৭. ভাৱনাসুত্তৱণ্ণনা

৭১. সত্তমে অননুযুত্তস্সাতি ন যুত্তপ্পযুত্তস্স হুত্ৱা ৱিহৰতো. সেয্যথাপি, ভিক্খৱে, কুক্কুটিযা অণ্ডানীতি ইমা কণ্হপক্খসুক্কপক্খৱসেন দ্ৱে উপমা ৱুত্তা. তাসু কণ্হপক্খূপমা অত্থস্স অসাধিকা, ইতৰা সাধিকাতি সুক্কপক্খূপমায এৱ অত্থো ৱেদিতব্বো. সেয্যথাতি ওপম্মত্থে নিপাতো. অপীতি সম্ভাৱনত্থে. উভযেনাপি সেয্যথাপি নাম, ভিক্খৱেতি দস্সেতি. কুক্কুটিযা অণ্ডানি অট্ঠ ৱা দস ৱা দ্ৱাদস ৱাতি এত্থ পন কিঞ্চাপি কুক্কুটিযা ৱুত্তপ্পকাৰতো ঊনাধিকানিপি অণ্ডানি হোন্তি, ৱচনসিলিট্ঠতায পনেতং ৱুত্তং. এৱঞ্হি লোকে সিলিট্ঠং ৱচনং হোতি. তানস্সূতি তানি অস্সু, ভৱেয্যুন্তি অত্থো. কুক্কুটিযা সম্মা অধিসযিতানীতি তায জনেত্তিযা কুক্কুটিযা পক্খে পসাৰেত্ৱা তেসং উপৰি সযন্তিযা সম্মা অধিসযিতানি. সম্মা পৰিসেদিতানীতি কালেন কালং উতুং গণ্হাপেন্তিযা সুট্ঠু সমন্ততো সেদিতানি, উস্মীকতানীতি ৱুত্তং হোতি. সম্মা পৰিভাৱিতানীতি কালেন কালং সুট্ঠু সমন্ততো ভাৱিতানি, কুক্কুটগন্ধং গাহাপিতানীতি অত্থো.

কিঞ্চাপি তস্সা কুক্কুটিযাতি তস্সা কুক্কুটিযা ইমং তিৱিধকিৰিযাকৰণেন অপ্পমাদং কত্ৱা কিঞ্চাপি ন এৱং ইচ্ছা উপ্পজ্জেয্য. অথ খো ভব্বাৱ তেতি অথ খো তে কুক্কুটপোতকা ৱুত্তনযেন সোত্থিনা অভিনিব্ভিজ্জিতুং ভব্বাৱ. তে হি যস্মা তায কুক্কুটিযা এৱং তীহাকাৰেহি তানি অণ্ডানি পৰিপালিযমানানি ন পূতীনি হোন্তি. যোপি নেসং অল্লসিনেহো, সো পৰিযাদানং গচ্ছতি, কপালং তনুকং হোতি, পাদনখসিখা চ মুখতুণ্ডকঞ্চ খৰং হোতি, সযম্পি পৰিণামং গচ্ছতি. কপালস্স তনুত্তা বহিদ্ধা আলোকো অন্তো পঞ্ঞাযতি, তস্মা ‘‘চিৰং ৱত মযং সংকুটিতহত্থপাদা সম্বাধে সযিম্হ, অযঞ্চ বহি আলোকো দিস্সতি, এত্থ দানি নো সুখৱিহাৰো ভৱিস্সতী’’তি নিক্খমিতুকামা হুত্ৱা কপালং পাদেন পহৰন্তি, গীৱং পসাৰেন্তি, ততো তং কপালং দ্ৱেধা ভিজ্জতি. অথ তে পক্খে ৱিধুনন্তা তংখণানুৰূপং ৱিৰৱন্তা নিক্খমন্তিযেৱ. নিক্খমন্তা চ গামক্খেত্তং উপসোভযমানা ৱিচৰন্তি.

