৩. পঞ্হাপুচ্ছকৱণ্ণনা

২১৫. পঞ্হাপুচ্ছকে চতুন্নম্পি সচ্চানং খন্ধৱিভঙ্গে ৱুত্তনযানুসাৰেনেৱ কুসলাদিভাৱো ৱেদিতব্বো. আৰম্মণত্তিকেসু পন সমুদযসচ্চং কামাৱচৰধম্মে অস্সাদেন্তস্স পৰিত্তাৰম্মণং হোতি, মহগ্গতধম্মে অস্সাদেন্তস্স মহগ্গতাৰম্মণং, পঞ্ঞত্তিং অস্সাদেন্তস্স নৱত্তব্বাৰম্মণং. দুক্খসচ্চং কামাৱচৰধম্মে আৰব্ভ উপ্পন্নং পৰিত্তাৰম্মণং, ৰূপাৰূপাৱচৰধম্মে আৰব্ভ উপ্পত্তিকালে মহগ্গতাৰম্মণং, নৱ লোকুত্তৰধম্মে পচ্চৱেক্খণকালে অপ্পমাণাৰম্মণং, পণ্ণত্তিং পচ্চৱেক্খণকালে নৱত্তব্বাৰম্মণং. মগ্গসচ্চং সহজাতহেতুৱসেন সব্বদাপি মগ্গহেতুকং ৱীৰিযং ৱা ৱীমংসং ৱা জেট্ঠকং কত্ৱা মগ্গভাৱনাকালে মগ্গাধিপতি, ছন্দচিত্তেসু অঞ্ঞতৰাধিপতিকালে নৱত্তব্বং নাম হোতি. দুক্খসচ্চং অৰিযানং মগ্গপচ্চৱেক্খণকালে মগ্গাৰম্মণং, তেসংযেৱ মগ্গং গৰুং কত্ৱা পচ্চৱেক্খণকালে মগ্গাধিপতি, সেসধম্মপচ্চৱেক্খণকালে নৱত্তব্বং হোতি.

দ্ৱে সচ্চানীতি দুক্খসমুদযসচ্চানি. এতানি হি অতীতাদিভেদে ধম্মে আৰব্ভ উপ্পত্তিকালে অতীতাদিআৰম্মণানি হোন্তি. সমুদযসচ্চং অজ্ঝত্তাদিভেদে ধম্মে অস্সাদেন্তস্স অজ্ঝত্তাদিআৰম্মণং হোতি, দুক্খসচ্চং আকিঞ্চঞ্ঞাযতনকালে নৱত্তব্বাৰম্মণম্পীতি ৱেদিতব্বং. ইতি ইমস্মিং পঞ্হাপুচ্ছকে দ্ৱে সচ্চানি লোকিযানি হোন্তি, দ্ৱে লোকুত্তৰানি. যথা চ ইমস্মিং, এৱং পুৰিমেসুপি দ্ৱীসু. সম্মাসম্বুদ্ধেন হি তীসুপি সুত্তন্তভাজনীযাদীসু লোকিযলোকুত্তৰানেৱ সচ্চানি কথিতানি. এৱমযং সচ্চৱিভঙ্গোপি তেপৰিৱট্টং নীহৰিত্ৱাৱ ভাজেত্ৱা দস্সিতোতি.

সম্মোহৱিনোদনীযা ৱিভঙ্গট্ঠকথায

সচ্চৱিভঙ্গৱণ্ণনা নিট্ঠিতা.