(১০) ৫. লোণকপল্লৱগ্গো

১. অচ্চাযিকসুত্তৱণ্ণনা

৯৩. পঞ্চমস্স পঠমে অচ্চাযিকানীতি অতিপাতিকানি. কৰণীযানীতি অৱস্সকিচ্চানি. যঞ্হি ন অৱস্সং কাতব্বং, তং কিচ্চন্তি ৱুচ্চতি. অৱস্সং কাতব্বং কৰণীযং নাম. সীঘং সীঘন্তি ৱেগেন ৱেগেন. তস্স খো তন্তি এত্থ তন্তি নিপাতমত্তং. নত্থি সা ইদ্ধি ৱা আনুভাৱো ৱাতি সা ৱা ইদ্ধি সো ৱা আনুভাৱো নত্থি. উত্তৰস্ৱেতি ততিযদিৱসে. উতুপৰিণামিনীতি লদ্ধউতুপৰিণামানি হুত্ৱা. জাযন্তিপীতি ততিযদিৱসে নিক্খন্তসেতঙ্কুৰানি হোন্তি, সত্তাহে পত্তে নীলঙ্কুৰানি হোন্তি. গব্ভীনিপি হোন্তীতি দিযড্ঢমাসং পত্ৱা গহিতগব্ভানি হোন্তি. পচ্চন্তিপীতি তযো মাসে পত্ৱা পচ্চন্তি. ইদানি যস্মা বুদ্ধানং গহপতিকেন ৱা সস্সেহি ৱা অত্থো নত্থি, সাসনে পন তপ্পটিৰূপকং পুগ্গলং ৱা অত্থং ৱা দস্সেতুং তং তং ওপম্মং আহৰন্তি. তস্মা যমত্থং দস্সেতুকামেন এতং আভতং, তং দস্সেন্তো এৱমেৱ খোতিআদিমাহ. তং অত্থতো উত্তানমেৱ. সিক্খা পন ইধাপি মিস্সিকা এৱ কথিতা.

২. পৱিৱেকসুত্তৱণ্ণনা

৯৪. দুতিযে চীৱৰপৱিৱেকন্তি চীৱৰং নিস্সায উপ্পজ্জনককিলেসেহি ৱিৱিত্তভাৱং. সেসদ্ৱযেপি এসেৱ নযো. সাণানীতি সাণৱাকচেলানি. মসাণানীতি মিস্সকচেলানি. ছৱদুস্সানীতি মতসৰীৰতো ছড্ডিতৱত্থানি, এৰকতিণাদীনি ৱা গন্থেত্ৱা কতনিৱাসনানি. পংসুকূলানীতি পথৱিযং ছড্ডিতনন্তকানি. তিৰীটানীতি ৰুক্খতচৱত্থানি. অজিনানীতি অজিনমিগচম্মানি. অজিনক্খিপন্তি তদেৱ মজ্ঝে ফালিতং, সহখুৰকন্তিপি ৱদন্তি. কুসচীৰন্তি কুসতিণানি গন্থেত্ৱা কতচীৰং. ৱাকচীৰফলকচীৰেসুপি এসেৱ নযো. কেসকম্বলন্তি মনুস্সকেসেহি কতকম্বলং. ৱালকম্বলন্তি অস্সৱালাদীহি কতকম্বলং. উলূকপক্খিকন্তি উলূকপত্তানি গন্থেত্ৱা কতনিৱাসনং.

সাকভক্খাতি অল্লসাকভক্খা. সামাকভক্খাতি সামাকতণ্ডুলভক্খা. নীৱাৰাদীসু নীৱাৰা নাম অৰঞ্ঞে সযং জাতৱীহিজাতি. দদ্দুলন্তি চম্মকাৰেহি চম্মং লিখিত্ৱা ছড্ডিতকসটং. হটং ৱুচ্চতি সিলেসোপি সেৱালোপি কণিকাৰাদিৰুক্খনিয্যাসোপি. কণন্তি কুণ্ডকং. আচামোতি ভত্তউক্খলিকায লগ্গো ঝামওদনো. তং ছড্ডিতট্ঠানে গহেত্ৱা খাদন্তি, ওদনকঞ্জিযন্তিপি ৱদন্তি. পিঞ্ঞাকাদযো পাকটাৱ. পৱত্তফলভোজীতি পতিতফলভোজী. ভুসাগাৰন্তি খলসালং.

