৩-৮. পিণ্ডোলভাৰদ্ৱাজত্থেৰঅপদানৱণ্ণনা

পদুমুত্তৰো নাম জিনোতিআদিকং আযস্মতো পিণ্ডোলভাৰদ্ৱাজস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে সীহযোনিযং নিব্বত্তিত্ৱা পব্বতপাদে গুহাযং ৱিহাসি. ভগৱা তস্স অনুগ্গহং কাতুং গোচৰায পক্কন্তকালে তস্স সযনগুহং পৱিসিত্ৱা নিৰোধং সমাপজ্জিত্ৱা নিসীদি. সীহো গোচৰং গহেত্ৱা নিৱত্তো গুহদ্ৱাৰে ঠত্ৱা ভগৱন্তং দিস্ৱা হট্ঠতুট্ঠো জলজথলজপুপ্ফেহি পূজং কত্ৱা চিত্তং পসাদেন্তো ভগৱতো আৰক্খণত্থায অঞ্ঞে ৱাড়মিগে অপনেতুং তীসু ৱেলাসু সীহনাদং নদন্তো বুদ্ধগতায সতিযা অট্ঠাসি. যথা পঠমদিৱসে, এৱং সত্তাহং পূজেসি. ভগৱা ‘‘সত্তাহচ্চযেন নিৰোধা ৱুট্ঠহিত্ৱা ৱট্টিস্সতি ইমস্স এত্তকো উপনিস্সযো’’তি তস্স পস্সন্তস্সেৱ আকাসং পক্খন্দিত্ৱা ৱিহাৰমেৱ গতো.

সীহো বুদ্ধৱিযোগদুক্খং অধিৱাসেতুং অসক্কোন্তো কালং কত্ৱা হংসৱতীনগৰে মহাভোগকুলে নিব্বত্তিত্ৱা ৱযপ্পত্তো নগৰৱাসীহি সদ্ধিং ৱিহাৰং গন্ত্ৱা সত্থু ধম্মদেসনং সুত্ৱা পসন্নো সত্তাহং বুদ্ধপ্পমুখস্স ভিক্খুসঙ্ঘস্স মহাদানং পৱত্তেত্ৱা যাৱজীৱং পুঞ্ঞানি কত্ৱা অপৰাপৰং দেৱমনুস্সেসু সংসৰন্তো অম্হাকং ভগৱতো কালে কোসম্বিযং ৰঞ্ঞো উদেনস্স পুৰোহিতস্স পুত্তো হুত্ৱা নিব্বত্তি. ভাৰদ্ৱাজোতিস্স নামং অহোসি. সো ৱযপ্পতো তযো ৱেদে উগ্গহেত্ৱা পঞ্চ মাণৱকসতানি মন্তে ৱাচেন্তো মহগ্ঘসভাৱেন অননুৰূপাচাৰত্তা তেহি পৰিচ্চত্তো ৰাজগহং গন্ত্ৱা ভগৱতো ভিক্খুসঙ্ঘস্স চ লাভসক্কাৰং দিস্ৱা সাসনে পব্বজিত্ৱা ভোজনে অমত্তঞ্ঞূ হুত্ৱা ৱিহৰতি. সত্থাৰা উপাযেন মত্তঞ্ঞুতায পতিট্ঠাপেন্তো ৱিপস্সনং পট্ঠপেত্ৱা নচিৰস্সেৱ ছড়ভিঞ্ঞো অহোসি. ছড়ভিঞ্ঞো পন হুত্ৱা ভগৱতো সম্মুখা ‘‘যং সাৱকেহি পত্তব্বং, তং মযা অনুপ্পত্ত’’ন্তি, ভিক্খুসঙ্ঘে চ ‘‘যস্স মগ্গে ৱা ফলে ৱা কঙ্খা অত্থি, সো মং পুচ্ছতূ’’তি সীহনাদং নদি. তেন তং ভগৱা – ‘‘এতদগ্গং, ভিক্খৱে, মম সাৱকানং ভিক্খূনং সীহনাদিকানং যদিদং পিণ্ডোলভাৰদ্ৱাজো’’তি (অ. নি. ১.১৮৮, ১৯৫) এতদগ্গে ঠপেসি.

৬১৩. এৱং এতদগ্গং ঠানং পত্ৱা পুব্বে কতপুঞ্ঞসম্ভাৰং সৰিত্ৱা সোমনস্সৱসেন অত্তনো পুঞ্ঞকম্মাপদানং ৱিভাৱেন্তো পদুমুত্তৰোতিআদিমাহ. তস্সত্থো হেট্ঠা ৱুত্তোৱ. পুৰতো হিমৱন্তস্সাতি হিমালযপব্বততো পুব্বদিসাভাগেতি অত্থো. চিত্তকূটে ৱসী তদাতি যদা অহং সীহো মিগৰাজা হুত্ৱা হিমৱন্তপব্বতসমীপে ৱসামি, তদা পদুমুত্তৰো নাম সত্থা অনেকেহি চ ওসধেহি, অনেকেহি চ ৰতনেহি চিত্তৱিচিত্ততায চিত্তকূটে চিত্তপব্বতসিখৰে ৱসীতি সম্বন্ধো.

