৩. মহানামসক্কসুত্তৱণ্ণনা

৭৪. ততিযে গিলানা ৱুট্ঠিতোতি গিলানো হুত্ৱা ৱুট্ঠিতো. গেলঞ্ঞাতি গিলানভাৱতো. উপসঙ্কমীতি ভুত্তপাতৰাসো মালাগন্ধাদীনি আদায মহাপৰিৱাৰপৰিৱুতো উপসঙ্কমি. বাহাযং গহেত্ৱাতি ন বাহাযং গহেত্ৱা আকড্ঢি, নিসিন্নাসনতো ৱুট্ঠায তস্স সন্তিকং গন্ত্ৱা দক্খিণবাহাযং অঙ্গুট্ঠকেন সঞ্ঞং দত্ৱা একমন্তং অপনেসীতি ৱেদিতব্বো. অথস্স ‘‘সেখম্পি খো, মহানাম, সীল’’ন্তিআদিনা নযেন সত্তন্নং সেখানং সীলঞ্চ সমাধিঞ্চ পঞ্ঞঞ্চ কথেত্ৱা উপৰি অৰহত্তফলৱসেন অসেখা সীলসমাধিপঞ্ঞাযো কথেন্তো – ‘‘সেখসমাধিতো সেখং ৱিপস্সনাঞাণং অসেখঞ্চ ফলঞাণং পচ্ছা, সেখৱিপস্সনাঞাণতো চ অসেখফলসমাধি পচ্ছা উপ্পজ্জতী’’তি দীপেসি. যানি পন সম্পযুত্তানি সমাধিঞাণানি, তেসং অপচ্ছা অপুৰে উপ্পত্তি ৱেদিতব্বাতি.