সীলৱাতি চতুপাৰিসুদ্ধিসীলেন সমন্নাগতো. দুস্সীল্যঞ্চস্স পহীনং হোতীতি পঞ্চ দুস্সীল্যানি পহীনানি হোন্তি. সম্মাদিট্ঠিকোতি যাথাৱদিট্ঠিকো. মিচ্ছাদিট্ঠীতি অযাথাৱদিট্ঠি. আসৱাতি চত্তাৰো আসৱা. অগ্গপ্পত্তোতি সীলগ্গপ্পত্তো. সাৰপ্পত্তোতি সীলসাৰং পত্তো. সুদ্ধোতি পৰিসুদ্ধো. সাৰে পতিট্ঠিতোতি সীলসমাধিপঞ্ঞাসাৰে পতিট্ঠিতো.

সেয্যথাপীতি যথা নাম. সম্পন্নন্তি পৰিপুণ্ণং পৰিপক্কসালিভৰিতং. সঙ্ঘৰাপেয্যাতি সঙ্কড্ঢাপেয্য. উব্বহাপেয্যাতি খলট্ঠানং আহৰাপেয্য. ভুসিকন্তি ভুসং. কোট্টাপেয্যাতি উদুক্খলে পক্খিপাপেত্ৱা মুসলেহি পহৰাপেয্য. অগ্গপ্পত্তানীতি তণ্ডুলগ্গং পত্তানি. সাৰপ্পত্তাদীসুপি এসেৱ নযো. সেসং উত্তানমেৱ. যং পনেত্থ ‘‘দুস্সীল্যঞ্চস্স পহীনং মিচ্ছাদিট্ঠি চস্স পহীনা’’তি ৱুত্তং, তং সোতাপত্তিমগ্গেন পহীনভাৱং সন্ধায ৱুত্তন্তি ৱেদিতব্বং.

৩. সৰদসুত্তৱণ্ণনা

৯৫. ততিযে ৱিদ্ধেতি ৱলাহকৱিগমেন দূৰীভূতে. দেৱেতি আকাসে. অভিৱিহচ্চাতি অভিৱিহনিত্ৱা. যতোতি যস্মিং কালে. ৱিৰজন্তি ৰাগৰজাদিৰহিতং. তেসংযেৱ মলানং ৱিগতত্তা ৱীতমলং. ধম্মচক্খুন্তি চতুসচ্চধম্মপৰিগ্গাহকং সোতাপত্তিমগ্গচক্খুং. নত্থি তং সংযোজনন্তি দুৱিধমেৱস্স সংযোজনং নত্থি, ইতৰম্পি পন পুন ইমং লোকং আনেতুং অসমত্থতায নত্থীতি ৱুত্তং. ইমস্মিং সুত্তে ঝানানাগামী নাম কথিতোতি.

