১০. দুতিযসেখসুত্তৱণ্ণনা

৯০. দসমে ৱিযত্তোতি ব্যত্তো ছেকো. কিংকৰণীযেসূতি ইতি কত্তব্বেসু. চেতোসমথন্তি সমাধিকম্মট্ঠানং. অননুলোমিকেনাতি সাসনস্স অননুচ্ছৱিকেন. অতিকালেনাতি অতিপাতোৱ. অতিদিৱাতি দিৱা ৱুচ্চতি মজ্ঝন্হিকো, তং অতিক্কমিত্ৱা. আভিসল্লেখিকাতি অতিৱিয কিলেসসল্লেখিকা. চেতোৱিৱৰণসপ্পাযাতি চিত্তৱিৱৰণসঙ্খাতানং সমথৱিপস্সনানং সপ্পাযা. অপ্পিচ্ছকথাতি অপ্পিচ্ছা হোথাতি কথনকথা. সন্তুট্ঠিকথাতি চতূহি পচ্চযেহি সন্তুট্ঠা হোথাতি কথনকথা. পৱিৱেককথাতি তীহি ৱিৱেকেহি ৱিৱিত্তা হোথাতি কথনকথা. অসংসগ্গকথাতি পঞ্চৱিধেন সংসগ্গেন অসংসট্ঠা হোথাতি কথনকথা. ৱীৰিযাৰম্ভকথাতি দুৱিধং ৱীৰিযং আৰভথাতি কথনকথা. সীলকথাদীসু সীলং আৰব্ভ কথা সীলকথা. সমাধিং আৰব্ভ, পঞ্ঞং আৰব্ভ, পঞ্চৱিধং ৱিমুত্তিং আৰব্ভ, একূনৱীসতিপচ্চৱেক্খণসঙ্খাতং ৱিমুত্তিঞাণদস্সনং আৰব্ভ কথা ৱিমুত্তিঞাণদস্সনকথা. ন নিকামলাভীতিআদীসু ন ইচ্ছিতিচ্ছিতলাভী, দুক্খলাভী ন ৱিপুললাভীতি অত্থো. সেসং উত্তানত্থমেৱাতি.

থেৰৱগ্গো চতুত্থো.