৭. পৰিযাপন্নকথাৱণ্ণনা

৭০৩-৭০৫. ইদানি পৰিযাপন্নকথা নাম হোতি. তত্থ যস্মা কামৰাগো কামধাতুং অনুসেতি, কামধাতুপৰিযাপন্নোতি চ ৱুচ্চতি, তস্মা ৰূপৰাগাৰূপৰাগাপি ৰূপধাতুঅৰূপধাতুযো অনুসেন্তি. ৰূপধাতুঅৰূপধাতুপৰিযাপন্নাযেৱ চ নাম হোন্তীতি যেসং লদ্ধি, সেয্যথাপি অন্ধকানঞ্চেৱ সম্মিতিযানঞ্চ; তে সন্ধায ৰূপৰাগোতি পুচ্ছা সকৱাদিস্স, পটিঞ্ঞা ইতৰস্স. তত্থ অনুসেতীতি যথা কামৰাগো কামৱিতক্কসঙ্খাতং কামধাতুং সহজাতৱসেন অনুসেতি, কিং তে এৱং ৰূপৰাগো ৰূপধাতুন্তি পুচ্ছতি. পৰিযাপন্নোতি যথা চ সো তিৱিধায কামধাতুযা কিলেসকামৱসেন পৰিযাপন্নত্তা কামধাতুপৰিযাপন্নো, কিং তে এৱং ৰূপৰাগোপি ৰূপধাতুপৰিযাপন্নোতি পুচ্ছতি. ইতৰো পনস্স অধিপ্পাযং অসল্লক্খেন্তো কেৱলং লদ্ধিৱসেন আমন্তাতি পটিজানাতি. অথ নং তমত্থং সল্লক্খাপেতুং কুসলৱিপাককিৰিযসঙ্খাতেহি সমাপত্তেসিযাদীহি সংসন্দিত্ৱা পুচ্ছিতুং সমাপত্তেসিযোতিআদিমাহ. সেসমেত্থ যথাপাড়িমেৱ নিয্যাতি. ননু কামৰাগোতিআদিৱচনম্পি কামৰাগস্সেৱ কামধাতুযং অনুসযভাৱং পৰিযাপন্নতঞ্চ দীপেতি, ন ইতৰেসং ইতৰধাতূসূতি.

পৰিযাপন্নকথাৱণ্ণনা.