৪. পৰিসাসুত্তৱণ্ণনা

৯৬. চতুত্থে ন বাহুলিকা হোন্তীতি পচ্চযবাহুল্লিকা ন হোন্তি. ন সাথলিকাতি তিস্সো সিক্খা সিথিলং কত্ৱা ন গণ্হন্তি. ওক্কমনে নিক্খিত্তধুৰাতি ওক্কমনং ৱুচ্চতি অৱগমনট্ঠেন পঞ্চ নীৱৰণানি, তেসু নিক্খিত্তধুৰা. পৱিৱেকে পুব্বঙ্গমাতি কাযচিত্তউপধিৱিৱেকসঙ্খাতে তিৱিধেপি ৱিৱেকে পুব্বঙ্গমা. ৱীৰিযং আৰভন্তীতি দুৱিধম্পি ৱীৰিযং পগ্গণ্হন্তি. অপ্পত্তস্সাতি ঝানৱিপস্সনামগ্গফলসঙ্খাতস্স অপ্পত্তৱিসেসস্স. সেসপদদ্ৱযেপি এসেৱ নযো. পচ্ছিমা জনতাতি সদ্ধিৱিহাৰিকঅন্তেৱাসিকাদযো. দিট্ঠানুগতিং আপজ্জতীতি আচৰিযুপজ্ঝাযেহি কতং অনুকৰোতি. যং তায জনতায আচৰিযুপজ্ঝাযেসু দিট্ঠং, তস্স অনুগতিং আপজ্জতি নাম. অযং ৱুচ্চতি, ভিক্খৱে, অগ্গৱতী পৰিসাতি, ভিক্খৱে, অযং পৰিসা অগ্গপুগ্গলৱতী নাম ৱুচ্চতি.

ভণ্ডনজাতাতি জাতভণ্ডনা. কলহজাতাতি জাতকলহা. ভণ্ডনন্তি চেত্থ কলহস্স পুব্বভাগো, হত্থপৰামাসাদিৱসেন ৱীতিক্কমো কলহো নাম. ৱিৱাদাপন্নাতি ৱিৰুদ্ধৱাদং আপন্না. মুখসত্তীহীতি গুণৱিজ্ঝনট্ঠেন ফৰুসা ৱাচা ‘‘মুখসত্তিযো’’তি ৱুচ্চন্তি, তাহি মুখসত্তীহি. ৱিতুদন্তা ৱিহৰন্তীতি ৱিজ্ঝন্তা ৱিচৰন্তি.

সমগ্গাতি সহিতা. সম্মোদমানাতি সমপ্পৱত্তমোদা. খীৰোদকীভূতাতি খীৰোদকং ৱিয ভূতা. পিযচক্খূহীতি উপসন্তেহি মেত্তচক্খূহি. পীতি জাযতীতি পঞ্চৱণ্ণা পীতি উপ্পজ্জতি. কাযো পস্সম্ভতীতি নামকাযোপি ৰূপকাযোপি ৱিগতদৰথো হোতি. পস্সদ্ধকাযোতি অসাৰদ্ধকাযো. সুখং ৱেদিযতীতি কাযিকচেতসিকসুখং ৱেদিযতি. সমাধিযতীতি আৰম্মণে সম্মা ঠপীযতি.

থুল্লফুসিতকেতি মহাফুসিতকে. পব্বতকন্দৰপদৰসাখাতি এত্থ কন্দৰো নাম ‘‘ক’’ন্তি লদ্ধনামেন উদকেন দাৰিতো উদকভিন্নো পব্বতপ্পদেসো, যো ‘‘নিতম্ভো’’তিপি ‘‘নদিকুঞ্জো’’তিপি ৱুচ্চতি. পদৰং নাম অট্ঠ মাসে দেৱে অৱস্সন্তে ফলিতো ভূমিপ্পদেসো. সাখাতি কুসোব্ভগামিনিযো খুদ্দকমাতিকাযো. কুসোব্ভাতি খুদ্দকআৱাটা. মহাসোব্ভাতি মহাআৱাটা. কুন্নদিযোতি খুদ্দকনদিযো. মহানদিযোতি গঙ্গাযমুনাদিকা মহাসৰিতা.

