৪. উপাদিন্নত্তিকৱণ্ণনা

৫১. উপাদিন্নুপাদানিযত্তিকস্স পঞ্হাৱাৰে ৱত্থু উপাদানিযানং খন্ধানং পুৰেজাতপচ্চযেন পচ্চযোতি পৱত্তিং সন্ধায ৱুত্তং. পটিসন্ধিযং পন তং পুৰেজাতং ন হোতি.

৭২. উপাদিন্নুপাদানিযো কবড়ীকাৰো আহাৰো উপাদিন্নুপাদানিযস্স কাযস্স আহাৰপচ্চযেন পচ্চযোতি এত্থ উপাদিন্নুপাদানিযো কবড়ীকাৰাহাৰো নাম কম্মসমুট্ঠানানং ৰূপানং অব্ভন্তৰগতা ওজা. উপাদিন্নুপাদানিযস্স কাযস্সাতি তস্সেৱ কম্মসমুট্ঠানৰূপকাযস্স আহাৰপচ্চযেন পচ্চযো. ৰূপজীৱিতিন্দ্ৰিযং ৱিয কটত্তাৰূপানং অনুপালনউপত্থম্ভনৱসেন পচ্চযো, ন জনকৱসেন. যং পন মণ্ডূকাদযো গিলিত্ৱা ঠিতানং অহিআদীনং কাযস্স জীৱমানকমণ্ডূকাদিসৰীৰে ওজা আহাৰপচ্চযেন পচ্চযোতি ৱদন্তি, তং ন গহেতব্বং. ন হি জীৱমানকসৰীৰে ওজা অঞ্ঞস্স সৰীৰস্স আহাৰপচ্চযতং সাধেতি. অনুপাদিন্নুপাদানিযস্স কাযস্সাতি এত্থ পন জনকৱসেনাপি লব্ভতি. উপাদিন্নুপাদানিযস্স চ অনুপাদিন্নুপাদানিযস্স চাতি এত্থ একস্স উপত্থম্ভকৱসেন, একস্স জনকৱসেন, উভিন্নম্পি ৱা উপত্থম্ভকৱসেনেৱ ৱুত্তো. দ্ৱে পন আহাৰা একতো পচ্চযা হোন্তা উপত্থম্ভকাৱ হোন্তি, ন জনকা. সেসমেত্থ পাড়িমেৱ সাধুকং ওলোকেত্ৱা ৱেদিতব্বং.

উপাদিন্নত্তিকৱণ্ণনা.