৩. আনেঞ্জকথাৱণ্ণনা

৮৯৬. ইদানি আনেঞ্জকথা নাম হোতি. তত্থ ভগৱা চতুত্থজ্ঝানে ঠিতো পৰিনিব্বাযীতি সল্লক্খেত্ৱা ‘‘অৰহা আনেঞ্জে ঠিতো পৰিনিব্বাযতী’’তি যেসং লদ্ধি, সেয্যথাপি একচ্চানং উত্তৰাপথকানং, তে সন্ধায পুচ্ছা সকৱাদিস্স, পটিঞ্ঞা ইতৰস্স. পকতিচিত্তেতি ভৱঙ্গচিত্তে. সব্বে হি সঞ্ঞিনো সত্তা ভৱঙ্গচিত্তে ঠত্ৱা ভৱঙ্গপৰিযোসানেন চুতিচিত্তেন কালং কৰোন্তি. ইতি নং ইমিনা অত্থেন চোদেতুং এৱমাহ. তত্থ কিঞ্চাপি চতুৱোকাৰভৱে অৰহতো পকতিচিত্তম্পি আনেঞ্জং হোতি, অযং পন পঞ্হো পঞ্চৱোকাৰভৱৱসেন উদ্ধটো. তস্মা নো চ ৱত ৰে ৱত্তব্বেতি আহ. সেসমেত্থ উত্তানত্থমেৱাতি.

আনেঞ্জকথাৱণ্ণনা.