৫-৭. পঠমআজানীযসুত্তাদিৱণ্ণনা

৯৭-৯৯. পঞ্চমে অঙ্গেহীতি গুণঙ্গেহি. ৰাজাৰহোতি ৰঞ্ঞো অৰহো অনুচ্ছৱিকো. ৰাজভোগ্গোতি ৰঞ্ঞো উপভোগভূতো. ৰঞ্ঞো অঙ্গন্তি ৰঞ্ঞো হত্থপাদাদিঅঙ্গসমতায অঙ্গন্তেৱ সঙ্খং গচ্ছতি. ৱণ্ণসম্পন্নোতি সৰীৰৱণ্ণেন সম্পন্নো. বলসম্পন্নোতি কাযবলেন সম্পন্নো. আহুনেয্যোতি আহুতিসঙ্খাতং পিণ্ডপাতং পটিগ্গহেতুং যুত্তো. পাহুনেয্যোতি পাহুনকভত্তস্স অনুচ্ছৱিকো. দক্খিণেয্যোতি দসৱিধদানৱত্থুপৰিচ্চাগৱসেন সদ্ধাদানসঙ্খাতায দক্খিণায অনুচ্ছৱিকো. অঞ্জলিকৰণীযোতি অঞ্জলিপগ্গহণস্স অনুচ্ছৱিকো. অনুত্তৰং পুঞ্ঞক্খেত্তং লোকস্সাতি সব্বলোকস্স অসদিসং পুঞ্ঞৱিৰুহনট্ঠানং.

ৱণ্ণসম্পন্নোতি গুণৱণ্ণেন সম্পন্নো. বলসম্পন্নোতি ৱীৰিযবলেন সম্পন্নো. জৱসম্পন্নোতি ঞাণজৱেন সম্পন্নো. থামৱাতি ঞাণথামেন সমন্নাগতো. দড়্হপৰক্কমোতি থিৰপৰক্কমো. অনিক্খিত্তধুৰোতি অট্ঠপিতধুৰো পগ্গহিতধুৰো, অগ্গফলং অৰহত্তং অপ্পত্ৱা ৱীৰিযধুৰং ন নিক্খিপিস্সামীতি এৱং পটিপন্নো. ইমস্মিং সুত্তে চতুসচ্চৱসেন সোতাপত্তিমগ্গো, সোতাপত্তিমগ্গেন চ ঞাণজৱসম্পন্নতা কথিতাতি. ছট্ঠে তীণি চ মগ্গানি তীণি চ ফলানি, তীহি মগ্গফলেহি চ ঞাণজৱসম্পন্নতা কথিতা. সত্তমে অৰহত্তফলং, অৰহত্তফলেনেৱ চ মগ্গকিচ্চং কথিতং. ফলং পন জৱিতজৱেন উপ্পজ্জনতো জৱোতি চ ৱত্তুং ৱট্টতি.

৮. পোত্থকসুত্তৱণ্ণনা

১০০. অট্ঠমে নৱোতি কৰণং উপাদায ৱুচ্চতি. পোত্থকোতি ৱাকমযৱত্থং. মজ্ঝিমোতি পৰিভোগমজ্ঝিমো. জিণ্ণোতি পৰিভোগজিণ্ণো. উক্খলিপৰিমজ্জনন্তি উক্খলিপৰিপুঞ্ছনং দুস্সীলোতি নিস্সীলো. দুব্বণ্ণতাযাতি গুণৱণ্ণাভাৱেন দুব্বণ্ণতায. দিট্ঠানুগতিং আপজ্জন্তীতি তেন কতং অনুকৰোন্তি. ন মহপ্ফলং হোতীতি ৱিপাকফলেন মহপ্ফলং ন হোতি. ন মহানিসংসন্তি ৱিপাকানিসংসেনেৱ ন মহানিসংসং. অপ্পগ্ঘতাযাতি ৱিপাকগ্ঘেন অপ্পগ্ঘতায. কাসিকং ৱত্থন্তি তীহি কপ্পাসঅংসূহি সুত্তং কন্তিত্ৱা কতৱত্থং, তঞ্চ খো কাসিৰট্ঠেযেৱ উট্ঠিতং. সেসং উত্তানমেৱ. সীলং পনেত্থ মিস্সকং কথিতন্তি.

