(৯) ৪. সমণৱগ্গো

১. সমণসুত্তৱণ্ণনা

৮২. চতুত্থস্স পঠমে সমণিযানীতি সমণসন্তকানি. সমণকৰণীযানীতি সমণেন কত্তব্বকিচ্চানি. অধিসীলসিক্খাসমাদানন্তিআদীসু সমাদানং ৱুচ্চতি গহণং, অধিসীলসিক্খায সমাদানং গহণং পূৰণং অধিসীলসিক্খাসমাদানং. সেসপদদ্ৱযেপি এসেৱ নযো. এত্থ চ সীলং অধিসীলং, চিত্তং অধিচিত্তং, পঞ্ঞা অধিপঞ্ঞাতি অযং ৱিভাগো ৱেদিতব্বো. তত্থ পঞ্চসীলং সীলং নাম, তং উপাদায দসসীলং অধিসীলং নাম, তম্পি উপাদায চতুপাৰিসুদ্ধিসীলং অধিসীলং নাম. অপিচ সব্বম্পি লোকিযসীলং সীলং নাম, লোকুত্তৰসীলং অধিসীলং, তদেৱ সিক্খিতব্বতো সিক্খাতি ৱুচ্চতি. কামাৱচৰচিত্তং পন চিত্তং নাম, তং উপাদায ৰূপাৱচৰং অধিচিত্তং নাম, তম্পি উপাদায অৰূপাৱচৰং অধিচিত্তং নাম. অপিচ সব্বম্পি লোকিযচিত্তং চিত্তমেৱ, লোকুত্তৰং অধিচিত্তং. পঞ্ঞাযপি এসেৱ নযো. তস্মাতি যস্মা ইমানি তীণি সমণকৰণীযানি, তস্মা. তিব্বোতি বহলো. ছন্দোতি কত্তুকম্যতাকুসলচ্ছন্দো. ইতি ইমস্মিং সুত্তন্তে তিস্সো সিক্খা লোকিযলোকুত্তৰা কথিতাতি.

২. গদ্ৰভসুত্তৱণ্ণনা

৮৩. দুতিযে পিট্ঠিতো পিট্ঠিতোতি পচ্ছতো পচ্ছতো. অহম্পি দম্মো অহম্পি দম্মোতি অহম্পি ‘‘দম্মো দম্মমানো’’তি ৱদমানো গাৱীতি. সেয্যথাপি গুন্নন্তি যথা গাৱীনং. গাৱো হি কাড়াপি ৰত্তাপি সেতাদিৱণ্ণাপি হোন্তি, গদ্ৰভস্স পন তাদিসো ৱণ্ণো নাম নত্থি. যথা চ ৱণ্ণো, এৱং সৰোপি পদম্পি অঞ্ঞাদিসমেৱ. সেসং উত্তানত্থমেৱ. ইমস্মিম্পি সুত্তে তিস্সো সিক্খা মিস্সিকাৱ কথিতাতি.

৩. খেত্তসুত্তৱণ্ণনা

৮৪. ততিযে পটিকচ্চেৱাতি পঠমমেৱ. সুকট্ঠং কৰোতীতি নঙ্গলেন সুকট্ঠং কৰোতি. সুমতিকতন্তি মতিযা সুট্ঠু সমীকতং. কালেনাতি ৱপিতব্বযুত্তকালেন. সেসং উত্তানমেৱ. ইধাপি তিস্সো সিক্খা মিস্সিকাৱ কথিতা.

