১১. দক্খিণাৱিসুদ্ধিকথাৱণ্ণনা

৮০০-৮০১. ইদানি দক্খিণাৱিসুদ্ধিকথা নাম হোতি. তত্থ ‘‘যদি পটিগ্গাহকতো দক্খিণা ৱিসুজ্ঝেয্য, মহপ্ফলা ভৱেয্য. দাযকেন দানং দিন্নং, পটিগ্গাহকেন ৱিপাকো নিব্বত্তিতোতি অঞ্ঞো অঞ্ঞস্স কাৰকো ভৱেয্য, পৰংকতং সুখদুক্খং আপজ্জেয্য, অঞ্ঞো কৰেয্য, অঞ্ঞো পটিসংৱেদেয্য. তস্মা দাযকতোৱ দানং ৱিসুজ্ঝতি, নো পটিগ্গাহকতো, দাযকস্সেৱ চিত্তৱিসুদ্ধি ৱিপাকদাযিকা হোতী’’তি যেসং লদ্ধি, সেয্যথাপি উত্তৰাপথকানং; তে সন্ধায পুচ্ছা সকৱাদিস্স, পটিঞ্ঞা ইতৰস্স. আহুনেয্যাতিআদি ‘‘যদি পটিগ্গাহকতো দানং ন ৱিসুজ্ঝেয্য, কিমস্স আহুনেয্যাদিভাৱো কৰেয্যা’’তি দস্সনত্থং ৱুত্তং. অঞ্ঞো অঞ্ঞস্স কাৰকোতি যদি দাযকস্স দানচেতনা পটিগ্গাহকেন কতা ভৱেয্য, যুত্তৰূপং সিযা. তস্স পন দানচেতনা পৰিসুদ্ধা পটিগ্গাহকসঙ্খাতং ৱত্থুং পটিচ্চ মহাৱিপাকট্ঠেন ৱিসুজ্ঝতি, তস্মা অচোদনা এসা ‘‘পটিগ্গাহকতো দানং ৱিসুজ্ঝতী’’তি.

দক্খিণাৱিসুদ্ধিকথাৱণ্ণনা.

সত্তৰসমো ৱগ্গো.