৯. লোণকপল্লসুত্তৱণ্ণনা

১০১. নৱমে যথা যথাযন্তি যথা যথা অযং. তথা তথা তন্তি তথা তথা তং কম্মং. ইদং ৱুত্তং হোতি – যো এৱং ৱদেয্য – ‘‘যথা যথা কম্মং কৰোতি, তথা তথাস্স ৱিপাকং পটিসংৱেদিযতেৱ. ন হি সক্কা কতস্স কম্মস্স ৱিপাকং পটিসেধেতুং. তস্মা যত্তকং কম্মং কৰোতি, তত্তকস্স ৱিপাকং পটিসংৱেদিযতেৱা’’তি. এৱং সন্তন্তি এৱং সন্তে. ব্ৰহ্মচৰিযৱাসো ন হোতীতি যং মগ্গভাৱনতো পুব্বে উপপজ্জৱেদনীযং কম্মং কতং, তস্স অৱস্সং পটিসংৱেদনীযত্তা ব্ৰহ্মচৰিযং ৱুত্থম্পি অৱুত্থমেৱ হোতি. ওকাসো ন পঞ্ঞাযতি সম্মা দুক্খস্স অন্তকিৰিযাযাতি যস্মা চ এৱং সন্তে তেন কম্মাযূহনঞ্চেৱ ৱিপাকানুভৱনা চ হোতি, তস্মা হেতুনা নযেন ৱট্টদুক্খস্স অন্তকিৰিযায ওকাসো ন পঞ্ঞাযতি নাম.

যথা যথা ৱেদনীযন্তি যেন যেনাকাৰেন ৱেদিতব্বং. তথা তথাস্স ৱিপাকং পটিসংৱেদিযতীতি তেন তেনাকাৰেন অস্স ৱিপাকং পচ্চনুভোতি. ইদং ৱুত্তং হোতি – যদেতং সত্তসু জৱনেসু পঠমজৱনকম্মং সতি পচ্চযে ৱিপাকৱাৰং লভন্তমেৱ দিট্ঠধম্মৱেদনীযং হোতি, অসতি অহোসিকম্মং নাম. যঞ্চ সত্তমজৱনকম্মং সতি পচ্চযে উপপজ্জৱেদনীযং হোতি, অসতি অহোসিকম্মং নাম. যঞ্চ মজ্ঝে পঞ্চজৱনকম্মং যাৱ সংসাৰপ্পৱত্তি, তাৱ অপৰপৰিযাযৱেদনীযং নাম হোতি. এতেসু আকাৰেসু যেন যেনাকাৰেন ৱেদিতব্বং কম্মং অযং পুৰিসো কৰোতি, তেন তেনেৱস্স ৱিপাকং পটিসংৱেদিযতি নাম. অট্ঠকথাযঞ্হি লদ্ধৱিপাকৱাৰমেৱ কম্মং যথাৱেদনীযং কম্মং নামাতি ৱুত্তং. এৱং সন্তং, ভিক্খৱে, ব্ৰহ্মচৰিযৱাসো হোতীতি কম্মক্খযকৰস্স ব্ৰহ্মচৰিযস্স খেপেতব্বকম্মসম্ভৱতো ৱাসো নাম হোতি, ৱুত্থং সুৱুত্থমেৱ হোতীতি অত্থো. ওকাসো পঞ্ঞাযতি সম্মা দুক্খস্স অন্তকিৰিযাযাতি যস্মা এৱং সন্তে তেন তেন মগ্গেন অভিসঙ্খাৰৱিঞ্ঞাণস্স নিৰোধেন তেসু তেসু ভৱেসু আযতিং ৱট্টদুক্খং ন উপ্পজ্জতি, তস্মা ওকাসো পঞ্ঞাযতি সম্মা দুক্খস্স অন্তকিৰিযায.

