৪. তিকদুকপট্ঠানৱণ্ণনা

তিকদুকপট্ঠানেপি কুসলং হেতুং ধম্মং পটিচ্চ কুসলো হেতু ধম্মো উপ্পজ্জতি হেতুপচ্চযাতি পঞ্হামত্তুদ্ধাৰৱসেনেৱ দেসনা কতা. তত্থ যথা হেট্ঠা হেতুদুকেন সদ্ধিং কুসলপদং যোজেত্ৱা সব্বপচ্চযৱসেন সব্বৱাৰেসু সঙ্খেপতো দেসনা কতা, এৱমিধ কুসলত্তিকেন সদ্ধিং হেতুপদং যোজেত্ৱা সব্বপচ্চযৱসেন সব্বৱাৰেসু সঙ্খেপতো দেসনা কতা. যথা চ হেতুপদং, এৱং নহেতুপদম্পি কুসলত্তিকেন সদ্ধিং যোজেত্ৱা কুসলত্তিকহেতুদুকং নিট্ঠাপিতং. ততো পৰং সুখায ৱেদনায সম্পযুত্তং হেতুং ধম্মন্তিআদিনা নযেন ৱেদনাত্তিকহেতুদুকাদীনি একৱীসতি তিকদুকানি দস্সিতানি.

এৱং বাৱীসতিযা তিকেহি সদ্ধিং হেতুদুকং যোজেত্ৱা পুন তেহিযেৱ সদ্ধিং সহেতুকদুকাদযো সৰণদুকপৰিযোসানা লব্ভমানৱসেন সব্বদুকা যোজিতা. ইধাপি যং যং পদং যোজনং ন গচ্ছতি, তং তং পাড়িযংযেৱ পটিক্খিত্তং. এৱং দুকসতং গহেত্ৱা দ্ৱাৱীসতিযা তিকেসু পক্খিপিত্ৱা তিকদুকপট্ঠানং নাম দেসিতং. তত্ৰাপি যেন যেন নযেন পাড়ি সঙ্খিত্তা, সো সো নযো ৱিত্থাৰতো ৱেদিতব্বো.

তিকদুকপট্ঠানৱণ্ণনা.