৪. ৱজ্জিপুত্তসুত্তৱণ্ণনা

৮৫. চতুত্থে ৱজ্জিপুত্তকোতি ৱজ্জিৰাজকুলস্স পুত্তো. দিযড্ঢসিক্খাপদসতন্তি পণ্ণাসাধিকং সিক্খাপদসতং. তস্মিং সমযে পঞ্ঞত্তানি সিক্খাপদানেৱ সন্ধাযেতং ৱুত্তং. সো কিৰ ভিক্খু অজ্জৱসম্পন্নো উজুজাতিকো অৱঙ্কো অকুটিলো, তস্মা ‘‘অহং এত্তকানি সিক্খাপদানি ৰক্খিতুং সক্কুণেয্যং ৱা ন ৱা’’তি চিন্তেত্ৱা সত্থু আৰোচেসি. সক্কোমহন্তি সক্কোমি অহং. সো কিৰ ‘‘এত্তকেসু সিক্খাপদেসু সিক্খন্তস্স অগৰু তীসু সিক্খাসু সিক্খিতু’’ন্তি মঞ্ঞমানো এৱমাহ. অথ ভগৱা যথা নাম পঞ্ঞাস তিণকলাপিযো উক্খিপিতুং অসক্কোন্তস্স কলাপিযসতং বন্ধিত্ৱা সীসে ঠপেয্য, এৱমেৱ একিস্সাপি সিক্খায সিক্খিতুং অসক্কোন্তস্স অপৰা দ্ৱেপি সিক্খা উপৰি পক্খিপন্তো তস্মাতিহ ত্ৱং ভিক্খূতিআদিমাহ. সুখুমালো কিৰ উত্তৰো নাম জানপদমনুস্সো লোহপাসাদৱিহাৰে ৱসতি. অথ নং দহৰভিক্খূ আহংসু – ‘‘উত্তৰ, অগ্গিসালা ওৱস্সতি, তিণং কপ্পিযং কত্ৱা দেহী’’তি. তং আদায অটৱিং গন্ত্ৱা তেন লাযিতং তিণংযেৱ কৰড়ে বন্ধিত্ৱা ‘‘পঞ্ঞাস কৰড়ে গহেতুং সক্খিস্সসি উত্তৰা’’তি আহংসু. সো ‘‘ন সক্খিস্সামী’’তি আহ. অসীতিং পন সক্খিস্সসীতি? ন সক্খিস্সামি, ভন্তেতি. একং কৰড়সতং সক্খিস্সসীতি? আম, ভন্তে, গণ্হিস্সামীতি. দহৰভিক্খূ কৰড়সতং বন্ধিত্ৱা তস্স সীসে ঠপযিংসু. সো উক্খিপিত্ৱা নিত্থুনন্তো গন্ত্ৱা অগ্গিসালায সমীপে পাতেসি. অথ নং ভিক্খূ ‘‘কিলন্তৰূপোসি উত্তৰা’’তি আহংসু. আম, ভন্তে, দহৰা ভিক্খূ মং ৱঞ্চেসুং, ইমং একম্পি কৰড়সতং উক্খিপিতুং অসক্কোন্তং মং ‘‘পণ্ণাস কৰড়ে উক্খিপাহী’’তি ৱদিংসু. আম, উত্তৰ, ৱঞ্চযিংসু তন্তি. এৱং সম্পদমিদং ৱেদিতব্বং. ইধাপি তিস্সো সিক্খা মিস্সিকাৱ কথিতা.

৫. সেক্খসুত্তৱণ্ণনা

৮৬. পঞ্চমে উজুমগ্গানুসাৰিনোতি উজুমগ্গো ৱুচ্চতি অৰিযমগ্গো, তং অনুস্সৰন্তস্স পটিপন্নকস্সাতি অত্থো. খযস্মিং পঠমং ঞাণন্তি পঠমমেৱ মগ্গঞাণং উপ্পজ্জতি. মগ্গো হি কিলেসানং খেপনতো খযো নাম, তংসম্পযুত্তং ঞাণং খযস্মিং ঞাণং নাম. ততো অঞ্ঞা অনন্তৰাতি ততো চতুত্থমগ্গঞাণতো অনন্তৰা অঞ্ঞা উপ্পজ্জতি, অৰহত্তফলং উপ্পজ্জতীতি অত্থো. অঞ্ঞাৱিমুত্তস্সাতি অৰহত্তফলৱিমুত্তিযা ৱিমুত্তস্স. ঞাণং ৱে হোতীতি পচ্চৱেক্খণঞাণং হোতি. ইতি সুত্তেপি গাথাসুপি সত্ত সেখা কথিতা. অৱসানে পন খীণাসৱো দস্সিতোতি.

