৬. সম্মুতিঞাণকথাৱণ্ণনা

৪৩৪-৪৩৫. ইদানি সম্মুতিঞাণকথা নাম হোতি. তত্থ সম্মুতিসচ্চং পৰমত্থসচ্চন্তি দ্ৱে সচ্চানি. যে পন এৱং ৱিভাগং অকত্ৱা সচ্চন্তি ৱচনসামঞ্ঞেন সম্মুতিঞাণম্পি ‘‘সচ্চাৰম্মণমেৱা’’তি ৱদন্তি, সেয্যথাপি অন্ধকা; তে অযুত্তৱাদিনোতি তেসং ৱাদৱিসোধনত্থং অযং কথা আৰদ্ধা. তত্থ ন ৱত্তব্বন্তি পুচ্ছা পৰৱাদিস্স, পৰমত্থসচ্চং সন্ধায পটিঞ্ঞা সকৱাদিস্স. সম্মুতিসচ্চম্হীতি সম্মুতিং অনুপৱিট্ঠে সচ্চম্হি. পচ্চত্তে ৱা ভুম্মৱচনং, সম্মুতিসচ্চন্তি অত্থো. সম্মুতিঞাণং সচ্চাৰম্মণঞ্ঞেৱাতি পুচ্ছা সকৱাদিস্স, পটিঞ্ঞা ইতৰস্স. ততো নং ‘‘যদি তং অৱিসেসেন সচ্চাৰম্মণঞ্ঞেৱ, তেন ঞাণেন দুক্খপৰিঞ্ঞাদীনি কৰেয্যা’’তি চোদেতুং তেন ঞাণেনাতিআদিমাহ.

সম্মুতিঞাণকথাৱণ্ণনা.