এৱমেৱ খোতি ইদং ওপম্মসম্পটিপাদনং. তং এৱং অত্থেন সংসন্দেত্ৱা ৱেদিতব্বং – তস্সা কুক্কুটিযা অণ্ডেসু অধিসযনাদিতিৱিধকিৰিযাকৰণং ৱিয হি ইমস্স ভিক্খুনো ভাৱনং অনুযুত্তকালো, কুক্কুটিযা তিৱিধকিৰিযাসম্পাদনেন অণ্ডানং অপূতিভাৱো ৱিয ভাৱনং অনুযুত্তস্স ভিক্খুনো তিৱিধানুপস্সনাসম্পাদনেন ৱিপস্সনাঞাণস্স অপৰিহানি. তস্সা তিৱিধকিৰিযাকৰণেন অণ্ডানং অল্লসিনেহপৰিযাদানং ৱিয তস্স ভিক্খুনো তিৱিধানুপস্সনাসম্পাদনেন ভৱত্তযানুগতনিকন্তিসিনেহপৰিযাদানং, অণ্ডকপালানং তনুভাৱো ৱিয ভিক্খুনো অৱিজ্জণ্ডকোসস্স তনুভাৱো, কুক্কুটপোতকানং নখতুণ্ডকানং থদ্ধভাৱো ৱিয ভিক্খুনো ৱিপস্সনাঞাণস্স তিক্খখৰৱিপ্পসন্নসূৰভাৱো, কুক্কুটপোতকানং পৰিণামকালো ৱিয ভিক্খুনো ৱিপস্সনাঞাণস্স পৰিণামকালো ৱড্ঢিকালো গব্ভগ্গহণকালো, কুক্কুটপোতকানং পাদনখসিখায ৱা মুখতুণ্ডকেন ৱা অণ্ডকোসং পদালেত্ৱা পক্খে পপ্ফোটেত্ৱা সোত্থিনা অভিনিব্ভিদাকালো ৱিয তস্স ভিক্খুনো ৱিপস্সনাঞাণগব্ভং গণ্হাপেত্ৱা ৱিচৰন্তস্স তজ্জাতিকং উতুসপ্পাযং ৱা ভোজনসপ্পাযং ৱা পুগ্গলসপ্পাযং ৱা ধম্মস্সৱনসপ্পাযং ৱা লভিত্ৱা একাসনে নিসিন্নস্সেৱ ৱিপস্সনং ৱড্ঢেন্তস্স অনুপুব্বাধিগতেন অৰহত্তমগ্গেন অৱিজ্জণ্ডকোসং পদালেত্ৱা অভিঞ্ঞাপক্খে পপ্ফোটেত্ৱা সোত্থিনা অৰহত্তপ্পত্তকালো ৱেদিতব্বো.

যথা পন কুক্কুটপোতকানং পৰিণতভাৱং ঞত্ৱা মাতাপি অণ্ডকোসং ভিন্দতি, এৱং তথাৰূপস্স ভিক্খুনো ঞাণপৰিপাকং ঞত্ৱা সত্থাপি –

‘‘উচ্ছিন্দ সিনেহমত্তনো, কুমুদং সাৰদিকংৱ পাণিনা;

সন্তিমগ্গমেৱ ব্ৰূহয, নিব্বানং সুগতেন দেসিত’’ন্তি. (ধ. প. ২৮৫) –

আদিনা নযেন ওভাসং ফৰিত্ৱা গাথায অৱিজ্জণ্ডকোসং পহৰতি. সো গাথাপৰিযোসানে অৱিজ্জণ্ডকোসং ভিন্দিত্ৱা অৰহত্তং পাপুণাতি. ততো পট্ঠায যথা তে কুক্কুটপোতকা গামক্খেত্তং উপসোভযমানা তত্থ ৱিচৰন্তি, এৱং অযম্পি মহাখীণাসৱো নিব্বানাৰম্মণং ফলসমাপত্তিং অপ্পেত্ৱা সঙ্ঘাৰামং উপসোভযমানো ৱিচৰতি.

