৮. অগ্গিক্খন্ধোপমসুত্তৱণ্ণনা

৭২. অট্ঠমং অত্থুপ্পত্তিযং কথিতং. অত্থুপ্পত্তি পনস্স হেট্ঠা চূড়চ্ছৰাসঙ্ঘাতসুত্তৱণ্ণনায (অ. নি. অট্ঠ. ১.১.৫১ আদযো) ৱিত্থাৰিতা এৱ. পস্সথ নোতি পস্সথ নু. আলিঙ্গিত্ৱাতি উপগূহিত্ৱা. উপনিসীদেয্যাতি সমীপে নিস্সায নিসীদেয্য. উপনিপজ্জেয্যাতি উপগন্ত্ৱা নিপজ্জেয্য. আৰোচযামীতি আচিক্খামি. পটিৱেদযামীতি পটিৱেদেত্ৱা জানাপেত্ৱা কথেমি. ৱালৰজ্জুযাতি অস্সৱালগোৱালেহি ৱট্টিতৰজ্জুযা. পচ্চোৰস্মিন্তি উৰমজ্ঝে. ফেণুদ্দেহকন্তি ফেণং উদ্দেহিত্ৱা, উস্সাদেত্ৱাতি অত্থো. অত্তত্থন্তি অত্তনো দিট্ঠধম্মিকসম্পৰাযিকলোকিযলোকুত্তৰং অত্থং. পৰত্থোভযত্থেসুপি এসেৱ নযো. সেসমেত্থ যং ৱত্তব্বং সিযা, তং সব্বং চূড়চ্ছৰাসঙ্ঘাতসুত্তস্স (অ. নি. ১.৫১ আদযো) অত্থুপ্পত্তিযং কথিতমেৱ. ইদঞ্চ পন সুত্তং কথেত্ৱা সত্থা চূড়চ্ছৰাসঙ্ঘাতসুত্তং কথেসি. নৱমং উত্তানত্থমেৱ.