২. অভিধম্মভাজনীযৱণ্ণনা

৩৭৪. অভিধম্মভাজনীযে লোকুত্তৰসতিপট্ঠানৱসেন দেসনায আৰদ্ধত্তা যথা কাযাদিআৰম্মণেসু লোকিযসতিপট্ঠানেসু তন্তি ঠপিতা, এৱং অট্ঠপেত্ৱা সব্বানিপি কাযানুপস্সাদীনি সতিপট্ঠানানি ধম্মসঙ্গণিযং (ধ. স. ৩৫৫ আদযো) ৱিভত্তস্স দেসনানযস্স মুখমত্তমেৱ দস্সেন্তেন নিদ্দিট্ঠানি.

তত্থ নযভেদো ৱেদিতব্বো. কথং? কাযানুপস্সনায তাৱ সোতাপত্তিমগ্গে ঝানাভিনিৱেসে সুদ্ধিকপটিপদা, সুদ্ধিকসুঞ্ঞতা, সুঞ্ঞতপটিপদা, সুদ্ধিকঅপ্পণিহিতং, অপ্পণিহিতপটিপদাতি ইমেসু পঞ্চসু ঠানেসু দ্ৱিন্নং দ্ৱিন্নং চতুক্কপঞ্চকনযানং ৱসেন দস নযা হোন্তি. এৱং সেসেসুপীতি ৱীসতিযা অভিনিৱেসেসু দ্ৱে নযসতানি. তানি চতূহি অধিপতীহি চতুগুণিতানি অট্ঠ. ইতি সুদ্ধিকানি দ্ৱে সাধিপতীনি অট্ঠাতি সব্বম্পি নযসহস্সং হোতি. তথা ৱেদনানুপস্সনাদীসু সুদ্ধিকসতিপট্ঠানে চাতি সোতাপত্তিমগ্গে পঞ্চ নযসহস্সানি. যথা চ সোতাপত্তিমগ্গে, এৱং সেসমগ্গেসুপীতি কুসলে ৱীসতি নযসহস্সানি; সুঞ্ঞতাপণিহিতানিমিত্তাদিভেদেসু পন ততো তিগুণে ৱিপাকে সট্ঠি নযসহস্সানীতি. এৱমেৱ সকিচ্চসাধকানঞ্চেৱ সংসিদ্ধিককিচ্চানঞ্চ কুসলৱিপাকসতিপট্ঠানানং নিদ্দেসৱসেন দুৱিধো কাযানুপস্সনাদিৱসেন চ সুদ্ধিকৱসেন চ কুসলে পঞ্চন্নং ৱিপাকে পঞ্চন্নন্তি দসন্নং নিদ্দেসৱাৰানং ৱসেন দসপ্পভেদো অসীতিনযসহস্সপতিমণ্ডিতো অভিধম্মভাজনীযনিদ্দেসো.