৩. ব্ৰহ্মচৰিযকথা

১. সুদ্ধব্ৰহ্মচৰিযকথাৱণ্ণনা

২৬৯. ইদানি ব্ৰহ্মচৰিযকথা হোতি. তত্থ দ্ৱে ব্ৰহ্মচৰিযৱাসা, মগ্গভাৱনা চ পব্বজ্জা চ. পব্বজ্জা সব্বদেৱেসু নত্থি. মগ্গভাৱনা ঠপেত্ৱা অসঞ্ঞসত্তে সেসেসু অপ্পটিসিদ্ধা. তত্থ যে পৰনিম্মিতৱসৱত্তিদেৱে উপাদায তদুপৰিদেৱেসু মগ্গভাৱনম্পি ন ইচ্ছন্তি সেয্যথাপি সম্মিতিযা, তে সন্ধায নত্থি দেৱেসূতি পুচ্ছা সকৱাদিস্স. ‘‘তীহি, ভিক্খৱে, ঠানেহি জম্বুদীপকা মনুস্সা উত্তৰকুৰুকে চ মনুস্সে অধিগ্গণ্হন্তি দেৱে চ তাৱতিংসে. কতমেহি তীহি? সূৰা সতিমন্তো ইধ ব্ৰহ্মচৰিযৱাসো’’তি (অ. নি. ৯.২১) ইদং সুত্তং নিস্সায দ্ৱেপি ব্ৰহ্মচৰিযৱাসা নত্থি দেৱেসূতি উপ্পন্নলদ্ধিৱসেন পটিঞ্ঞা পৰৱাদিস্স. পুন দ্ৱিন্নম্পি ব্ৰহ্মচৰিযানং অন্তৰাযিকধম্মৱসেনেৱ সব্বে দেৱা জড়াতি পুচ্ছা সকৱাদিস্স. তত্থ হত্থসংৱাচিকাতি মূগা ৱিয হত্থমুদ্ধায ৱত্তাৰো. পৰতো অত্থি দেৱেসূতি পুচ্ছা পৰৱাদিস্স, মগ্গভাৱনং সন্ধায পটিঞ্ঞা সকৱাদিস্স. পটিঞ্ঞায অধিপ্পাযং অসল্লক্খেত্ৱা পব্বজ্জাৱসেন অনুযোগো পৰৱাদিস্স.

২৭০. যত্থ নত্থি পব্বজ্জাতি পঞ্হে গিহীনঞ্চেৱ একচ্চানঞ্চ দেৱানং মগ্গপটিলাভং সন্ধায পটিক্খেপো তস্সেৱ. পুন পুট্ঠো পচ্চন্তৱাসিনো চেৱ অসঞ্ঞসত্তে চ সন্ধায পটিঞ্ঞা তস্সেৱ. যো পব্বজতীতিআদীসু পুচ্ছাসুপি এসেৱ নযো. পুন ‘‘অত্থি দেৱেসূ’’তি পঞ্হেপি মগ্গভাৱনং সন্ধাযেৱ পটিঞ্ঞা সকৱাদিস্স, ‘‘সব্বদেৱেসূ’’তি ৱুত্তে অসঞ্ঞসত্তে সন্ধায পটিক্খেপো তস্সেৱ.

২৭১. মনুস্সেসূতি পঞ্হদ্ৱযে জম্বুদীপকে সন্ধায পটিঞ্ঞা. পচ্চন্তৱাসিনো সন্ধায পটিক্খেপো ৱেদিতব্বো.

অত্থি যত্থ অত্থীতি অত্থি তে দেৱা, অত্থি ৱা সো পদেসো, যত্থ অত্থীতি এৱং সত্তপদেসৱিভাগমুখেন ৱিস্সজ্জনং সকৱাদিস্স. ইমিনা নযেন সব্বে একন্তৰিকপঞ্হা ৱেদিতব্বা.

২৭২. সুত্তানুযোগে কুহিং ফলুপ্পত্তীতি তস্স অনাগামিনো অৰহত্তফলুপ্পত্তি কুহিন্তি পুচ্ছা সকৱাদিস্স. তত্থেৱাতি সুদ্ধাৱাসেসূতি অত্থো.

হন্দ হীতি কাৰণত্থে নিপাতো. ইদং ৱুত্তং হোতি – যস্মা অনাগামিপুগ্গলো ইধ লোকে ভাৱিতেন মগ্গেন তত্থ সুদ্ধাৱাসেসু ফলং সচ্ছিকৰোতি, ন তত্থ অঞ্ঞং মগ্গং ভাৱেতি, তস্মা নত্থি দেৱেসু ব্ৰহ্মচৰিযৱাসোতি.

