১০. উপক্কিলেসসুত্তৱণ্ণনা

৫০. দসমে উপক্কিলেসাতি ৱিৰোচিতুং অদত্ৱা উপক্কিলিট্ঠভাৱকৰণেন উপক্কিলেসা. মহিকাতি হিমং. ধূমো ৰজোতি ধূমো চ ৰজো চ. ৰাহূতি পুৰিমা তযো অসম্পত্তউপক্কিলেসা, ৰাহু পন সম্পত্তউপক্কিলেসৱসেন কথিতোতি ৱেদিতব্বো. সমণব্ৰাহ্মণা ন তপন্তি ন ভাসন্তি ন ৱিৰোচন্তীতি গুণপ্পতাপেন ন তপন্তি, গুণোভাসেন ন ভাসন্তি, গুণৱিৰোচনেন ন ৱিৰোচন্তি. সুৰামেৰযপানা অপ্পটিৱিৰতাতি পঞ্চৱিধায সুৰায চতুব্বিধস্স মেৰযস্স চ পানতো অৱিৰতা.

অৱিজ্জানিৱুতাতি অৱিজ্জায নিৱাৰিতা পিহিতা. পিযৰূপাভিনন্দিনোতি পিযৰূপং সাতৰূপং অভিনন্দমানা তুস্সমানা. সাদিযন্তীতি গণ্হন্তি. অৱিদ্দসূতি অন্ধবালা. সনেত্তিকাতি তণ্হাযোত্তেনেৱ সযোত্তা. কটসিন্তি অত্তভাৱং. ঘোৰন্তি কক্খড়ং. ইমস্মিং সুত্তেপি গাথাসুপি ৱট্টমেৱ কথিতন্তি.

ৰোহিতস্সৱগ্গো পঞ্চমো.