৩. পঞ্হাপুচ্ছকৱণ্ণনা

৪২৭. পঞ্হাপুচ্ছকে পাড়িঅনুসাৰেনেৱ সম্মপ্পধানানং কুসলাদিভাৱো ৱেদিতব্বো. আৰম্মণত্তিকেসু পন সব্বানিপি এতানি অপ্পমাণং নিব্বানং আৰব্ভ পৱত্তিতো অপ্পমাণাৰম্মণানেৱ, ন মগ্গাৰম্মণানি; সহজাতহেতুৱসেন পন মগ্গহেতুকানি; ৱীমংসং জেট্ঠকং কত্ৱা মগ্গভাৱনাকালে মগ্গাধিপতীনি; ছন্দচিত্তজেট্ঠিকায মগ্গভাৱনায ন ৱত্তব্বানি মগ্গাধিপতীনীতি; ৱীৰিযজেট্ঠিকায পন অঞ্ঞস্স ৱীৰিযস্স অভাৱা ন ৱত্তব্বানি মগ্গাধিপতীনীতি ৱা ন মগ্গাধিপতীনীতি ৱা; অতীতাদীসু একাৰম্মণভাৱেনপি ন ৱত্তব্বানি; নিব্বানস্স পন বহিদ্ধাধম্মত্তা বহিদ্ধাৰম্মণানি নাম হোন্তীতি. এৱমেতস্মিং পঞ্হাপুচ্ছকে নিব্বত্তিতলোকুত্তৰানেৱ সম্মপ্পধানানি কথিতানি. সম্মাসম্বুদ্ধেন হি সুত্তন্তভাজনীযস্মিংযেৱ লোকিযলোকুত্তৰমিস্সকা সম্মপ্পধানা কথিতা; অভিধম্মভাজনীযপঞ্হাপুচ্ছকেসু পন লোকুত্তৰাযেৱাতি. এৱমযং সম্মপ্পধানৱিভঙ্গোপি তেপৰিৱট্টং নীহৰিত্ৱাৱ ভাজেত্ৱা দস্সিতোতি.

সম্মোহৱিনোদনিযা ৱিভঙ্গট্ঠকথায

সম্মপ্পধানৱিভঙ্গৱণ্ণনা নিট্ঠিতা.