২. সমুদযসচ্চনিদ্দেসৱণ্ণনা

২০৩. সমুদযসচ্চনিদ্দেসে যাযং তণ্হাতি যা অযং তণ্হা. পোনোব্ভৱিকাতি পুনব্ভৱকৰণং পুনোব্ভৱো, পুনোব্ভৱো সীলমস্সাতি পোনোব্ভৱিকা. অপিচ পুনব্ভৱং দেতি, পুনব্ভৱায সংৱত্ততি, পুনপ্পুনং ভৱে নিব্বত্তেতীতি পোনোব্ভৱিকা. সা পনেসা পুনব্ভৱস্স দাযিকাপি অত্থি অদাযিকাপি, পুনব্ভৱায সংৱত্তনিকাপি অত্থি অসংৱত্তনিকাপি, দিন্নায পটিসন্ধিযা উপধিৱেপক্কমত্তাপি. সা পুনব্ভৱং দদমানাপি অদদমানাপি, পুনব্ভৱায সংৱত্তমানাপি অসংৱত্তমানাপি, দিন্নায পটিসন্ধিযা উপধিৱেপক্কমত্তাপি পোনোব্ভৱিকা এৱাতি নামং লভতি. অভিনন্দনসঙ্খাতেন নন্দিৰাগেন সহগতাতি নন্দিৰাগসহগতা, নন্দিৰাগেন সদ্ধিং অত্থতো একত্তমেৱ গতাতি ৱুত্তং হোতি. তত্ৰতত্ৰাভিনন্দিনীতি যত্ৰ যত্ৰ অত্তভাৱো তত্ৰতত্ৰাভিনন্দিনী, ৰূপাদীসু ৱা আৰম্মণেসু তত্ৰতত্ৰাভিনন্দিনী; ৰূপাভিনন্দিনী সদ্দগন্ধৰসফোট্ঠব্বধম্মাভিনন্দিনীতি অত্থো. সেয্যথিদন্তি নিপাতো; তস্স সা কতমাতি চেতি অত্থো. কামতণ্হাতি কামে তণ্হা কামতণ্হা; পঞ্চকামগুণিকৰাগস্সেতং অধিৱচনং. ভৱে তণ্হা ভৱতণ্হা; ভৱপত্থনাৱসেন উপ্পন্নস্স সস্সতদিট্ঠিসহগতস্স ৰূপাৰূপভৱৰাগস্স চ ঝাননিকন্তিযা চেতং অধিৱচনং. ৱিভৱে তণ্হা ৱিভৱতণ্হা; উচ্ছেদদিট্ঠিসহগতস্স ৰাগস্সেতং অধিৱচনং.

ইদানি তস্সা তণ্হায ৱত্থুং ৱিত্থাৰতো দস্সেতুং সা খো পনেসাতিআদিমাহ. তত্থ উপ্পজ্জতীতি জাযতি. নিৱিসতীতি পুনপ্পুনং পৱত্তিৱসেন পতিট্ঠহতি. যং লোকে পিযৰূপং সাতৰূপন্তি যং লোকস্মিং পিযসভাৱঞ্চেৱ মধুৰসভাৱঞ্চ. চক্খুং লোকেতিআদীসু লোকস্মিঞ্হি চক্খাদীসু মমত্তেন অভিনিৱিট্ঠা সত্তা সম্পত্তিযং পতিট্ঠিতা অত্তনো চক্খুং আদাসাদীসু নিমিত্তগ্গহণানুসাৰেন ৱিপ্পসন্নপঞ্চপসাদং সুৱণ্ণৱিমানে উগ্ঘাটিতমণিসীহপঞ্জৰং ৱিয মঞ্ঞন্তি, সোতং ৰজতপনাড়িকং ৱিয পামঙ্গসুত্তকং ৱিয চ মঞ্ঞন্তি, তুঙ্গনাসাতি লদ্ধৱোহাৰং ঘানং ৱট্টেত্ৱা ঠপিতহৰিতালৱট্টিং ৱিয মঞ্ঞন্তি, জিৱ্হং ৰত্তকম্বলপটলং ৱিয মুদুসিনিদ্ধমধুৰৰসদং মঞ্ঞন্তি, কাযং সাললট্ঠিং ৱিয সুৱণ্ণতোৰণং ৱিয চ মঞ্ঞন্তি, মনং অঞ্ঞেসং মনেন অসদিসং উড়াৰং মঞ্ঞন্তি, ৰূপং সুৱণ্ণকণিকাৰপুপ্ফাদিৱণ্ণং ৱিয, সদ্দং মত্তকৰৱীককোকিলমন্দধমিতমণিৱংসনিগ্ঘোসং ৱিয, অত্তনা পটিলদ্ধানি চতুসমুট্ঠানিকগন্ধাৰম্মণাদীনি ‘কস্স অঞ্ঞস্স এৱৰূপানি অত্থী’তি মঞ্ঞন্তি. তেসং এৱং মঞ্ঞমানানং তানি চক্খাদীনি পিযৰূপানি চেৱ হোন্তি সাতৰূপানি চ. অথ নেসং তত্থ অনুপ্পন্না চেৱ তণ্হা উপ্পজ্জতি, উপ্পন্না চ পুনপ্পুনং পৱত্তিৱসেন নিৱিসতি. তস্মা ভগৱা – ‘‘চক্খুং লোকে পিযৰূপং সাতৰূপং. এত্থেসা তণ্হা উপ্পজ্জমানা উপ্পজ্জতী’’তিআদিমাহ. তত্থ উপ্পজ্জমানাতি যদা উপ্পজ্জতি তদা এত্থ উপ্পজ্জতীতি অত্থো. এস নযো সব্বত্থাপীতি.

সমুদযসচ্চনিদ্দেসৱণ্ণনা নিট্ঠিতা.