৩. পঞ্হাপুচ্ছকৱণ্ণনা

৭৪৭. পঞ্হাপুচ্ছকে পাড়িঅনুসাৰেনেৱ চতুন্নং পটিসম্ভিদানং কুসলাদিভাৱো ৱেদিতব্বো. আৰম্মণত্তিকেসু পন নিৰুত্তিপটিসম্ভিদা সদ্দমেৱ আৰম্মণং কৰোতীতি পৰিত্তাৰম্মণা. অত্থপটিসম্ভিদা কামাৱচৰৱিপাককিৰিযসঙ্খাতঞ্চেৱ পচ্চযসমুপ্পন্নঞ্চ অত্থং পচ্চৱেক্খন্তস্স পৰিত্তাৰম্মণা; ৱুত্তপ্পভেদমেৱ ৰূপাৱচৰাৰূপাৱচৰং অত্থং পচ্চৱেক্খন্তস্স মহগ্গতাৰম্মণা; লোকুত্তৰৱিপাকত্থঞ্চেৱ পৰমত্থঞ্চ নিব্বানং পচ্চৱেক্খন্তস্স অপ্পমাণাৰম্মণা. ধম্মপটিসম্ভিদা কামাৱচৰং কুসলধম্মং অকুসলধম্মং পচ্চযধম্মঞ্চ পচ্চৱেক্খন্তস্স পৰিত্তাৰম্মণা; ৰূপাৱচৰাৰূপাৱচৰং কুসলং ধম্মং পচ্চযধম্মঞ্চ পচ্চৱেক্খন্তস্স মহগ্গতাৰম্মণা; লোকুত্তৰং কুসলং ধম্মং পচ্চযধম্মঞ্চ পচ্চৱেক্খন্তস্স অপ্পমাণাৰম্মণা. পটিভানপটিসম্ভিদা কামাৱচৰকুসলৱিপাককিৰিযঞাণানি পচ্চৱেক্খন্তস্স পৰিত্তাৰম্মণা; ৰূপাৱচৰাৰূপাৱচৰানি কুসলৱিপাককিৰিযঞাণানি পচ্চৱেক্খন্তস্স তেসং আৰম্মণানি ৱিজানন্তস্স মহগ্গতাৰম্মণা; লোকুত্তৰানি কুসলৱিপাকঞাণানি পচ্চৱেক্খন্তস্স অপ্পমাণাৰম্মণা.

অত্থপটিসম্ভিদা সহজাতহেতুৱসেন সিযা মগ্গহেতুকা, ৱীৰিযজেট্ঠিকায মগ্গভাৱনায সিযা মগ্গাধিপতি, ছন্দচিত্তজেট্ঠিকায নৱত্তব্বা, ফলকালেপি নৱত্তব্বা এৱ. ধম্মপটিসম্ভিদা মগ্গং পচ্চৱেক্খণকালে মগ্গাৰম্মণা, মগ্গং গৰুং কত্ৱা পচ্চৱেক্খন্তস্স আৰম্মণাধিপতিৱসেন মগ্গাধিপতি. পটিভানপটিসম্ভিদা মগ্গঞাণং পচ্চৱেক্খণকালে মগ্গাৰম্মণা, মগ্গং গৰুং কত্ৱা পচ্চৱেক্খন্তস্স মগ্গাধিপতি, সেসঞাণং পঞ্চৱেক্খণকালে নৱত্তব্বাৰম্মণা. নিৰুত্তিপটিসম্ভিদা পচ্চুপ্পন্নমেৱ সদ্দং আৰম্মণং কৰোতীতি পচ্চুপ্পন্নাৰম্মণা.

