৯. সসঙ্খাৰসুত্তৱণ্ণনা

১৬৯. নৱমে পঠমদুতিযপুগ্গলা সুক্খৱিপস্সকা সসঙ্খাৰেন সপ্পযোগেন সঙ্খাৰনিমিত্তং উপট্ঠপেন্তি. তেসু একো ৱিপস্সনিন্দ্ৰিযানং বলৱত্তা ইধেৱ কিলেসপৰিনিব্বানেন পৰিনিব্বাযতি, একো ইন্দ্ৰিযানং দুব্বলতায ইধ অসক্কোন্তো অনন্তৰে অত্তভাৱে তদেৱ মূলকম্মট্ঠানং পটিলভিত্ৱা সসঙ্খাৰেন সপ্পযোগেন সঙ্খাৰনিমিত্তং উপট্ঠপেত্ৱা কিলেসপৰিনিব্বানেন পৰিনিব্বাযতি, ততিযচতুত্থা সমথযানিকা. তেসং একো অসঙ্খাৰেন অপ্পযোগেন ইন্দ্ৰিযানং বলৱত্তা ইধেৱ কিলেসে খেপেতি, একো ইন্দ্ৰিযানং দুব্বলত্তা ইধ অসক্কোন্তো অনন্তৰে অত্তভাৱে তদেৱ মূলকম্মট্ঠানং পটিলভিত্ৱা অসঙ্খাৰেন অপ্পযোগেন কিলেসে খেপেতীতি ৱেদিতব্বো.