৬. পঠমসিক্খাসুত্তৱণ্ণনা

৮৭. ছট্ঠে অত্তকামাতি অত্তনো হিতকামা. যত্থেতং সব্বং সমোধানং গচ্ছতীতি যাসু সিক্খাসু সব্বমেতং দিযড্ঢসিক্খাপদসতং সঙ্গহং গচ্ছতি. পৰিপূৰকাৰী হোতীতি সমত্তকাৰী হোতি. মত্তসো কাৰীতি পমাণেন কাৰকো, সব্বেন সব্বং কাতুং ন সক্কোতীতি অত্থো. খুদ্দানুখুদ্দকানীতি চত্তাৰি পাৰাজিকানি ঠপেত্ৱা সেসসিক্খাপদানি. তত্ৰাপি সঙ্ঘাদিসেসং খুদ্দকং, থুল্লচ্চযং অনুখুদ্দকং নাম. থুল্লচ্চযঞ্চ খুদ্দকং, পাচিত্তিযং অনুখুদ্দকং নাম, পাচিত্তিযঞ্চ খুদ্দকং, পাটিদেসনিযদুক্কটদুব্ভাসিতানি অনুখুদ্দকানি নাম. ইমে পন অঙ্গুত্তৰমহানিকাযৱড়ঞ্জনকআচৰিযা ‘‘চত্তাৰি পাৰাজিকানি ঠপেত্ৱা সেসানি সব্বানিপি খুদ্দানুখুদ্দকানী’’তি ৱদন্তি. তানি আপজ্জতিপি ৱুট্ঠাতিপীতি এত্থ পন খীণাসৱো তাৱ লোকৱজ্জং নাপজ্জতি, পণ্ণত্তিৱজ্জমেৱ আপজ্জতি. আপজ্জন্তো চ কাযেনপি ৱাচাযপি চিত্তেনপি আপজ্জতি. কাযেন আপজ্জন্তো কুটিকাৰসহসেয্যাদীনি আপজ্জতি, ৱাচায আপজ্জন্তো সঞ্চৰিত্তপদসোধম্মাদীনি, চিত্তেন আপজ্জন্তো ৰূপিযপটিগ্গহণং আপজ্জতি. সেক্খেসুপি এসেৱ নযো. ন হি মেত্থ, ভিক্খৱে, অভব্বতা ৱুত্তাতি, ভিক্খৱে, ন হি মযা এত্থ এৱৰূপং আপত্তিং আপজ্জনে চ ৱুট্ঠানে চ অৰিযপুগ্গলস্স অভব্বতা কথিতা. আদিব্ৰহ্মচৰিযকানীতি মগ্গব্ৰহ্মচৰিযস্স আদিভূতানি চত্তাৰি মহাসীলসিক্খাপদানি. ব্ৰহ্মচৰিযসাৰুপ্পানীতি তানিযেৱ চতুমগ্গব্ৰহ্মচৰিযস্স সাৰুপ্পানি অনুচ্ছৱিকানি. তত্থাতি তেসু সিক্খাপদেসু. ধুৱসীলোতি নিবদ্ধসীলো. ঠিতসীলোতি পতিট্ঠিতসীলো. সোতাপন্নোতি সোতসঙ্খাতেন মগ্গেন ফলং আপন্নো. অৱিনিপাতধম্মোতি চতূসু অপাযেসু অপতনসভাৱো. নিযতোতি সোতাপত্তিমগ্গনিযামেন নিযতো. সম্বোধিপৰাযণোতি উপৰিমগ্গত্তযসম্বোধিপৰাযণো.

তনুত্তাতি তনুভাৱো. সকদাগামিনো হি ৰাগাদযো অব্ভপটলং ৱিয মচ্ছিকাপত্তং ৱিয চ তনুকা হোন্তি, ন বহলা. ওৰম্ভাগিযানন্তি হেট্ঠাভাগিযানং. সংযোজনানন্তি বন্ধনানং. পৰিক্খযাতি পৰিক্খযেন. ওপপাতিকো হোতীতি উপ্পন্নকো হোতি. তত্থ পৰিনিব্বাযীতি হেট্ঠা অনোতৰিত্ৱা উপৰিযেৱ পৰিনিব্বানধম্মো. অনাৱত্তিধম্মোতি যোনিগতিৱসেন অনাগমনধম্মো.

পদেসং পদেসকাৰীতিআদীসু পদেসকাৰী পুগ্গলো নাম সোতাপন্নো চ সকদাগামী চ অনাগামী চ, সো পদেসমেৱ সম্পাদেতি. পৰিপূৰকাৰী নাম অৰহা, সো পৰিপূৰমেৱ সম্পাদেতি. অৱঞ্ঝানীতি অতুচ্ছানি সফলানি সউদ্ৰযানীতি অত্থো. ইধাপি তিস্সো সিক্খা মিস্সকাৱ কথিতা.

