১. নিৰোধকথাৱণ্ণনা

৫৭১-৫৭২. ইদানি নিৰোধকথা নাম হোতি. তত্থ যেসং ‘‘উপপত্তেসিযন্তি সঙ্খং গতস্স ভৱঙ্গচিত্তস্স ভঙ্গক্খণেন সহেৱ কিৰিযাতি সঙ্খং গতা কুসলা ৱা অকুসলা ৱা চত্তাৰো খন্ধা চিত্তসমুট্ঠানৰূপঞ্চাতি পঞ্চক্খন্ধা উপ্পজ্জন্তি. তেসু হি অনুপ্পন্নেসু ভৱঙ্গে নিৰুদ্ধে সন্ততিৱিচ্ছেদো ভৱেয্যা’’তি লদ্ধি, সেয্যথাপি অন্ধকানং; তে সন্ধায উপপত্তেসিযেতি পুচ্ছা সকৱাদিস্স, পটিঞ্ঞা ইতৰস্স. তত্থ উপপত্তেসিযেতি চতূসুপি পদেসু বহুৱচনভুম্মত্থে একৱচনভুম্মং. উপপত্তেসিযেসু পঞ্চসু খন্ধেসু অনিৰুদ্ধেসূতি অযঞ্হেত্থ অত্থো. দসন্নন্তি উপপত্তেসিযখন্ধানঞ্চ কিৰিযখন্ধানঞ্চ ৱসেন ৱুত্তং. তত্থ পঠমপঞ্হে খন্ধলক্খণৱসেন কিৰিযৱসেন চ পঞ্চেৱ নাম তে খন্ধাতি পটিক্খিপতি. দুতিযপঞ্হে পুৰিমপচ্ছিমৱসেন উপপত্তেসিযকিৰিযৱসেন চ নানত্তং সন্ধায পটিজানাতি. দ্ৱিন্নং পন ফস্সানং চিত্তানঞ্চ সমোধানং পুট্ঠো সুত্তলেসাভাৱেন পটিক্খিপতি.

কিৰিযা চত্তাৰোতি ৰূপেন ৱিনা কুসলা অকুসলা ৱা চত্তাৰো গহিতা. কিৰিযাঞাণন্তি পৰৱাদিনা চক্খুৱিঞ্ঞাণসমঙ্গিক্খণে অৰহতো অনুঞ্ঞাতং অনাৰম্মণঞাণং. নিৰুদ্ধে মগ্গো উপ্পজ্জতীতি পুচ্ছা পৰৱাদিস্স, অনিৰুদ্ধে অনুপ্পজ্জনতো পটিঞ্ঞা সকৱাদিস্স. মতো মগ্গং ভাৱেতীতি ছলেন পুচ্ছা পৰৱাদিস্স. যস্মা পন পটিসন্ধিতো যাৱ চুতিচিত্তা সত্তো জীৱতিযেৱ নাম, তস্মা সকৱাদী ন হেৱন্তি পটিক্খিপতি.

নিৰোধকথাৱণ্ণনা.