৬১৪. অভীতৰূপো তত্থাসিন্তি অভীতসভাৱো নিব্ভযসভাৱো মিগৰাজা তত্থ আসিং অহোসিন্তি অত্থো. চতুক্কমোতি চতূহি দিসাহি কমো গন্তুং সমত্থো. যস্স সদ্দং সুণিত্ৱানাতি যস্স মিগৰঞ্ঞো সীহনাদং সুত্ৱা বহুজ্জনা বহুসত্তা ৱিক্খম্ভন্তি ৱিসেসেন খম্ভন্তি ভাযন্তি.

৬১৫. সুফুল্লং পদুমং গয্হাতি ভগৱতি পসাদেন সুপুপ্ফিতপদুমপুপ্ফং ডংসিত্ৱা. নৰাসভং নৰানং আসভং উত্তমং সেট্ঠং সম্বুদ্ধং উপগচ্ছিং, সমীপং অগমিন্তি অত্থো. ৱুট্ঠিতস্স সমাধিম্হাতি নিৰোধসমাপত্তিতো ৱুট্ঠিতস্স বুদ্ধস্স তং পুপ্ফং অভিৰোপযিং পূজেসিন্তি অত্থো.

৬১৬. চতুদ্দিসং নমস্সিত্ৱাতি চতূসু দিসাসু নমস্সিত্ৱা সকং চিত্তং অত্তনো চিত্তং পসাদেত্ৱা আদৰেন পতিট্ঠপেত্ৱা সীহনাদং অভীতনাদং অনদিং ঘোসেসিন্তি অত্থো.

৬১৭. ততো বুদ্ধেন দিন্নব্যাকৰণং পকাসেন্তো পদুমুত্তৰোতিআদিমাহ. তং উত্তানত্থমেৱ.

৬১৮. ৱদতং সেট্ঠোতি ‘‘মযং বুদ্ধা, মযং বুদ্ধা’’তি ৱদন্তানং অঞ্ঞতিত্থিযানং সেট্ঠো উত্তমো বুদ্ধো আগতোতি সম্বন্ধো. তস্স আগতস্স ভগৱতো তং ধম্মং সোস্সাম সুণিস্সামাতি অত্থো.

৬১৯. তেসং হাসপৰেতানন্তি হাসেহি সোমনস্সেহি পৰেতানং অভিভূতানং সমন্নাগতানং তেসং দেৱমনুস্সানং. লোকনাযকোতি লোকস্স নাযকো সগ্গমোক্খসম্পাপকো মম সদ্দং ময্হং সীহনাদং পকিত্তেসি পকাসেসি কথেসি, দীঘদস্সী অনাগতকালদস্সী মহামুনি মুনীনমন্তৰে মহন্তো মুনি. সেসগাথা সুৱিঞ্ঞেয্যমেৱ.

৬২২. নামেন পদুমো নাম চক্কৱত্তী হুত্ৱা চতুসট্ঠিযা জাতিযা ইস্সৰিযং ইস্সৰভাৱং ৰজ্জং কাৰযিস্সতীতি অত্থো.

৬২৩. কপ্পসতসহস্সম্হীতি সাম্যত্থে ভুম্মৱচনং, কপ্পসতসহস্সানং পৰিযোসানেতি অত্থো.

৬২৪. পকাসিতে পাৱচনেতি তেন গোতমেন ভগৱতা পিটকত্তযে পকাসিতে দেসিতেতি অত্থো. ব্ৰহ্মবন্ধু ভৱিস্সতীতি তদা গোতমস্স ভগৱতো কালে অযং সীহো মিগৰাজা ব্ৰাহ্মণকুলে নিব্বত্তিস্সতীতি অত্থো. ব্ৰহ্মঞ্ঞা অভিনিক্খম্মাতি ব্ৰাহ্মণকুলতো নিক্খমিত্ৱা তস্স ভগৱতো সাসনে পব্বজিস্সতীতি সম্বন্ধো.

৬২৫. পধানপহিতত্তোতি ৱীৰিযকৰণত্থং পেসিতচিত্তো. উপধিসঙ্খাতানং কিলেসানং অভাৱেন নিৰুপধি. কিলেসদৰথানং অভাৱেন উপসন্তো. সব্বাসৱে সকলাসৱে পৰিঞ্ঞায পহায অনাসৱো নিক্কিলেসো নিব্বাযিস্সতি খন্ধপৰিনিব্বানেন নিব্বুতো ভৱিস্সতীতি অত্থো.

৬২৬. ৱিজনে পন্তসেয্যম্হীতি জনসম্বাধৰহিতে দূৰাৰঞ্ঞসেনাসনেতি অত্থো. ৱাড়মিগসমাকুলেতি কাড়সীহাদীহি চণ্ডমিগসঙ্গেহি আকুলে সংকিণ্ণেতি অত্থো. সেসং ৱুত্তত্থমেৱাতি.

পিণ্ডোলভাৰদ্ৱাজত্থেৰঅপদানৱণ্ণনা সমত্তা.