অত্থপটিসম্ভিদা অতীতং ৱিপাকত্থং কিৰিযত্থং পচ্চযসমুপ্পন্নঞ্চ পচ্চৱেক্খন্তস্স অতীতাৰম্মণা, অনাগতং পচ্চৱেক্খন্তস্স অনাগতাৰম্মণা, পচ্চুপ্পন্নং পচ্চৱেক্খন্তস্স পচ্চুপ্পন্নাৰম্মণা, লোকুত্তৰং পৰমত্থং পচ্চৱেক্খন্তস্স নৱত্তব্বাৰম্মণা. ধম্মপটিসম্ভিদা অতীতং কুসলং অকুসলং পচ্চযধম্মঞ্চ পচ্চৱেক্খন্তস্স অতীতাৰম্মণা, অনাগতং পচ্চৱেক্খন্তস্স অনাগতাৰম্মণা, পচ্চুপ্পন্নং পচ্চৱেক্খন্তস্স পচ্চুপ্পন্নাৰম্মণা. পটিভানপটিসম্ভিদা অতীতং কুসলঞাণং ৱিপাকঞাণং কিৰিযঞাণঞ্চ পচ্চৱেক্খন্তস্স অতীতাৰম্মণা, অনাগতং পচ্চৱেক্খন্তস্স অনাগতাৰম্মণা, পচ্চুপ্পন্নং পচ্চৱেক্খন্তস্স পচ্চুপ্পন্নাৰম্মণা.

নিৰুত্তিপটিসম্ভিদা সদ্দাৰম্মণত্তা বহিদ্ধাৰম্মণা. ইতৰাসু তীসু অত্থপটিসম্ভিদা অজ্ঝত্তং ৱিপাকত্থং কিৰিযত্থং পচ্চযসমুপ্পন্নঞ্চ পচ্চৱেক্খন্তস্স অজ্ঝত্তাৰম্মণা, বহিদ্ধা পচ্চৱেক্খন্তস্স বহিদ্ধাৰম্মণা, অজ্ঝত্তবহিদ্ধা পচ্চৱেক্খন্তস্স অজ্ঝত্তবহিদ্ধাৰম্মণা, পৰমত্থং পচ্চৱেক্খন্তস্স বহিদ্ধাৰম্মণা এৱ. ধম্মপটিসম্ভিদা অজ্ঝত্তং কুসলাকুসলং পচ্চযধম্মং পচ্চৱেক্খণকালে অজ্ঝত্তাৰম্মণা, বহিদ্ধা কুসলাকুসলং পচ্চযধম্মং পচ্চৱেক্খণকালে বহিদ্ধাৰম্মণা, অজ্ঝত্তবহিদ্ধা কুসলাকুসলং পচ্চযধম্মং পচ্চৱেক্খণকালে অজ্ঝত্তবহিদ্ধাৰম্মণা. পটিভানপটিসম্ভিদা অজ্ঝত্তং কুসলৱিপাককিৰিযঞাণং পচ্চৱেক্খণকালে অজ্ঝত্তাৰম্মণা, বহিদ্ধা…পে… অজ্ঝত্তবহিদ্ধা কুসলৱিপাককিৰিযঞাণং পচ্চৱেক্খণকালে অজ্ঝত্তবহিদ্ধাৰম্মণাতি.

ইধাপি তিস্সো পটিসম্ভিদা লোকিযা; অত্থপটিসম্ভিদা লোকিযলোকুত্তৰা. ইমস্মিঞ্হি পটিসম্ভিদাৱিভঙ্গে সম্মাসম্বুদ্ধেন তযোপি নযা লোকিযলোকুত্তৰমিস্সকত্তা একপৰিচ্ছেদাৱ কথিতা. তীসুপি হি এতাসু তিস্সো পটিসম্ভিদা লোকিযা, অত্থপটিসম্ভিদা লোকিযলোকুত্তৰাতি. এৱমযং পটিসম্ভিদাৱিভঙ্গোপি তেপৰিৱট্টং নীহৰিত্ৱাৱ ভাজেত্ৱা দস্সিতোতি.

সম্মোহৱিনোদনিযা ৱিভঙ্গট্ঠকথায

পটিসম্ভিদাৱিভঙ্গৱণ্ণনা নিট্ঠিতা.