২. অভিধম্মভাজনীযৱণ্ণনা

২০৬-২১৪. ইদানি অভিধম্মভাজনীযং হোতি. তত্থ ‘‘অৰিযসচ্চানী’’তি অৱত্ৱা নিপ্পদেসতো পচ্চযসঙ্খাতং সমুদযং দস্সেতুং ‘‘চত্তাৰি সচ্চানী’’তি ৱুত্তং. অৰিযসচ্চানীতি হি ৱুত্তে অৱসেসা চ কিলেসা, অৱসেসা চ অকুসলা ধম্মা, তীণি চ কুসলমূলানি সাসৱানি, অৱসেসা চ সাসৱা কুসলা ধম্মা ন সঙ্গয্হন্তি. ন চ কেৱলং তণ্হাৱ দুক্খং সমুদানেতি, ইমেপি অৱসেসা চ কিলেসাদযো পচ্চযা সমুদানেন্তিযেৱ. ইতি ইমেপি পচ্চযা দুক্খং সমুদানেন্তিযেৱাতি নিপ্পদেসতো পচ্চযসঙ্খাতং সমুদযং দস্সেতুং ‘‘অৰিযসচ্চানী’’তি অৱত্ৱা ‘‘চত্তাৰি সচ্চানী’’তি ৱুত্তং.

নিদ্দেসৱাৰে চ নেসং পঠমং দুক্খং অনিদ্দিসিত্ৱা তস্সেৱ দুক্খস্স সুখনিদ্দেসত্থং দুক্খসমুদযো নিদ্দিট্ঠো. তস্মিঞ্হি নিদ্দিট্ঠে ‘‘অৱসেসা চ কিলেসা’’তিআদিনা নযেন দুক্খসচ্চং সুখনিদ্দেসং হোতি. নিৰোধসচ্চম্পেত্থ তণ্হায পহানং ‘‘তণ্হায চ অৱসেসানঞ্চ কিলেসানং পহান’’ন্তি এৱং যথাৱুত্তস্স সমুদযস্স পহানৱসেন পঞ্চহাকাৰেহি নিদ্দিট্ঠং. মগ্গসচ্চং পনেত্থ পঠমজ্ঝানিকসোতাপত্তিমগ্গৱসেন ধম্মসঙ্গণিযং ৱিভত্তস্স দেসনানযস্স মুখমত্তমেৱ দস্সেন্তেন নিদ্দিট্ঠং. তত্থ নযভেদো ৱেদিতব্বো. তং উপৰি পকাসযিস্সাম.

যস্মা পন ন কেৱলং অট্ঠঙ্গিকো মগ্গোৱ পটিপদা ‘‘পুব্বেৱ খো পনস্স কাযকম্মং ৱচীকম্মং আজীৱো সুপৰিসুদ্ধো হোতী’’তি (ম. নি. ৩.৪৩৩) ৱচনতো পন পুগ্গলজ্ঝাসযৱসেন পঞ্চঙ্গিকোপি মগ্গো পটিপদা এৱাতি দেসিতো, তস্মা তং নযং দস্সেতুং পঞ্চঙ্গিকৱাৰোপি নিদ্দিট্ঠো. যস্মা চ ন কেৱলং অট্ঠঙ্গিকপঞ্চঙ্গিকমগ্গাৱ পটিপদা, সম্পযুত্তকা পন অতিৰেকপঞ্ঞাসধম্মাপি পটিপদা এৱ, তস্মা তং নযং দস্সেতুং ততিযো সব্বসঙ্গাহিকৱাৰোপি নিদ্দিট্ঠো. তত্থ ‘‘অৱসেসা ধম্মা দুক্খনিৰোধগামিনিযা পটিপদায সম্পযুত্তা’’তি ইদং পৰিহাযতি. সেসং সব্বত্থ সদিসমেৱ.

তত্থ অট্ঠঙ্গিকৱাৰস্স ‘‘তণ্হায অৱসেসানঞ্চ কিলেসানং পহান’’ন্তিআদীসু পঞ্চসু কোট্ঠাসেসু পঠমকোট্ঠাসে তাৱ সোতাপত্তিমগ্গে ঝানাভিনিৱেসে সুদ্ধিকপটিপদা, সুদ্ধিকসুঞ্ঞতা, সুঞ্ঞতপটিপদা, সুদ্ধিকঅপ্পণিহিতং, অপ্পণিহিতপটিপদাতি ইমেসু পঞ্চসু ৱাৰেসু দ্ৱিন্নং দ্ৱিন্নং চতুক্কপঞ্চকনযানং ৱসেন দস নযা হোন্তি. এৱং সেসেসুপীতি ৱীসতিযা অভিনিৱেসেসু দ্ৱে নযসতানি. তানি চতূহি অধিপতীহি চতুগ্গুণিতানি অট্ঠ. ইতি সুদ্ধিকানি দ্ৱে সাধিপতী অট্ঠাতি সব্বম্পি নযসহস্সং হোতি. যথা চ সোতাপত্তিমগ্গে, এৱং সেসমগ্গেসুপীতি চত্তাৰি নযসহস্সানি হোন্তি. যথা চ পঠমকোট্ঠাসে চত্তাৰি, এৱং সেসেসুপীতি অট্ঠঙ্গিকৱাৰে পঞ্চসু কোট্ঠাসেসু ৱীসতি নযসহস্সানি হোন্তি. তথা পঞ্চঙ্গিকৱাৰে সব্বসঙ্গাহিকৱাৰে চাতি সব্বানিপি সট্ঠি নযসহস্সানি সত্থাৰা ৱিভত্তানি. পাড়ি পন সঙ্খেপেন আগতা. এৱমিদং তিৱিধমহাৱাৰং পঞ্চদসকোট্ঠাসং সট্ঠিনযসহস্সপটিমণ্ডিতং অভিধম্মভাজনীযং নাম নিদ্দিট্ঠন্তি ৱেদিতব্বং.

অভিধম্মভাজনীযৱণ্ণনা.