২. সংসন্দনব্ৰহ্মচৰিযৱণ্ণনা

২৭৩. ইদানি যদি অঞ্ঞত্থ ভাৱিতেন মগ্গেন অঞ্ঞত্থ ফলসচ্ছিকিৰিযা হোতি, সোতাপন্নাদীনম্পি সিযাতি এতমত্থং দস্সেতুং পুন অনাগামীতিআদীনং সংসন্দনপুচ্ছা সকৱাদিস্স. তত্থ অনাগামিস্স ফলসচ্ছিকিৰিযায পটিঞ্ঞা, সেসানং ফলসচ্ছিকিৰিযায পটিক্খেপো পৰৱাদিস্স. ইধ ভাৱিতমগ্গো হি অনাগামী ইধৱিহাযনিট্ঠো নাম হোতি. সো ইধ অনাগামিমগ্গং ভাৱেত্ৱা ‘‘ওপপাতিকো তত্থপৰিনিব্বাযী’’তি ৱচনতো ‘‘পুন মগ্গভাৱনং ৱিনা উপপত্তিৱসেনেৱ অৰহত্তফলং সচ্ছিকৰোতী’’তি তস্স লদ্ধি. সোতাপন্নসকদাগামিনো পন তত্থ মগ্গং ভাৱেত্ৱা তত্ৰুপপত্তিকা নাম হোন্তীতি তেসং ইধাগমনঞ্ঞেৱ নত্থি. ইতি সো অনাগামিস্স ফলসচ্ছিকিৰিযং পুট্ঠো পটিজানাতি. ইতৰেসং পটিক্খিপতি.

অনাগামী পুগ্গলো তত্থ ভাৱিতেন মগ্গেনাতি পঞ্হে ‘‘অনাগামিনো তত্থ মগ্গভাৱনাৱ নত্থী’’তি লদ্ধিযা পটিক্খিপতি. মগ্গো চ ভাৱীযতি, ন চ কিলেসা পহীযন্তীতি পুচ্ছা সকৱাদিস্স, ৰূপাৱচৰমগ্গং সন্ধায পটিঞ্ঞা ইতৰস্স. ৰূপাৱচৰমগ্গেন হি সো ইধৱিহাযনিট্ঠো নাম জাতো.

অনাগামী পুগ্গলো কতকৰণীযোতি পঞ্হে ‘‘ওপপাতিকো তত্থপৰিনিব্বাযী’’তি ৱচনতো উপপত্তিযাৱস্স কতকৰণীযাদিভাৱং সন্ধায পটিজানাতি. অৰহাতি পঞ্হে ইধপৰিনিব্বাযিনো অৰহতো ৱসেনেৱ পটিক্খিপতি. পুন পুট্ঠো তত্থপৰিনিব্বাযিনো ৱসেন পটিজানাতি.

অত্থি অৰহতো পুনব্ভৱোতিআদীসুপি তত্থপৰিনিব্বাযী ইধপৰিনিব্বাযীনং ৱসেনেৱ অত্থো ৱেদিতব্বো. অপ্পটিৱিদ্ধাকুপ্পোৱ তত্থপৰিনিব্বাযতীতি পুট্ঠো ইধেৱ ভাৱিতেন মগ্গেন তস্স অকুপ্পপটিৱেধং ইচ্ছন্তো পটিক্খিপতি.

যথা মিগোতি পঠমং উদাহৰণং পৰৱাদিস্স, দুতিযং সকৱাদিস্স. সেসং সব্বত্থ উত্তানত্থমেৱাতি.

ব্ৰহ্মচৰিযকথা নিট্ঠিতা.

৩. ওধিসোকথাৱণ্ণনা

২৭৪. ইদানি ওধিসোকথা নাম হোতি. তত্থ যে সোতাপন্নাদীনং নানাভিসমযৱসেন দুক্খদস্সনাদীহি ওধিসো ওধিসো একদেসেন একদেসেন কিলেসপ্পহানং ইচ্ছন্তি সেয্যথাপি এতৰহি সম্মিতিযাদযো, তেসং তং লদ্ধিং ভিন্দিতুং ওধিসোতি পুচ্ছা সকৱাদিস্স, পটিঞ্ঞা পৰৱাদিস্স. পুন অনুযোগো সকৱাদিস্স, একদেসেন সোতাপন্নাদিভাৱস্স অভাৱতো পটিক্খেপো পৰৱাদিস্স. ইমিনা উপাযেন সব্বৱাৰেসু অত্থো ৱেদিতব্বোতি.

ওধিসোকথাৱণ্ণনা.