৭. সত্তকনিদ্দেসৱণ্ণনা

২০৩. সত্তকে – সকিং নিমুগ্গোতি একৱাৰং নিমুগ্গো. একন্তকাড়কেহীতি একন্তেনেৱ কাড়কেহি নত্থিকৱাদঅহেতুকৱাদঅকিৰিযৱাদসঙ্খাতেহি নিযতমিচ্ছাদিট্ঠিধম্মেহি. এৱং পুগ্গলোতি ইমিনা কাৰণেন পুগ্গলো একৱাৰং নিমুগ্গো তথা নিমুগ্গোৱ হোতি. এতস্স হি পুন ভৱতো ৱুট্ঠানং নাম নত্থীতি ৱদন্তি. মক্খলিগোসালাদযো ৱিয হেট্ঠা নৰকগ্গীনংযেৱ আহাৰো হোতি.

সাহু সদ্ধা কুসলেসু ধম্মেসূতি কুসলধম্মেসু সদ্ধা নাম সাধুলদ্ধিকাতি উম্মুজ্জতি. সো তাৱতকেনেৱ কুসলেন উম্মুজ্জতি নাম. সাধু হিৰীতিআদীসুপি এসেৱ নযো. হাযতিযেৱাতি চঙ্কৱাৰে আসিত্তউদকং ৱিয একন্তেন পৰিহাযতেৱ. এৱং পুগ্গলোতি এৱং সাহু সদ্ধাতি. ইমেসং সদ্ধাদীনং ৱসেন একৱাৰং উম্মুজ্জিত্ৱা তেসং পৰিহানিযা পুন নিমুজ্জতিযেৱ, দেৱদত্তাদযো ৱিয. দেৱদত্তো হি অট্ঠ সমাপত্তিযো, পঞ্চ চ অভিঞ্ঞাযো নিব্বত্তেত্ৱাপি পুন বুদ্ধানং পটিকণ্টকতায তেহি গুণেহি পৰিহীনো ৰুহিৰুপ্পাদকম্মং সঙ্ঘভেদকম্মঞ্চ কত্ৱা কাযস্স ভেদা দুতিযচিত্তৱাৰেন নিৰযে নিব্বত্তি. কোকালিকো দ্ৱে অগ্গসাৱকে উপৱদিত্ৱা পদুমনিৰযে নিব্বত্তো.

নেৱ হাযতি নো ৱড্ঢতীতি অপ্পহোনককালেপি ন হাযতি, পহোনককালেপি ন ৱড্ঢতি. উভযম্পি পনেতং অগাৰিকেনপি অনগাৰিকেনপি দীপেতব্বং. একচ্চো হি অগাৰিকো অপ্পহোনককালে পক্খিকভত্তং ৱা সলাকভত্তং ৱা ৱস্সাৱাসিকং ৱা উপনিবন্ধাপেতি. সো পচ্ছা পহোনককালেপি পক্খিকভত্তাদিমত্তমেৱ পৱত্তেতি. অনগাৰিকোপি আদিম্হি অপ্পহোনককালে উদ্দেসং ৱা ধুতঙ্গং ৱা গণ্হাতি, মেধাবলৱীৰিযসম্পত্তিযা পহোনককালেপি ততো উত্তৰিং ন কৰোতি. এৱং পুগ্গলোতি এৱং ইমায সদ্ধাদীনং ঠিতিযা পুগ্গলো উম্মুজ্জিত্ৱা ঠিতো নাম হোতি.

উম্মুজ্জিত্ৱা ৱিপস্সতি ৱিলোকেতীতি সোতাপন্নো পুগ্গলো উট্ঠহিত্ৱা গমনমগ্গং গন্তব্বং দিসং ৱা আলোকেতি নাম.

উম্মুজ্জিত্ৱা পতৰতীতি সকদাগামিপুগ্গলো কিলেসতনুতায উট্ঠহিত্ৱা গন্তব্বদিসাভিমুখো পতৰতি নাম.

পতিগাধপ্পত্তো হোতীতি অনাগামিপুগ্গলো উট্ঠায ৱিলোকেত্ৱা পতৰিত্ৱা গন্ত্ৱা একস্মিং ঠানে পতিট্ঠাপত্তো নাম হোতি, তিট্ঠতি, ন পুনাগচ্ছতি.

