১০. দুচ্চৰিতৱিপাকসুত্তৱণ্ণনা

৪০. দসমে পাণাতিপাতোতি পাণাতিপাতচেতনা. সব্বলহুসোতি সব্বলহুকো. অপ্পাযুকসংৱত্তনিকোতি তেন পৰিত্তকেন কম্মৱিপাকেন অপ্পাযুকো হোতি, দিন্নমত্তায ৱা পটিসন্ধিযা ৱিলীযতি মাতুকুচ্ছিতো নিক্খন্তমত্তে ৱা. এৱৰূপো হি ন অঞ্ঞস্স কস্সচি নিস্সন্দো, পাণাতিপাতস্সেৱ গতমগ্গো এসোতি. ভোগব্যসনসংৱত্তনিকোতি যথা কাকণিকামত্তম্পি হত্থে ন তিট্ঠতি, এৱং ভোগব্যসনং সংৱত্তেতি. সপত্তৱেৰসংৱত্তনিকো হোতীতি সহ সপত্তেহি ৱেৰং সংৱত্তেতি. তস্স হি সপত্তা চ বহুকা হোন্তি. যো চ নং পস্সতি, তস্মিং ৱেৰমেৱ উপ্পাদেতি ন নিব্বাযতি. এৱৰূপো হি পৰস্স ৰক্খিতগোপিতভণ্ডে অপৰাধস্স নিস্সন্দো.

অভূতব্ভক্খানসংৱত্তনিকো হোতীতি অভূতেন অব্ভক্খানং সংৱত্তেতি, যেন কেনচি কতং তস্সেৱ উপৰি পততি. মিত্তেহি ভেদনসংৱত্তনিকোতি মিত্তেহি ভেদং সংৱত্তেতি. যং যং মিত্তং কৰোতি, সো সো ভিজ্জতিযেৱ. অমনাপসদ্দসংৱত্তনিকোতি অমনাপসদ্দং সংৱত্তেতি. যা সা ৱাচা কণ্টকা কক্কসা কটুকা অভিসজ্জনী মম্মচ্ছেদিকা, গতগতট্ঠানে তমেৱ সুণাতি, মনাপসদ্দসৱনং নাম ন লভতি. এৱৰূপো ফৰুসৱাচায গতমগ্গো নাম. অনাদেয্যৱাচাসংৱত্তনিকোতি অগ্গহেতব্বৱচনতং সংৱত্তেতি, ‘‘ত্ৱং কস্মা কথেসি, কো হি তৱ ৱচনং গহেস্সতী’’তি ৱত্তব্বতং আপজ্জতি. অযং সম্ফপ্পলাপস্স গতমগ্গো. উম্মত্তকসংৱত্তনিকো হোতীতি উম্মত্তকভাৱং সংৱত্তেতি. তেন হি মনুস্সো উম্মত্তো ৱা খিত্তচিত্তো ৱা এড়মূগো ৱা হোতি. অযং সুৰাপানস্স নিস্সন্দো. ইমস্মিং সুত্তে ৱট্টমেৱ কথিতন্তি.

দানৱগ্গো চতুত্থো.