১০. সংৱৰকথাৱণ্ণনা

৩৭৯. ইদানি সংৱৰকথা নাম হোতি. তত্থ যেসং তাৱতিংসে দেৱে উপাদায ততুত্তৰি দেৱেসু যস্মা তে পঞ্চ ৱেৰানি ন সমাচৰন্তি, তস্মা সংৱৰো অত্থীতি লদ্ধি, তে সন্ধায পুচ্ছা সকৱাদিস্স, ৱেৰসমুদাচাৰং অপস্সতো পটিঞ্ঞা ইতৰস্স. ততো যস্মা সংৱৰো নাম সংৱৰিতব্বে অসংৱৰে সতি হোতি, তস্মা অসংৱৰপুচ্ছা সকৱাদিস্স, দেৱেসু পাণাতিপাতাদীনং অভাৱেন পটিক্খেপো ইতৰস্স.

অত্থি মনুস্সেসূতিআদি সংৱৰে সতি অসংৱৰস্স অসংৱৰে চ সতি সংৱৰস্স পৱত্তিদস্সনত্থং ৱুত্তং.

৩৮০. পাণাতিপাতা ৱেৰমণীতি আদিপঞ্হেসু পাণাতিপাতাদীনং অসমাচৰণৱসেন পটিঞ্ঞা, পাণাতিপাতাদীনং নত্থিতায পটিক্খেপো ৱেদিতব্বো. পটিলোমপঞ্হা উত্তানত্থাযেৱ.

অৱসানে নত্থি দেৱেসু সংৱৰোতিপঞ্হে পাণাতিপাতাদীনি কত্ৱা পুন ততো সংৱৰাভাৱং সন্ধায পটিঞ্ঞা সকৱাদিস্স. ততো ছলৱসেন যদি সংৱৰো নত্থি, সব্বে দেৱা পাণাতিপাতিনোতিআদিপুচ্ছা পৰৱাদিস্স. দেৱানং ৱেৰসমুদাচাৰস্স অভাৱেন পটিক্খেপো সকৱাদিস্স. নহেৱন্তি ৱচনমত্তং গহেত্ৱা লদ্ধিপতিট্ঠাপনং পৰৱাদিস্স. এৱং পতিট্ঠিতা পন লদ্ধি অপ্পতিট্ঠিতাৱ হোতীতি.

সংৱৰকথাৱণ্ণনা.