ভগৱা. তং কথং ঠপযিত্ৱানাতি তং অত্তনা দেসিযমানং ধম্মকথং ঠপেত্ৱা মম ব্যাকৰণত্থায ইমা গাথা অভাসথ কথেসীতি অত্থো.
৬৪৯. কথন্তি চে? যো সোতিআদিমাহ. সোণ্ণালঙ্কাৰভূসিতং ছত্তং যো সো ৰাজকুমাৰো মে মত্থকে ধাৰেসীতি সম্বন্ধো. তমহং কিত্তযিস্সামীতি তং ৰাজকুমাৰং অহং কিত্তযিস্সামি পাকটং কৰিস্সামি. সুণোথ মম ভাসতোতি ভাসন্তস্স মম ৱচনং সুণোথ ওহিতসোতা মনসি কৰোথাতি অত্থো.
৬৫০. ইতো গন্ত্ৱা অযং পোসোতি অযং ৰাজকুমাৰো ইতো মনুস্সলোকতো চুতো তুসিতং গন্ত্ৱা আৱসিস্সতি তত্থ ৱিহৰিস্সতি. তত্থ অচ্ছৰাহি পুৰক্খতো পৰিৱাৰিতো তুসিতভৱনসম্পত্তিং অনুভোস্সতীতি সম্বন্ধো.
৬৫১. চতুত্তিংসক্খত্তুন্তি তুসিতভৱনতো চৱিত্ৱা তাৱতিংসভৱনে উপ্পন্নো চতুত্তিংসৱাৰে দেৱিন্দো দেৱৰজ্জং কৰিস্সতীতি সম্বন্ধো. বলাধিপো অট্ঠসতন্তি তাৱতিংসভৱনতো চুতো মনুস্সলোকে উপ্পন্নো বলাধিপো চতুৰঙ্গিনিযা সেনায অধিপো পধানো অট্ঠসতজাতীসু পদেসৰাজা হুত্ৱা ৱসুধং অনেকৰতনৱৰং পথৱিং আৱসিস্সতি পুথব্যং ৱিহৰিস্সতীতি অত্থো.
৬৫২. অট্ঠপঞ্ঞাসক্খত্তুন্তি অট্ঠপঞ্ঞাসজাতীসু চক্কৱত্তী ৰাজা ভৱিস্সতীতি অত্থো. মহিযা সকলজম্বুদীপপথৱিযা ৱিপুলং অসঙ্খ্যেয্যং পদেসৰজ্জং কাৰযিস্সতি.
৬৫৪. সক্যানং কুলকেতুস্সাতি সক্যৰাজূনং কুলস্স ধজভূতস্স বুদ্ধস্স ঞাতকো ভৱিস্সতীতি অত্থো.
৬৫৫. আতাপীতি ৱীৰিযৱা. নিপকোতি নেপক্কসঙ্খাতায পঞ্ঞায সমন্নাগতো. বাহুসচ্চেসু বহুস্সুতভাৱেসু পিটকত্তযধাৰণেসু কোৱিদো ছেকো. নিৱাতৱুত্তি অনৱঞ্ঞত্তিকো অথদ্ধো কাযপাগব্বিযাদিথদ্ধভাৱৱিৰহিতো সব্বপাঠী সকলপিটকত্তযধাৰী ভৱিস্সতীতি সম্বন্ধো.
৬৫৬. পধানপহিতত্তো সোতি সো আনন্দত্থেৰো ৱীৰিযকৰণায পেসিতচিত্তো. উপসন্তো নিৰূপধীতি ৰাগূপধিদোসূপধিমোহূপধীহি ৱিৰহিতো, সোতাপত্তিমগ্গেন পহাতব্বকিলেসানং পহীনত্তা উপসন্তো সন্তকাযচিত্তো.
৬৫৭. সন্তি আৰঞ্ঞকাতি অৰঞ্ঞে ভৱা মহাৱনে জাতা. সট্ঠিহাযনাতি সট্ঠিৱস্সকালে হাযনবলা. তিধা পভিন্নাতি অক্খিকণ্ণকোসসঙ্খাতেহি তীহি ঠানেহি ভিন্নমদা. মাতঙ্গাতি মাতঙ্গহত্থিকুলে জাতা. ঈসাদন্তাতি ৰথীসাসদিসদন্তা. উৰূড়্হৱা ৰাজৱাহনা. কুঞ্জৰসঙ্খাতা নাগা হত্থিৰাজানো সন্তি সংৱিজ্জন্তি যথা, তথা সতসহস্সসঙ্খ্যা খীণাসৱসঙ্খাতা পণ্ডিতা মহিদ্ধিকা অৰহন্তনাগা সন্তি, সব্বে তে অৰহন্তনাগা বুদ্ধনাগৰাজস্স. ন হোন্তি পণিধিম্হি তেতি তে পণিধিম্হি তাদিসা ন হোন্তি, কিং সব্বে তে ভযভীতা সকভাৱেন সণ্ঠাতুং অসমত্থাতি অত্থো. সেসং ৱুত্তনযত্তা উত্তানত্থমেৱাতি.
আনন্দত্থেৰঅপদানৱণ্ণনা সমত্তা.
এত্তাৱতা পঠমা বুদ্ধৱগ্গৱণ্ণনা সমত্তা.
পঠমো ভাগো নিট্ঠিতো.
নমো তস্স ভগৱতো অৰহতো সম্মাসম্বুদ্ধস্স