১. কুসিনাৰসুত্তৱণ্ণনা

১২৪. ততিযস্স পঠমে কুসিনাৰাযন্তি এৱংনামকে নগৰে. বলিহৰণে ৱনসণ্ডেতি এৱংনামকে ৱনসণ্ডে. তত্থ কিৰ ভূতবলিকৰণত্থং বলিং হৰন্তি, তস্মা বলিহৰণন্তি ৱুচ্চতি. আকঙ্খমানোতি ইচ্ছমানো. সহত্থাতি সহত্থেন. সম্পৱাৰেতীতি অলং অলন্তি ৱাচায চেৱ হত্থৱিকাৰেন চ পটিক্খিপাপেতি. সাধু ৱত মাযন্তি সাধু ৱত মং অযং. গথিতোতি তণ্হাগেধেন গথিতো. মুচ্ছিতোতি তণ্হামুচ্ছনাযযেৱ মুচ্ছিতো. অজ্ঝোপন্নোতি তণ্হায গিলিত্ৱা পৰিনিট্ঠপেত্ৱা পৱত্তো. অনিস্সৰণপঞ্ঞোতি ছন্দৰাগং পহায সংকড্ঢিত্ৱা পৰিভুঞ্জন্তো নিস্সৰণপঞ্ঞো নাম হোতি, অযং ন তাদিসো, সচ্ছন্দৰাগো পৰিভুঞ্জতীতি অনিস্সৰণপঞ্ঞো. সুক্কপক্খো ৱুত্তৱিপৰিযাযেন ৱেদিতব্বো. নেক্খম্মৱিতক্কাদযো পনেত্থ মিস্সকা কথিতাতি ৱেদিতব্বা.