৭. দুতিযসিক্খাসুত্তৱণ্ণনা

৮৮. সত্তমে কোলংকোলোতি কুলা কুলং গমনকো. কুলন্তি চেত্থ ভৱো অধিপ্পেতো, তস্মা ‘‘দ্ৱে ৱা তীণি ৱা কুলানী’’তি এত্থপি দ্ৱে ৱা তযো ৱা ভৱেতি অত্থো ৱেদিতব্বো. অযঞ্হি দ্ৱে ৱা ভৱে সন্ধাৱতি তযো ৱা, উত্তমকোটিযা ছ ৱা. তস্মা দ্ৱে ৱা তীণি ৱা চত্তাৰি ৱা পঞ্চ ৱা ছ ৱাতি এৱমেত্থ ৱিকপ্পো দট্ঠব্বো. একবীজীতি একস্সেৱ ভৱস্স বীজং এতস্স অত্থীতি একবীজী. উদ্ধংসোতোতিআদীসু অত্থি উদ্ধংসোতো অকনিট্ঠগামী, অত্থি উদ্ধংসোতো ন অকনিট্ঠগামী, অত্থি ন উদ্ধংসোতো অকনিট্ঠগামী, অত্থি ন উদ্ধংসোতো ন অকনিট্ঠগামী. তত্থ যো ইধ অনাগামিফলং পত্ৱা অৱিহাদীসু নিব্বত্তো তত্থ যাৱতাযুকং ঠত্ৱা উপৰূপৰি নিব্বত্তিত্ৱা অকনিট্ঠং পাপুণাতি, অযং উদ্ধংসোতো অকনিট্ঠগামী নাম. যো পন অৱিহাদীসু নিব্বত্তো তত্থেৱ অপৰিনিব্বাযিত্ৱা অকনিট্ঠম্পি অপ্পত্ৱা উপৰিমব্ৰহ্মলোকে পৰিনিব্বাযতি, অযং উদ্ধংসোতো ন অকনিট্ঠগামী নাম. যো ইতো চৱিত্ৱা অকনিট্ঠেযেৱ নিব্বত্ততি, অযং ন উদ্ধংসোতো অকনিট্ঠগামী নাম. যো পন অৱিহাদীসু চতূসু অঞ্ঞতৰস্মিং নিব্বত্তিত্ৱা তত্থেৱ পৰিনিব্বাযতি, অযং ন উদ্ধংসোতো ন অকনিট্ঠগামী নাম.

যত্থ কত্থচি উপ্পন্নো পন সসঙ্খাৰেন সপ্পযোগেন অৰহত্তং পত্তো সসঙ্খাৰপৰিনিব্বাযী নাম. অসঙ্খাৰেন অপ্পযোগেন পত্তো অসঙ্খাৰপৰিনিব্বাযী নাম. যো পন কপ্পসহস্সাযুকেসু অৱিহেসু নিব্বত্তিত্ৱা পঞ্চমং কপ্পসতং অতিক্কমিত্ৱা অৰহত্তং পত্তো, অযং উপহচ্চপৰিনিব্বাযী নাম. অতপ্পাদীসুপি এসেৱ নযো. অন্তৰাপৰিনিব্বাযীতি যো আযুৱেমজ্ঝং অনতিক্কমিত্ৱা পৰিনিব্বাযতি, সো তিৱিধো হোতি. কপ্পসহস্সাযুকেসু তাৱ অৱিহেসু নিব্বত্তিত্ৱা একো নিব্বত্তদিৱসেযেৱ অৰহত্তং পাপুণাতি. নো চে নিব্বত্তদিৱসে পাপুণাতি, পঠমস্স পন কপ্পসতস্স মত্থকে পাপুণাতি, অযং পঠমো অন্তৰাপৰিনিব্বাযী. অপৰো এৱং অসক্কোন্তো দ্ৱিন্নং কপ্পসতানং মত্থকে পাপুণাতি, অযং দুতিযো. অপৰো এৱম্পি অসক্কোন্তো চতুন্নং কপ্পসতানং মত্থকে পাপুণাতি, অযং ততিযো অন্তৰাপৰিনিব্বাযী. সেসং ৱুত্তনযমেৱ.