ইদানি তং যথাৱেদনীযকম্মসভাৱং দস্সেন্তো ইধ, ভিক্খৱে, একচ্চস্সাতিআদিমাহ. তত্থ অপ্পমত্তকন্তি পৰিত্তং থোকং মন্দং লামকং. তাদিসংযেৱাতি তংসৰিক্খকমেৱ. দিট্ঠধম্মৱেদনীযন্তি তস্মিং কম্মেযেৱ দিট্ঠধম্মে ৱিপচ্চিতব্বং ৱিপাকৱাৰং লভন্তং দিট্ঠধম্মৱেদনীযং হোতি. নাণুপি খাযতীতি দুতিযে অত্তভাৱে অণুপি ন খাযতি, অণুমত্তম্পি দুতিযে অত্তভাৱে ৱিপাকং ন দেতীতি অত্থো. বহুদেৱাতি বহুকং পন ৱিপাকং কিমেৱ দস্সতীতি অধিপ্পাযো. অভাৱিতকাযোতিআদীহি কাযভাৱনাৰহিতো ৱট্টগামী পুথুজ্জনো দস্সিতো. পৰিত্তোতি পৰিত্তগুণো. অপ্পাতুমোতি আতুমা ৱুচ্চতি অত্তভাৱো, তস্মিং মহন্তেপি গুণপৰিত্ততায অপ্পাতুমোযেৱ. অপ্পদুক্খৱিহাৰীতি অপ্পকেনপি পাপেন দুক্খৱিহাৰী. ভাৱিতকাযোতিআদীহি খীণাসৱো দস্সিতো. সো হি কাযানুপস্সনাসঙ্খাতায কাযভাৱনায ভাৱিতকাযো নাম. কাযস্স ৱা ৱড্ঢিতত্তা ভাৱিতকাযো. ভাৱিতসীলোতি ৱড্ঢিতসীলো. সেসপদদ্ৱযেপি এসেৱ নযো. পঞ্চদ্ৱাৰভাৱনায ৱা ভাৱিতকাযো. এতেন ইন্দ্ৰিযসংৱৰসীলং ৱুত্তং, ভাৱিতসীলোতি ইমিনা সেসানি তীণি সীলানি. অপৰিত্তোতি ন পৰিত্তগুণো. মহত্তোতি অত্তভাৱে পৰিত্তেপি গুণমহন্ততায মহত্তো. অপ্পমাণৱিহাৰীতি খীণাসৱস্সেতং নামমেৱ. সো হি পমাণকৰানং ৰাগাদীনং অভাৱেন অপ্পমাণৱিহাৰী নাম.

পৰিত্তেতি খুদ্দকে. উদকমল্লকেতি উদকসৰাৱে. ওৰব্ভিকোতি উৰব্ভসামিকো. উৰব্ভঘাতকোতি সূনকাৰো. জাপেতুং ৱাতি ধনজানিযা জাপেতুং. ঝাপেতুন্তিপি পাঠো, অযমেৱত্থো. যথাপচ্চযং ৱা কাতুন্তি যথা ইচ্ছতি, তথা কাতুং. উৰব্ভধনন্তি এড়কঅগ্ঘনকমূলং. সো পনস্স সচে ইচ্ছতি, দেতি. নো চে ইচ্ছতি, গীৱাযং গহেত্ৱা নিক্কড্ঢাপেতি. সেসং ৱুত্তনযেনেৱ ৱেদিতব্বং. ইমস্মিং পন সুত্তে ৱট্টৱিৱট্টং কথিতন্তি.

১০. পংসুধোৱকসুত্তৱণ্ণনা

১০২. দসমে ধোৱতীতি ৱিক্খালেতি. সন্ধোৱতীতি সুট্ঠু ধোৱতি, পুনপ্পুনং ধোৱতি. নিদ্ধোৱতীতি নিগ্গণ্হিত্ৱা ধোৱতি. অনিদ্ধন্তকসাৱন্তি অনীহতদোসং অনপনীতকসাৱং. পভঙ্গূতি পভিজ্জনসভাৱং, অধিকৰণীযং ঠপেত্ৱা মুট্ঠিকায পহটমত্তং ভিজ্জতি. পট্টিকাযাতি সুৱণ্ণপট্টকায. গীৱেয্যকেতি গীৱালঙ্কাৰে.

