৭. চিত্তট্ঠিতিকথাৱণ্ণনা

৩৩৫. ইদানি চিত্তট্ঠিতিকথা নাম হোতি. তত্থ যেসং সমাপত্তিচিত্তঞ্চেৱ ভৱঙ্গচিত্তঞ্চ অনুপ্পবন্ধেন পৱত্তমানং দিস্ৱা ‘‘একমেৱ চিত্তং চিৰং তিট্ঠতী’’তি লদ্ধি সেয্যথাপি এতৰহি হেট্ঠা ৱুত্তপ্পভেদানং অন্ধকানং, তংলদ্ধিৱিসোধনত্থং একং, চিত্তং দিৱসং তিট্ঠতীতি পুচ্ছা সকৱাদিস্স, পটিঞ্ঞা পৰৱাদিস্স. উপড্ঢদিৱসো উপ্পাদক্খণোতি এত্থ ঠিতিক্খণং অনামসিত্ৱা ‘‘অনিচ্চা ৱত সঙ্খাৰা, উপ্পাদৱযধম্মিনো’’তি (সং. নি. ১.১৮৬; ২.১৪৩) দেসনানযেন উপ্পাদৱযৱসেনেৱ পুচ্ছা কতা.

তে ধম্মা চিত্তেন লহুপৰিৱত্তাতি পুট্ঠো চিত্ততো লহুতৰপৰিৱত্তিনো ধম্মে অপস্সন্তো পটিক্খিপতি. দুতিযং পুট্ঠো যস্স চিত্তস্স দীঘট্ঠিতিং ইচ্ছতি, তং সন্ধায পটিজানাতি. যাৱতাযুকং তিট্ঠতীতি পঞ্হে ‘‘চুল্লাসীতিসহস্সানি, কপ্পা তিট্ঠন্তি যে মৰূ’’তিআদিৱচনৱসেন (মহানি. ১০) আৰুপ্পতো অঞ্ঞত্ৰ পটিক্খিপতি, আৰুপ্পে পটিজানাতি. মুহুত্তং মুহুত্তং উপ্পজ্জতীতি পঞ্হে পৰৱাদিস্স ‘‘উপ্পাদৱযধম্মিনো’’তিআদিসুত্তৱিৰোধভযেন পটিজানাতি. ঠিতিং পনস্স লদ্ধিৱসেন ইচ্ছতি. সেসমেত্থ উত্তানত্থমেৱাতি.

চিত্তট্ঠিতিকথাৱণ্ণনা.