ইমস্মিং পন ঠানে ঠত্ৱা চতুৱীসতি সোতাপন্না, দ্ৱাদস সকদাগামিনো, অট্ঠচত্তালীস অনাগামিনো, দ্ৱাদস চ অৰহন্তো কথেতব্বা. ইমস্মিং হি সাসনে সদ্ধাধুৰং পঞ্ঞাধুৰন্তি দ্ৱে ধুৰানি, দুক্খপটিপদাদন্ধাভিঞ্ঞাদযো চতস্সো পটিপদা. তত্থেকো সদ্ধাধুৰেন অভিনিৱিসিত্ৱা সোতাপত্তিফলং পত্ৱা একমেৱ ভৱং নিব্বত্তিত্ৱা দুক্খস্সন্তং কৰোতি, অযমেকো একবীজী. সো পটিপদাৱসেন চতুব্বিধো হোতি. যথা চেস, এৱং পঞ্ঞাধুৰেন অভিনিৱিট্ঠোপীতি অট্ঠ একবীজিনো. তথা কোলংকোলা সত্তক্খত্তুপৰমা চাতি ইমে চতুৱীসতি সোতাপন্না নাম. তীসু পন ৱিমোক্খেসু সুঞ্ঞতৱিমোক্খেন সকদাগামিভূমিং পত্তা চতুন্নং পটিপদানং ৱসেন চত্তাৰো সকদাগামিনো, তথা অনিমিত্তৱিমোক্খেন পত্তা চত্তাৰো, অপ্পণিহিতৱিমোক্খেন পত্তা চত্তাৰোতি ইমে দ্ৱাদস সকদাগামিনো. অৱিহেসু পন তযো অন্তৰাপৰিনিব্বাযিনো, একো উপহচ্চপৰিনিব্বাযী, একো উদ্ধংসোতো অকনিট্ঠগামীতি পঞ্চ অনাগামিনো, তে অসঙ্খাৰপৰিনিব্বাযিনো পঞ্চ, সসঙ্খাৰপৰিনিব্বাযিনো পঞ্চাতি দস হোন্তি, তথা অতপ্পাদীসু. অকনিট্ঠেসু পন উদ্ধংসোতো নত্থি, তস্মা তত্থ চত্তাৰো সসঙ্খাৰপৰিনিব্বাযী, চত্তাৰো অসঙ্খাৰপৰিনিব্বাযীতি অট্ঠ, ইমে অট্ঠচত্তালীস অনাগামিনো. যথা পন সকদাগামিনো, তথেৱ অৰহন্তোপি দ্ৱাদস ৱেদিতব্বা. ইধাপি তিস্সো সিক্খা মিস্সিকাৱ কথিতা.

৮. ততিযসিক্খাসুত্তৱণ্ণনা

৮৯. অট্ঠমে তং ৱা পন অনভিসম্ভৱং অপ্পটিৱিজ্ঝন্তি তং অৰহত্তং অপাপুণন্তো অপ্পটিৱিজ্ঝন্তো. ইমিনা নযেন সব্বট্ঠানেসু অত্থো ৱেদিতব্বো. ইধাপি তিস্সো সিক্খা মিস্সিকাৱ কথিতা. নৱমং উত্তানত্থমেৱ. ইধাপি তিস্সো সিক্খা মিস্সিকাৱ কথিতা.

১০. দুতিযসিক্খত্তযসুত্তৱণ্ণনা

৯১. দসমে আসৱানং খযাতি এত্থ অৰহত্তমগ্গো অধিপঞ্ঞাসিক্খা নাম. ফলং পন সিক্খিতসিক্খস্স উপ্পজ্জনতো সিক্খাতি ন ৱত্তব্বং.

যথা পুৰে তথা পচ্ছাতি যথা পঠমং তীসু সিক্খাসু সিক্খতি, পচ্ছা তথেৱ সিক্খতীতি অত্থো. দুতিযপদেপি এসেৱ নযো. যথা অধো তথা উদ্ধন্তি যথা হেট্ঠিমকাযং অসুভৱসেন পস্সতি, উপৰিমকাযম্পি তথেৱ ফৰতি. দুতিযপদেপি এসেৱ নযো. যথা দিৱা তথা ৰত্তিন্তি যথা দিৱা তিস্সো সিক্খা সিক্খতি, ৰত্তিম্পি তথেৱ সিক্খতীতি অত্থো. অভিভুয্য দিসা সব্বাতি সব্বা দিসা আৰম্মণৱসেন অভিভৱিত্ৱা. অপ্পমাণসমাধিনাতি অৰহত্তমগ্গসমাধিনা.