ফলগণ্ডস্সাতি ৱড্ঢকিস্স. সো হি ওলম্বকসঙ্খাতং ফলং চাৰেত্ৱা দাৰূনং গণ্ডং হৰতীতি ফলগণ্ডোতি ৱুচ্চতি. ৱাসিজটেতি ৱাসিদণ্ডকস্স গহণট্ঠানে. এত্তকং মে অজ্জ আসৱানং খীণন্তি পব্বজিতস্স হি পব্বজ্জাসঙ্খেপেন উদ্দেসেন পৰিপুচ্ছায যোনিসোমনসিকাৰেন ৱত্তপটিপত্তিযা চ নিচ্চকালং আসৱা খীযন্তি. এৱং খীযমানানং পন নেসং ‘‘এত্তকং অজ্জ খীণং এত্তকং হিয্যো’’তি এৱমস্স ঞাণং ন হোতীতি অত্থো. ইমায উপমায ৱিপস্সনানিসংসো দীপিতো.

হেমন্তিকেনাতি হেমন্তসমযেন. পটিপ্পস্সম্ভন্তীতি থিৰভাৱেন পৰিহাযন্তি. এৱমেৱ খোতি এত্থ মহাসমুদ্দো ৱিয সাসনং দট্ঠব্বং, নাৱা ৱিয যোগাৱচৰো, নাৱায মহাসমুদ্দে পৰিযাযনং ৱিয ইমস্স ভিক্খুনো ঊনপঞ্চৱস্সকালে আচৰিযুপজ্ঝাযানং সন্তিকে ৱিচৰণং, নাৱায মহাসমুদ্দউদকেন খজ্জমানানং বন্ধনানং তনুভাৱো ৱিয ভিক্খুনো পব্বজ্জাসঙ্খেপেন উদ্দেসপৰিপুচ্ছাদীহিযেৱ সংযোজনানং তনুভাৱো, নাৱায থলে উক্খিত্তকালো ৱিয ভিক্খুনো নিস্সযমুত্তকস্স কম্মট্ঠানং গহেত্ৱা অৰঞ্ঞে ৱসনকালো, দিৱা ৱাতাতপেন সংসুস্সনং ৱিয ৱিপস্সনাঞাণেন তণ্হাসিনেহস্স সংসুস্সনং, ৰত্তিং হিমোদকেন তেমনং ৱিয কম্মট্ঠানং নিস্সায উপ্পন্নেন পীতিপামোজ্জেন চিত্ততেমনং, ৰত্তিন্দিৱং ৱাতাতপেহি চেৱ হিমোদকেন চ পৰিসুক্খপৰিতিন্তানং বন্ধনানং দুব্বলভাৱো ৱিয ৱিপস্সনাঞাণপীতিপামোজ্জেহি সংযোজনানং ভিয্যোসোমত্তায দুব্বলভাৱো, পাৱুস্সকমেঘো ৱিয অৰহত্তমগ্গঞাণং, মেঘৱুট্ঠিউদকেন নাৱায অন্তোপূতিভাৱো ৱিয আৰদ্ধৱিপস্সকস্স ৰূপসত্তকাদিৱসেন ৱিপস্সনং ৱড্ঢেন্তস্স ওক্খাযমানে পক্খাযমানে কম্মট্ঠানে একদিৱসং উতুসপ্পাযাদীনি লদ্ধা একপল্লঙ্কেন নিসিন্নস্স অৰহত্তফলাধিগমো. পূতিবন্ধনায নাৱায কিঞ্চি কালং ঠানং ৱিয খীণসংযোজনস্স অৰহতো মহাজনং অনুগ্গণ্হন্তস্স যাৱতাযুকং ঠানং, পূতিবন্ধনায নাৱায অনুপুব্বেন ভিজ্জিত্ৱা অপণ্ণত্তিকভাৱূপগমো ৱিয খীণাসৱস্স উপাদিন্নক্খন্ধভেদেন অনুপাদিসেসায নিব্বানধাতুযা পৰিনিব্বুতস্স অপণ্ণত্তিকভাৱূপগমোতি ইমায উপমায সংযোজনানং দুব্বলতা দীপিতা.