তিণ্ণো পাৰঙ্গতো থলে তিট্ঠতীতি সব্বকিলেসোঘং তৰিত্ৱা পৰতীৰং গন্ত্ৱা নিব্বানথলে ঠিতো নাম হোতি. ইমে পন সত্ত পুগ্গলা উদকোপমেন দীপিতা.

সত্ত কিৰ জঙ্ঘৱাণিজা অদ্ধানমগ্গপটিপন্না অন্তৰামগ্গে একং পুণ্ণনদিং পাপুণিংসু. তেসু পঠমং ওতিণ্ণো উদকভীৰুকো পুৰিসো ওতিণ্ণট্ঠানেযেৱ নিমুজ্জিত্ৱা পুন উট্ঠাতুং নাসক্খি, অন্তোযেৱ মচ্ছকচ্ছপভক্খো জাতো. দুতিযো ওতিণ্ণট্ঠানে নিমুজ্জিত্ৱা সকিং উট্ঠহিত্ৱা পুন নিমুগ্গো উট্ঠাতুং নাসক্খি, অন্তোযেৱ মচ্ছকচ্ছপভক্খো জাতো. ততিযো নিমুজ্জিত্ৱা উট্ঠহি. সো মজ্ঝে নদিযা ঠত্ৱা নেৱ ওৰতো আগন্তুং, ন পৰতো গন্তুং অসক্খি. চতুত্থো উট্ঠায ঠিতো উত্তৰণতিত্থং ওলোকেসি. পঞ্চমো ওতৰণতিত্থং ওলোকেত্ৱা পতৰি. ছট্ঠো তৰিত্ৱা পাৰিমতীৰং গন্ত্ৱা কটিপ্পমাণে উদকে ঠিতো. সত্তমো পাৰিমতীৰং গন্ত্ৱা গন্ধচুণ্ণাদীহি ন্হাত্ৱা ৱৰৱত্থানি নিৱাসেত্ৱা সুৰভিৱিলেপনং ৱিলিম্পিত্ৱা নীলুপ্পলাদীনি পিড়ন্ধিত্ৱা নানালঙ্কাৰপটিমণ্ডিতো মহানগৰং পৱিসিত্ৱা পাসাদৱৰমাৰুয্হ উত্তমভোজনং ভুঞ্জি.

তত্থ সত্ত জঙ্ঘৱাণিজা ৱিয ইমে সত্ত পুগ্গলা. নদী ৱিয ৱট্টং. পঠমস্স উদকভীৰুকস্স পুৰিসস্স ওতিণ্ণট্ঠানেযেৱ নিমুজ্জনং ৱিয মিচ্ছাদিট্ঠিকস্স ৱট্টে নিমুজ্জনং. উম্মুজ্জিত্ৱা নিমুগ্গপুৰিসো ৱিয সদ্ধাদীনং উপ্পত্তিমত্তকেন উম্মুজ্জিত্ৱা তেসং পৰিহানিযা নিমুগ্গপুগ্গলো. মজ্ঝে নদিযা ঠিতো ৱিয সদ্ধাদীনং ঠিতিযা ঠিতপুগ্গলো. উত্তৰণতিত্থং ওলোকেন্তো ৱিয গন্তব্বমগ্গং গন্তব্বদিসং ৱা ওলোকেন্তো সোতাপন্নো. পতৰিতপুৰিসো ৱিয কিলেসতনুতায পতৰন্তো সকদাগামী. তৰিত্ৱা কটিমত্তে উদকে ঠিতপুৰিসো ৱিয অনাৱত্তিতধম্মতায ঠিতো অনাগামী. ন্হত্ৱা পাৰিমতীৰং উত্তৰিত্ৱা থলে ঠিতপুৰিসো ৱিয চত্তাৰো ওঘে অতিক্কমিত্ৱা নিব্বানথলে ঠিতো খীণাসৱব্ৰাহ্মণো. থলে ঠিতপুৰিসস্স নগৰং পৱিসিত্ৱা পাসাদৱৰং আৰুয্হ উত্তমভোজনভুঞ্জনং ৱিয খীণাসৱস্স নিব্বানাৰম্মণং ফলসমাপত্তিং অপ্পেত্ৱা ৱীতিনামনং ৱেদিতব্বং. উভতোভাগৱিমুত্তাদযো হেট্ঠা পকাসিতাযেৱাতি.

সত্তকনিদ্দেসৱণ্ণনা.

২০৭. অট্ঠকনৱকনিদ্দেসাপি হেট্ঠা ৱুত্তনযেনেৱ ৱেদিতব্বা.