৫. ৰূপধাতুকথাৱণ্ণনা

৫১৫-৫১৬. ইদানি ৰূপধাতুকথা নাম হোতি. তত্থ ‘‘ৰূপিনো ধম্মা ৰূপধাতু নামা’’তি যেসং লদ্ধি, সেয্যথাপি অন্ধকানং; তে সন্ধায ৰূপিনোতি পুচ্ছা সকৱাদিস্স, পটিঞ্ঞা ইতৰস্স. অথ নং সকৱাদী যস্মা ৰূপধাতু নাম ৰূপভৱো, ন ৰূপমত্তমেৱ, তস্মা তেনত্থেন চোদেতুং ৰূপধাতূতিআদিমাহ. তং সব্বং কামগুণকথাযং ৱুত্তনযেনেৱ ৱেদিতব্বং. সাৱ কামধাতূতি পুট্ঠো ভূমিপৰিচ্ছেদেন ৱিৰোধং পস্সমানো পটিক্খিপতি. পুন দড়্হং কত্ৱা পুট্ঠো অত্তনো লদ্ধিৱসেন পটিজানাতি. এৱং সন্তে পন দ্ৱীহি ভৱেহি সমন্নাগততা আপজ্জতি, তেন তং সকৱাদী কামভৱেন চাতি আদিমাহ. ইতৰো একস্স দ্ৱীহি সমন্নাগতাভাৱতো পটিক্খিপতীতি.

ৰূপধাতুকথাৱণ্ণনা.