৪. জহতিকথা

১. নসুত্তাহৰণকথাৱণ্ণনা

২৭৯. ইদানি জহতিকথা নাম হোতি. তত্থ যেসং ‘‘ঝানলাভী পুথুজ্জনো সহ সচ্চাভিসমযা অনাগামী নাম হোতি, তস্স পুথুজ্জনকালেযেৱ কামৰাগব্যাপাদা পহীনা’’তি লদ্ধি সেয্যথাপি এতৰহি সম্মিতিযানং, তেসং তং লদ্ধিং ভিন্দিতুং জহতি পুথুজ্জনোতি পুচ্ছা সকৱাদিস্স, ঝানৱিক্খম্ভিতানং পন তেসং পৰিযুট্ঠানং অপস্সন্তস্স পটিঞ্ঞা পৰৱাদিস্স. যস্মা পন তেসং ঝানৱিক্খম্ভিতানম্পি অনাগামিমগ্গেনেৱ অচ্চন্তং পহানং হোতি, তস্মা পুন অচ্চন্তন্তিআদিঅনুযোগো সকৱাদিস্স, তথাৰূপস্স পহানস্স অভাৱতো পটিক্খেপো ইতৰস্স. ৱিক্খম্ভেতীতি অচ্চন্তৱিক্খম্ভনমেৱ সন্ধায পুচ্ছা সকৱাদিস্স. ততো পৰং অনাগামিমগ্গট্ঠেন সদ্ধিং পুথুজ্জনসংসন্দনং হোতি. তং উত্তানত্থমেৱ.

২৮০. ততো পৰং অনাগামিফলে সণ্ঠাতীতি পুট্ঠো ঝানানাগামিতং সন্ধায পটিজানাতি. অৰহত্তে সণ্ঠাতীতি পুট্ঠো দস্সনমগ্গেন উদ্ধম্ভাগিযানং পহানাভাৱতো পটিক্খিপতি.

অপুব্বং অচৰিমং তযো মগ্গেতি পুট্ঠো তথাৰূপায ভাৱনায অভাৱা পটিক্খিপতি. পুন পুট্ঠো তিণ্ণং মগ্গানং কিচ্চসব্ভাৱং সন্ধায পটিজানাতি. সামঞ্ঞফলপুচ্ছাসুপি এসেৱ নযো. কতমেন মগ্গেনাতি পুট্ঠো অনাগামিমগ্গেনাতি ঝানানাগামিতং সন্ধায ৱদতি. পুন সংযোজনপ্পহানং পুট্ঠো তিণ্ণং অনাগামিমগ্গেন তেসং কিলেসানং অপ্পহেয্যত্তা পটিক্খিপতি. দুতিযং পুট্ঠো পঠমমগ্গস্সেৱ ঝানানাগামিমগ্গভাৱং সন্ধায পটিজানাতি. সেসমেত্থ উত্তানত্থমেৱাতি.

জহতিকথা.