৫. উপোসথৱগ্গো

৪. ৱাসেট্ঠসুত্তৱণ্ণনা

৪৪. পঞ্চমস্স চতুত্থে ইমে চেপি, ৱাসেট্ঠ, মহাসালাতি পুৰতো ঠিতে দ্ৱে সালৰুক্খে দস্সেন্তো পৰিকপ্পোপমং আহ. ইদং ৱুত্তং হোতি – ইমে তাৱ মহাসালা অচেতনা. সচে এতেপি সচেতনা হুত্ৱা অট্ঠঙ্গসমন্নাগতং উপোসথং উপৱসেয্যুং, এতেসম্পি সো উপোসথৱাসো দীঘৰত্তং হিতায সুখায অস্স. ভূতে পন ৱত্তব্বমেৱ নত্থীতি.

৬. অনুৰুদ্ধসুত্তৱণ্ণনা

৪৬. ছট্ঠে যেনাযস্মা অনুৰুদ্ধোতি তা কিৰ দেৱতা অত্তনো সম্পত্তিং ওলোকেত্ৱা ‘‘কিং নু খো নিস্সায অযং সম্পত্তি অম্হেহি লদ্ধা’’তি আৱজ্জমানা থেৰং দিস্ৱা ‘‘মযং অম্হাকং অয্যস্স পুব্বে চক্কৱত্তিৰজ্জং কৰোন্তস্স পাদপৰিচাৰিকা হুত্ৱা তেন দিন্নোৱাদে ঠত্ৱা ইমং সম্পত্তিং লভিম্হ, গচ্ছাম থেৰং আনেত্ৱা ইমং সম্পত্তিং অনুভৱিস্সামা’’তি দিৱা যেনাযস্মা অনুৰুদ্ধো তেনুপসঙ্কমিংসু. তীসু ঠানেসূতি তীসু কাৰণেসু. ঠানসো পটিলভামাতি খণেনেৱ লভাম. সৰন্তি ৱচনসদ্দং ৱা গীতসদ্দং ৱা আভৰণসদ্দং ৱা. পীতা অস্সূতিআদীনি নীলা তাৱ জাতা, পীতা ভৱিতুং ন সক্খিস্সন্তীতিআদিনা নযেন চিন্তেত্ৱা ৱিতক্কেতি. তাপি ‘‘ইদানি অয্যো অম্হাকং পীতভাৱং ইচ্ছতি, ইদানি লোহিতভাৱ’’ন্তি তাদিসাৱ অহেসুং.

অচ্ছৰং ৱাদেসীতি পাণিতলং ৱাদেসি. পঞ্চঙ্গিকস্সাতি আততং, ৱিততং, আততৱিততং, ঘনং, সুসিৰন্তি ইমেহি পঞ্চহি অঙ্গেহি সমন্নাগতস্স. তত্থ আততং নাম চম্মপৰিযোনদ্ধেসু ভেৰিআদীসু একতলতূৰিযং, ৱিততং নাম উভযতলং, আততৱিততং নাম সব্বসো পৰিযোনদ্ধং, সুসিৰং ৱংসাদি, ঘনং সম্মাদি. সুৱিনীতস্সাতি আকড্ঢনসিথিলকৰণাদীহি সমুচ্ছিতস্স. সুপ্পটিপতাড়িতস্সাতি পমাণে ঠিতভাৱজাননত্থং সুট্ঠু পটিপতাড়িতস্স. কুসলেহি সুসমন্নাহতস্সাতি যে ৱাদেতুং কুসলা ছেকা, তেহি ৱাদিতস্স. ৱগ্গূতি ছেকো সুন্দৰো. ৰজনীযোতি ৰঞ্জেতুং সমত্থো. কমনীযোতি কামেতব্বযুত্তো. খমনীযোতি ৱা পাঠো, দিৱসম্পি সুয্যমানো খমতেৱ, ন নিব্বিন্দতীতি অত্থো. মদনীযোতি মানমদপুৰিসমদজননো. ইন্দ্ৰিযানি ওক্খিপীতি ‘‘অসাৰুপ্পং ইমা দেৱতা কৰোন্তী’’তি ইন্দ্ৰিযানি হেট্ঠা খিপি, ন অক্খীনি উম্মীলেত্ৱা ওলোকেসি. ন খ্ৱয্যো অনুৰুদ্ধো সাদিযতীতি ‘‘মযং নচ্চাম গাযাম, অয্যো পন অনুৰুদ্ধো ন খো সাদিযতি, অক্খীনি উম্মীলেত্ৱা ন ওলোকেতি, কিং মযং নচ্চিত্ৱা ৱা গাযিত্ৱা ৱা কৰিস্সামা’’তি তত্থেৱ অন্তৰধাযিংসু. যেন ভগৱা তেনুপসঙ্কমীতি তাসং দেৱতানং আনুভাৱং দিস্ৱা ‘‘কতিহি নু খো ধম্মেহি সমন্নাগতো মাতুগামো মনাপকাযিকে দেৱলোকে নিব্বত্ততী’’তি ইমমত্থং পুচ্ছিতুং উপসঙ্কমি.

৯-১০. ইধলোকিকসুত্তদ্ৱযৱণ্ণনা

৪৯-৫০. নৱমে অযং’স লোকো আৰদ্ধো হোতীতি অযমস্স লোকো ইধলোকে কৰণমত্তায আৰদ্ধত্তা পৰিপুণ্ণত্তা আৰদ্ধো হোতি পৰিপুণ্ণো. সোড়সাকাৰসম্পন্নাতি সুত্তে ৱুত্তেহি অট্ঠহি, গাথাসু অট্ঠহীতি সোড়সহি আকাৰেহি সমন্নাগতা, যানি ৱা অট্ঠঙ্গানি পৰম্পি তেসু সমাদপেতীতি এৱম্পি সোড়সাকাৰসম্পন্নাতি একে. সদ্ধাসীলপঞ্ঞা পনেত্থ মিস্সিকা কথিতা. দসমং ভিক্খুসঙ্ঘস্স কথিতং. সব্বসুত্তেসু পন যং ন ৱুত্তং, তং হেট্ঠা আগতনযত্তা উত্তানত্থমেৱাতি.

উপোসথৱগ্গো পঞ্চমো.