৩. সঞ্ঞোজনকথাৱণ্ণনা

৮৮১-৮৮২. ইদানি সঞ্ঞোজনকথা নাম হোতি. তত্থ যস্মা অৰহা সব্বং বুদ্ধৱিসযং ন জানাতি, তস্মা তস্স তত্থ অৱিজ্জাৱিচিকিচ্ছাহি অপ্পহীনাহি ভৱিতব্বন্তি সঞ্ঞায ‘‘অত্থি কিঞ্চি সঞ্ঞোজনং অপ্পহায অৰহত্তপ্পত্তী’’তি যেসং লদ্ধি, সেয্যথাপি মহাসঙ্ঘিকানং, তে সন্ধায পুচ্ছা সকৱাদিস্স, পটিঞ্ঞা ইতৰস্স. অত্থি কিঞ্চি সক্কাযদিট্ঠীতিআদি অৰহতো সব্বসংযোজনপ্পহানদস্সনত্থং ৱুত্তং. সব্বং বুদ্ধৱিসযন্তি পঞ্হদ্ৱযে অৰহতো সব্বঞ্ঞুতঞ্ঞাণাভাৱেন পটিসেধো কতো, ন অৱিজ্জাৱিচিকিচ্ছানং অপ্পহানেন. ইতৰো পন তেসং অপ্পহীনতং সন্ধায তেন হীতি লদ্ধিং পতিট্ঠপেতি. সা অযোনিসো পতিট্ঠাপিতত্তা অপ্পতিট্ঠিতাৱ হোতীতি.

সঞ্ঞোজনকথাৱণ্ণনা.