৩. পঞ্হাপুচ্ছকৱণ্ণনা

৩৮৬. পঞ্হাপুচ্ছকে পাড়িঅনুসাৰেনেৱ সতিপট্ঠানানং কুসলাদিভাৱো ৱেদিতব্বো. আৰম্মণত্তিকেসু পন সব্বানিপি এতানি অপ্পমাণং নিব্বানং আৰব্ভ পৱত্তনতো অপ্পমাণাৰম্মণানেৱ, ন মগ্গাৰম্মণানি; সহজাতহেতুৱসেন পন মগ্গহেতুকানি; ৱীৰিযং ৱা ৱীমংসং ৱা জেট্ঠকং কত্ৱা মগ্গভাৱনাকালে মগ্গাধিপতীনি; ছন্দচিত্তজেট্ঠকায মগ্গভাৱনায নৱত্তব্বানি মগ্গাধিপতীনীতি ফলকালেপি নৱত্তব্বানেৱ; অতীতাদীসু একাৰম্মণভাৱেনপি নৱত্তব্বানি; নিব্বানস্স পন বহিদ্ধাধম্মত্তা বহিদ্ধাৰম্মণানি নাম হোন্তীতি. এৱমেতস্মিং পঞ্হাপুচ্ছকে নিব্বত্তিতলোকুত্তৰানেৱ সতিপট্ঠানানি কথিতানি. সম্মাসম্বুদ্ধেন হি সুত্তন্তভাজনীযস্মিংযেৱ লোকিযলোকুত্তৰমিস্সকা সতিপট্ঠানা কথিতা; অভিধম্মভাজনীযপঞ্হাপুচ্ছকেসু পন লোকুত্তৰাযেৱাতি. এৱমযং সতিপট্ঠানৱিভঙ্গোপি তেপৰিৱট্টং নীহৰিত্ৱা ভাজেত্ৱা দস্সিতোতি.

সম্মোহৱিনোদনিযা ৱিভঙ্গট্ঠকথায

সতিপট্ঠানৱিভঙ্গৱণ্ণনা নিট্ঠিতা.