৫. অঞ্ঞো অনুসযোতিকথাৱণ্ণনা

৭০০-৭০১. ইদানি অঞ্ঞো অনুসযোতিকথা নাম হোতি. তত্থ যস্মা পুথুজ্জনো কুসলাব্যাকতে চিত্তে ৱত্তমানে সানুসযোতি ৱত্তব্বো, ন পৰিযুট্ঠিতোতি তস্মা অঞ্ঞো অনুসযো, অঞ্ঞং পৰিযুট্ঠানন্তি যেসং লদ্ধি, সেয্যথাপি অন্ধকানং; তে সন্ধায অঞ্ঞো কামৰাগানুসযোতি পুচ্ছা সকৱাদিস্স পটিঞ্ঞা ইতৰস্স. সেসং হেট্ঠা অনুসযকথাযং ৱুত্তনযেনেৱ ৱেদিতব্বং. সানুসযোতিআদি পন তস্মিং সমযে অনুসযস্স অপ্পহীনত্তা সানুসযোতি ৱত্তব্বতং, অনুপ্পন্নত্তা চ পৰিযুট্ঠিতোতি অৱত্তব্বতং দীপেতি, ন অনুসযপৰিযুট্ঠানানং অঞ্ঞত্তং, তস্মা অসাধকন্তি.

অঞ্ঞো অনুসযোতিকথাৱণ্ণনা.