সেক্খন্তি সিক্খমানং সকৰণীযং. পটিপদন্তি পটিপন্নকং. সংসুদ্ধচাৰিযন্তি সংসুদ্ধচৰণং পৰিসুদ্ধসীলং. সম্বুদ্ধন্তি চতুসচ্চবুদ্ধং. ধীৰং পটিপদন্তগুন্তি খন্ধধীৰআযতনধীৰৱসেন ধীৰং ধিতিসম্পন্নং পটিপত্তিযা অন্তং গতং. ৱিঞ্ঞাণস্সাতি চৰিমকৱিঞ্ঞাণস্স. তণ্হাক্খযৱিমুত্তিনোতি তণ্হাক্খযৱিমুত্তিসঙ্খাতায অৰহত্তফলৱিমুত্তিযা সমন্নাগতস্স. পজ্জোতস্সেৱ নিব্বানন্তি পদীপনিব্বানং ৱিয. ৱিমোক্খো হোতি চেতসোতি চিত্তস্স ৱিমুত্তি ৱিমুচ্চনা অপ্পৱত্তিভাৱো হোতি. তণ্হাক্খযৱিমুত্তিনো হি খীণাসৱস্স চৰিমকৱিঞ্ঞাণনিৰোধেন পৰিনিব্বানং ৱিয চেতসো ৱিমোক্খো হোতি, ন গতট্ঠানং পঞ্ঞাযতি, অপণ্ণত্তিকভাৱূপগমোযেৱ হোতীতি অত্থো.

১১. সঙ্কৱাসুত্তৱণ্ণনা

৯২. একাদসমে সঙ্কৱা নাম কোসলানং নিগমোতি সঙ্কৱাতি এৱংনামকো কোসলৰট্ঠে নিগমো. আৱাসিকোতি ভাৰহাৰো নৱে আৱাসে সমুট্ঠাপেতি, পুৰাণে পটিজগ্গতি. সিক্খাপদপটিসংযুত্তাযাতি সিক্খাসঙ্খাতেহি পদেহি পটিসংযুত্তায, তীহি সিক্খাহি সমন্নাগতাযাতি অত্থো. সন্দস্সেতীতি সম্মুখে ৱিয কত্ৱা দস্সেতি. সমাদপেতীতি গণ্হাপেতি. সমুত্তেজেতীতি সমুস্সাহেতি. সম্পহংসেতীতি পটিলদ্ধগুণেহি ৱণ্ণং কথেন্তো ৱোদাপেতি. অধিসল্লিখতেতি অতিৱিয সল্লিখতি, অতিৱিয সল্লিখিতং কত্ৱা সণ্হং সণ্হং কথেতীতি অত্থো.

অচ্চযোতি অপৰাধো. মং অচ্চগমাতি মং অতিক্কম্ম অধিভৱিত্ৱা পৱত্তো. অহুদেৱ অক্খন্তীতি অহোসিযেৱ অনধিৱাসনা. অহু অপ্পচ্চযোতি অহোসি অতুট্ঠাকাৰো. পটিগ্গণ্হাতূতি খমতু. আযতিং সংৱৰাযাতি অনাগতে সংৱৰত্থায, পুন এৱৰূপস্স অপৰাধস্স দোসস্স খলিতস্স ৱা অকৰণত্থাযাতি অত্থো. তগ্ঘাতি একংসেন. যথাধম্মং পটিকৰোসীতি যথা ধম্মো ঠিতো, তথা কৰোসি, খমাপেসীতি ৱুত্তং হোতি. তং তে মযং পটিগ্গণ্হামাতি তং তৱ অপৰাধং মযং খমাম. ৱুদ্ধিহেসা, কস্সপ, অৰিযস্স ৱিনযেতি এসা কস্সপ বুদ্ধস্স ভগৱতো সাসনে ৱুদ্ধি নাম. কতমা? যাযং অচ্চযং অচ্চযতো দিস্ৱা যথাধম্মং পটিকৰিত্ৱা আযতিং সংৱৰাপজ্জনা. দেসনং পন পুগ্গলাধিট্ঠানং কৰোন্তো ‘‘যো অচ্চযং অচ্চযতো দিস্ৱা যথাধম্মং পটিকৰোতি, আযতিং সংৱৰং আপজ্জতী’’তি আহ. ন সিক্খাকামোতি তিস্সো সিক্খা ন কামেতি ন পত্থেতি ন পিহেতি. সিক্খাসমাদানস্সাতি সিক্খাপৰিপূৰণস্স. ন ৱণ্ণৱাদীতি গুণং ন কথেতি. কালেনাতি যুত্তপ্পযুত্তকালেন. সেসমেত্থ উত্তানত্থমেৱাতি.

সমণৱগ্গো চতুত্থো.