(১০) ৫. ককুধৱগ্গো

১-২. সম্পদাসুত্তদ্ৱযৱণ্ণনা

৯১-৯২. পঞ্চমস্স পঠমে পঞ্চ সম্পদা মিস্সিকা কথিতা. দুতিযে পুৰিমা চতস্সো মিস্সিকা, পঞ্চমী লোকিকাৱ.

৩. ব্যাকৰণসুত্তৱণ্ণনা

৯৩. ততিযে অঞ্ঞাব্যাকৰণানীতি অৰহত্তব্যাকৰণানি. মন্দত্তাতি মন্দভাৱেন অঞ্ঞাণেন. মোমূহত্তাতি অতিমূড়্হভাৱেন. অঞ্ঞং ব্যাকৰোতীতি অৰহত্তং পত্তোস্মীতি কথেতি. ইচ্ছাপকতোতি ইচ্ছায অভিভূতো. অধিমানেনাতি অধিগতমানেন. সম্মদেৱাতি হেতুনা নযেন কাৰণেনেৱ.

৪-৫. ফাসুৱিহাৰসুত্তাদিৱণ্ণনা

৯৪-৯৫. চতুত্থে ফাসুৱিহাৰাতি সুখৱিহাৰা. পঞ্চমে অকুপ্পন্তি অৰহত্তং.

৬. সুতধৰসুত্তৱণ্ণনা

৯৬. ছট্ঠে অপ্পট্ঠোতি অপ্পসমাৰম্ভো. অপ্পকিচ্চোতি অপ্পকৰণীযো. সুভৰোতি সুখেন ভৰিতব্বো সুপোসো. সুসন্তোসোতি তীহি সন্তোসেহি সুট্ঠু সন্তোসো. জীৱিতপৰিক্খাৰেসূতি জীৱিতসম্ভাৰেসু. অপ্পাহাৰোতি মন্দাহাৰো. অনোদৰিকত্তন্তি ন ওদৰিকভাৱং অমহগ্ঘসভাৱং অনুযুত্তো. অপ্পমিদ্ধোতি ন বহুনিদ্দো. সত্তমট্ঠমানি উত্তানত্থানি.

৯. সীহসুত্তৱণ্ণনা

৯৯. নৱমে সক্কচ্চঞ্ঞেৱ দেতি নো অসক্কচ্চন্তি অনৱঞ্ঞায অৱিৰজ্ঝিত্ৱাৱ দেতি, নো অৱঞ্ঞায ৱিৰজ্ঝিত্ৱা. মা মে যোগ্গপথো নস্সাতি মযা কতযোগ্গপথো ময্হং মা নস্সতু, ‘‘একো সীহো উট্ঠায বিড়াৰং পহৰন্তো ৱিৰজ্ঝিত্ৱা পহৰী’’তি এৱং ৱত্তাৰো মা হোন্তূতি অত্থো. অন্নভাৰনেসাদানন্তি এত্থ অন্নং ৱুচ্চতি যৱভত্তং, তং ভাৰো এতেসন্তি অন্নভাৰা. যাচকানং এতং নামং. নেসাদা ৱুচ্চন্তি সাকুণিকা. ইতি সব্বপচ্ছিমায কোটিযা এতেসং যাচকনেসাদানম্পি সক্কচ্চমেৱ দেসেতি.

১০. ককুধথেৰসুত্তৱণ্ণনা

১০০. দসমে অত্তভাৱপটিলাভোতি সৰীৰপটিলাভো. দ্ৱে ৱা তীণি ৱা মাগধকানি গামক্খেত্তানীতি এত্থ মাগধিকং গামক্খেত্তং অত্থি খুদ্দকং, অত্থি মজ্ঝিমং, অত্থি মহন্তং. খুদ্দকং গামক্খেত্তং ইতো চত্তালীসং উসভানি, ইতো চত্তালীসন্তি গাৱুতং হোতি, মজ্ঝিমং ইতো গাৱুতং, ইতো গাৱুতন্তি অড্ঢযোজনং হোতি, মহন্তং ইতো দিযড্ঢগাৱুতং, ইতো দিযড্ঢগাৱুতন্তি তিগাৱুতং হোতি. তেসু খুদ্দকেন গামক্খেত্তেন তীণি, খুদ্দকেন চ মজ্ঝিমেন চ দ্ৱে গামক্খেত্তানি তস্স অত্তভাৱো. তিগাৱুতঞ্হিস্স সৰীৰং. পৰিহৰিস্সামীতি পটিজগ্গিস্সামি গোপযিস্সামি. ৰক্খস্সেতন্তি ৰক্খস্সু এতং. মোঘপুৰিসোতি তুচ্ছপুৰিসো. নাস্সস্সাতি ন এতস্স ভৱেয্য. সমুদাচৰেয্যামাতি কথেয্যাম. সম্মন্নতীতি সম্মানং কৰোতি. যং তুমো কৰিস্সতি তুমোৱ তেন পঞ্ঞাযিস্সতীতি যং এস কৰিস্সতি, এসোৱ তেন কম্মেন পাকটো ভৱিস্সতি. সেসং সব্বত্থ উত্তানত্থমেৱাতি.

ককুধৱগ্গো পঞ্চমো.