৮. সতিপট্ঠানকথাৱণ্ণনা

৩০১. ইদানি সতিপট্ঠানকথা হোতি. ‘‘তত্থ – চতুন্নং, ভিক্খৱে, সতিপট্ঠানানং সমুদযঞ্চ অত্থঙ্গমঞ্চ দেসেস্সামী’’তি (সং. নি. ৫.৪০৮) সতিপট্ঠানসংযুত্তে ৱুত্তনযেনেৱ যেসং কাযাদযো সতিযা আৰম্মণধম্মে গহেত্ৱা ‘‘সব্বে ধম্মা সতিপট্ঠানা’’তি লদ্ধি, সেয্যথাপি এতৰহি অন্ধকানং. অন্ধকা নাম পুব্বসেলিযা, অপৰসেলিযা, ৰাজগিৰিযা, সিদ্ধত্থিকাতি ইমে পচ্ছা উপ্পন্ননিকাযা. তেসং লদ্ধিৱিৱেচনত্থং পুচ্ছা সকৱাদিস্স, পটিঞ্ঞা পৰৱাদিস্স. তত্থ যস্মা ‘‘পতিট্ঠাতি এতেসূতি পট্ঠানা. কা পতিট্ঠাতি? সতি. সতিযা পট্ঠানা সতিপট্ঠানা’’তি ইমিনা অত্থেন সতিগোচৰাপি সতিপট্ঠানা. ‘‘পতিট্ঠহন্তীতি পট্ঠানা. কা পতিট্ঠহন্তি? সতিযো. সতিযোৱ পট্ঠানা সতিপট্ঠানা’’তি ইমিনা অত্থেন সতিযোৱ সতিপট্ঠানা. তস্মা দ্ৱেপি ৱাদা পৰিযাযেন যুজ্জন্তি. যে পন তং পৰিযাযং পহায একন্তেনেৱ ‘‘সব্বে ধম্মা সতিপট্ঠানা’’তি ৱদন্তি, তে সন্ধায পুচ্ছা সকৱাদিস্স, আৰম্মণৱসেন পটিঞ্ঞা পৰৱাদিস্স. সব্বে ধম্মা সতীতি অনুযুত্তস্স পন সব্বেসং সতিসভাৱাভাৱতো পটিক্খেপো তস্সেৱ. তত্থ খযগামীতিআদীনি মগ্গৱিসেসনানি. একাযনমগ্গো হি কিলেসানং খযভূতং নিব্বানং গচ্ছতীতি খযগামী. চত্তাৰি সচ্চানি বুজ্ঝন্তো গচ্ছতীতি বোধগামী. ৱট্টং অপচিনন্তো গচ্ছতীতি অপচযগামী. এৱমেতেহি পদেহি ‘‘কিং তে সব্বে ধম্মা এৱৰূপো তে একাযনো মগ্গো হোতী’’তি পুচ্ছতি. অনাসৱা অসংযোজনিযাতিআদীনিপি লোকুত্তৰভাৱং পুচ্ছনত্থায ৱুত্তানি. বুদ্ধানুস্সতীতিআদীনি পভেদপুচ্ছাৱসেন ৱুত্তানি.

চক্খাযতনং সতিপট্ঠানন্তিআদি সব্বধম্মানং পভেদপুচ্ছাৱসেন ৱুত্তং. তত্থাপি সতিৱসেন পটিক্খেপো, আৰম্মণৱসেন পটিঞ্ঞাতি. এৱং সব্বপঞ্হেসু অত্থো ৱেদিতব্বো. সুত্তসাধনা উত্তানত্থাযেৱাতি.

সতিপট্ঠানকথাৱণ্ণনা নিট্ঠিতা.