অধিচিত্তন্তি সমথৱিপস্সনাচিত্তং. অনুযুত্তস্সাতি ভাৱেন্তস্স. সচেতসোতি চিত্তসম্পন্নো. দব্বজাতিকোতি পণ্ডিতজাতিকো. কামৱিতক্কাদীসু কামে আৰব্ভ উপ্পন্নো ৱিতক্কো কামৱিতক্কো. ব্যাপাদৱিহিংসসম্পযুত্তা ৱিতক্কা ব্যাপাদৱিহিংসৱিতক্কা নাম. ঞাতিৱিতক্কাদীসু ‘‘অম্হাকং ঞাতকা বহূ পুঞ্ঞৱন্তা’’তিআদিনা নযেন ঞাতকে আৰব্ভ উপ্পন্নো ৱিতক্কো ঞাতিৱিতক্কো. ‘‘অসুকো জনপদো খেমো সুভিক্খো’’তিআদিনা নযেন জনপদমাৰব্ভ উপ্পন্নো ৱিতক্কো জনপদৱিতক্কো. ‘‘অহো ৱত মং পৰে ন অৱজানেয্যু’’ন্তি এৱং উপ্পন্নো ৱিতক্কো অনৱঞ্ঞত্তিপটিসংযুত্তো ৱিতক্কো নাম. ধম্মৱিতক্কাৱসিস্সন্তীতি ধম্মৱিতক্কা নাম দসৱিপস্সনুপক্কিলেসৱিতক্কা. সো হোতি সমাধি ন চেৱ সন্তোতি সো অৱসিট্ঠধম্মৱিতক্কো ৱিপস্সনাসমাধি অৱূপসন্তকিলেসত্তা সন্তো ন হোতি. ন পণীতোতি ন অতপ্পকো. নপ্পটিপ্পস্সদ্ধিলদ্ধোতি ন কিলেসপটিপ্পস্সদ্ধিযা লদ্ধো. ন একোদিভাৱাধিগতোতি ন একগ্গভাৱপ্পত্তো. সসঙ্খাৰনিগ্গয্হৱাৰিতগতোতি সসঙ্খাৰেন সপ্পযোগেন কিলেসে নিগ্গণ্হিত্ৱা ৱাৰেত্ৱা ৱাৰিতো, ন কিলেসানং ছিন্নন্তে উপ্পন্নো, কিলেসে পন ৱাৰেত্ৱা উপ্পন্নো.

হোতি সো, ভিক্খৱে, সমযোতি এত্থ সমযো নাম উতুসপ্পাযং আহাৰসপ্পাযং সেনাসনসপ্পাযং পুগ্গলসপ্পাযং ধম্মস্সৱনসপ্পাযন্তি ইমেসং পঞ্চন্নং সপ্পাযানং পটিলাভকালো. যং তং চিত্তন্তি যস্মিং সমযে তং ৱিপস্সনাচিত্তং. অজ্ঝত্তংযেৱ সন্তিট্ঠতীতি অত্তনিযেৱ তিট্ঠতি. নিযকজ্ঝত্তঞ্হি ইধ অজ্ঝত্তং নাম. গোচৰজ্ঝত্তম্পি ৱট্টতি. পুথুত্তাৰম্মণং পহায একস্মিং নিব্বানগোচৰেযেৱ তিট্ঠতীতি ৱুত্তং হোতি. সন্নিসীদতীতি সুট্ঠু নিসীদতি. একোদি হোতীতি একগ্গং হোতি. সমাধিযতীতি সম্মা আধিযতি. সন্তোতিআদীসু পচ্চনীককিলেসৱূপসমেন সন্তো. অতপ্পকট্ঠেন পণীতো. কিলেসপটিপ্পস্সদ্ধিযা লদ্ধত্তা পটিপ্পস্সদ্ধলদ্ধো. একগ্গভাৱং গতত্তা একোদিভাৱাধিগতো. কিলেসানং ছিন্নন্তে উপ্পন্নত্তা ন সপ্পযোগেন কিলেসে নিগ্গণ্হিত্ৱা ৱাৰেত্ৱা ৱাৰিতোতি ন সসঙ্খাৰনিগ্গয্হৱাৰিতগতো. এত্তাৱতা অযং ভিক্খু ৱিৱট্টেত্ৱা অৰহত্তং পত্তো নাম হোতি.

