৫. নিৰোধসমাপত্তিকথাৱণ্ণনা

৪৫৭-৪৫৯. ইদানি নিৰোধসমাপত্তিকথা নাম হোতি. তত্থ নিৰোধসমাপত্তীতি চতুন্নং খন্ধানং অপ্পৱত্তি. যস্মা পন সা কৰিযমানা কৰিযতি, সমাপজ্জিযমানা সমাপজ্জিযতি, তস্মা নিপ্ফন্নাতি ৱুচ্চতি. সঙ্খতাসঙ্খতলক্খণানং পন অভাৱেন ন ৱত্তব্বা ‘‘সঙ্খতাতি ৱা অসঙ্খতা’’তি ৱা. তত্থ যেসং ‘‘যস্মা সঙ্খতা ন হোতি, তস্মা অসঙ্খতা’’তি লদ্ধি, সেয্যথাপি অন্ধকানঞ্চেৱ উত্তৰাপথকানঞ্চ; তে সন্ধায নিৰোধসমাপত্তীতি পুচ্ছা সকৱাদিস্স, পটিঞ্ঞা ইতৰস্স. উপ্পাদেন্তীতিআদি সমাপজ্জনপটিলাভৱসেনেৱ ৱুত্তং. যথা পন ৰূপাদযো অসঙ্খতধম্মে উপ্পাদেন্তি; ন তথা তং কেচি উপ্পাদেন্তি নাম. নিৰোধা ৱোদানং ৱুট্ঠানন্তি ফলসমাপত্তি ৱেদিতব্বা. অসঙ্খতা পন তং নত্থিযেৱ, তস্মা পটিক্খিপতি. তেন হীতি যস্মা সঙ্খতা ন হোতি, তস্মা অসঙ্খতাতি লদ্ধি. ইদং পন অসঙ্খতভাৱে কাৰণং ন হোতীতি ৱুত্তম্পি অৱুত্তসদিসমেৱাতি.

নিৰোধসমাপত্তিকথাৱণ্ণনা.