ইদানি খীণাসৱস্স সতো অভিঞ্ঞাপটিপদং দস্সেন্তো যস্স যস্স চাতিআদিমাহ. তত্থ অভিঞ্ঞা সচ্ছিকৰণীযস্সাতি অভিজানিত্ৱা পচ্চক্খং কাতব্বস্স. সতি সতিআযতনেতি পুব্বহেতুসঙ্খাতে চেৱ ইদানি চ পটিলদ্ধব্বে অভিঞ্ঞাপাদকজ্ঝানাদিভেদে চ সতি সতিকাৰণে. ৱিত্থাৰতো পন অযং অভিঞ্ঞাকথা ৱিসুদ্ধিমগ্গে (ৱিসুদ্ধি. ২.৩৬৫ আদযো) ৱুত্তনযেনেৱ ৱেদিতব্বা. আসৱানং খযাতিআদি চেত্থ ফলসমাপত্তিৱসেন ৱুত্তন্তি ৱেদিতব্বং.

১১. নিমিত্তসুত্তৱণ্ণনা

১০৩. একাদসমেপি অধিচিত্তং সমথৱিপস্সনাচিত্তমেৱ. তীণি নিমিত্তানীতি তীণি কাৰণানি. কালেন কালন্তি কালে কালে, যুত্তকালেতি অত্থো. কালেন কালং সমাধিনিমিত্তং মনসিকাতব্বন্তিআদীসু তং তং কালং সল্লক্খেত্ৱা একগ্গতায যুত্তকালে একগ্গতা মনসিকাতব্বা. একগ্গতা হি ইধ সমাধিনিমিত্তন্তি ৱুত্তা. তত্ৰ ৱচনত্থো – সমাধিযেৱ নিমিত্তং সমাধিনিমিত্তং. সেসপদদ্ৱযেপি এসেৱ নযো. পগ্গহোতি পন ৱীৰিযস্স নামং, উপেক্খাতি মজ্ঝত্তভাৱস্স. তস্মা ৱীৰিযস্স যুত্তকালে ৱীৰিযং মনসিকাতব্বং, মজ্ঝত্তভাৱস্স যুত্তকালে মজ্ঝত্তভাৱে ঠাতব্বন্তি. ঠানং তং চিত্তং কোসজ্জায সংৱত্তেয্যাতি কাৰণং ৱিজ্জতি যেন তং চিত্তং কোসজ্জভাৱে তিট্ঠেয্য. ইতৰেসুপি এসেৱ নযো. উপেক্খানিমিত্তংযেৱ মনসি কৰেয্যাতি এত্থ চ ঞাণজৱং উপেক্খেয্যাতি অযমত্থো. আসৱানং খযাযাতি অৰহত্তফলত্থায.

উক্কং বন্ধেয্যাতি অঙ্গাৰকপল্লং সজ্জেয্য. আলিম্পেয্যাতি তত্থ অঙ্গাৰে পক্খিপিত্ৱা অগ্গিং দত্ৱা নাড়িকায ধমন্তো অগ্গিং গাহাপেয্য. উক্কামুখে পক্খিপেয্যাতি অঙ্গাৰে ৱিযূহিত্ৱা অঙ্গাৰমত্থকে ৱা ঠপেয্য, মূসায ৱা পক্খিপেয্য. অজ্ঝুপেক্খতীতি পক্কাপক্কভাৱং উপধাৰেতি.

সম্মা সমাধিযতি আসৱানং খযাযাতি অৰহত্তফলত্থায সম্মা ঠপীযতি. এত্তাৱতা হি ৱিপস্সনং ৱড্ঢেত্ৱা অৰহত্তপ্পত্তো ভিক্খু দস্সিতো. ইদানি তস্স খীণাসৱস্স অভিঞ্ঞায পটিপদং দস্সেন্তো যস্স যস্স চাতিআদিমাহ. তং হেট্ঠা ৱুত্তনযেনেৱ ৱেদিতব্বং.

লোণকপল্লৱগ্গো পঞ্চমো.