৯. অকুসলমূলসুত্তৱণ্ণনা

৭০. নৱমে অকুসলমূলানীতি অকুসলানং মূলানি, অকুসলানি চ তানি মূলানি চাতি ৱা অকুসলমূলানি. যদপি, ভিক্খৱে, লোভোতি যোপি, ভিক্খৱে, লোভো. তদপি অকুসলমূলন্তি সোপি অকুসলমূলং. অকুসলমূলং ৱা সন্ধায ইধ তম্পীতি অত্থো ৱট্টতিযেৱ. এতেনুপাযেন সব্বত্থ নযো নেতব্বো. অভিসঙ্খৰোতীতি আযূহতি সম্পিণ্ডেতি ৰাসিং কৰোতি. অসতা দুক্খং উপ্পাদযতীতি অভূতেন অৱিজ্জমানেন যংকিঞ্চি তস্স অভূতং দোসং ৱত্ৱা দুক্খং উপ্পাদেতি. ৱধেন ৱাতিআদি যেনাকাৰেন দুক্খং উপ্পাদেতি, তং দস্সেতুং ৱুত্তং. তত্থ জানিযাতি ধনজানিযা. পব্বাজনাযাতি গামতো ৱা ৰট্ঠতো ৱা পব্বাজনীযকম্মেন. বলৱম্হীতি অহমস্মি বলৱা. বলত্থো ইতিপীতি বলেন মে অত্থো ইতিপি, বলে ৱা ঠিতোম্হীতিপি ৱদতি.

অকালৱাদীতি কালস্মিং ন ৱদতি, অকালস্মিং ৱদতি নাম. অভূতৱাদীতি ভূতং ন ৱদতি, অভূতং ৱদতি নাম. অনত্থৱাদীতি অত্থং ন ৱদতি, অনত্থং ৱদতি নাম. অধম্মৱাদীতি ধম্মং ন ৱদতি, অধম্মং ৱদতি নাম. অৱিনযৱাদীতি ৱিনযং ন ৱদতি, অৱিনযং ৱদতি নাম.

তথা হাযন্তি তথা হি অযং. ন আতপ্পং কৰোতি তস্স নিব্বেঠনাযাতি তস্স অভূতস্স নিব্বেঠনত্থায ৱীৰিযং ন কৰোতি. ইতিপেতং অতচ্ছন্তি ইমিনাপি কাৰণেন এতং অতচ্ছং. ইতৰং তস্সেৱ ৱেৱচনং.

দুগ্গতি পাটিকঙ্খাতি নিৰযাদিকা দুগ্গতি ইচ্ছিতব্বা, সা অস্স অৱস্সভাৱিনী, তত্থানেন নিব্বত্তিতব্বন্তি অত্থো. উদ্ধস্তোতি উপৰি ধংসিতো. পৰিযোনদ্ধোতি সমন্তা ওনদ্ধো. অনযং আপজ্জতীতি অৱুড্ঢিং আপজ্জতি. ব্যসনং আপজ্জতীতি ৱিনাসং আপজ্জতি. গিম্হকালস্মিঞ্হি মালুৱাসিপাটিকায ফলিতায বীজানি উপ্পতিত্ৱা ৱটৰুক্খাদীনং মূলে পতন্তি. তত্থ যস্স ৰুক্খস্স মূলে তীসু দিসাসু তীণি বীজানি পতিতানি হোন্তি, তস্মিং ৰুক্খে পাৱুস্সকেন মেঘেন অভিৱট্ঠে তীহি বীজেহি তযো অঙ্কুৰা উট্ঠহিত্ৱা তং ৰুক্খং অল্লীযন্তি. ততো পট্ঠায ৰুক্খদেৱতাযো সকভাৱেন সণ্ঠাতুং ন সক্কোন্তি. তেপি অঙ্কুৰা ৱড্ঢমানা লতাভাৱং আপজ্জিত্ৱা তং ৰুক্খং অভিৰুহিত্ৱা সব্বৱিটপসাখাপসাখা সংসিব্বিত্ৱা তং ৰুক্খং উপৰি পৰিযোনন্ধন্তি. সো মালুৱালতাহি সংসিব্বিতো ঘনেহি মহন্তেহি মালুৱাপত্তেহি সঞ্ছন্নো দেৱে ৱা ৱস্সন্তে ৱাতে ৱা ৱাযন্তে তত্থ তত্থ পলুজ্জিত্ৱা খাণুমত্তমেৱ অৱসিস্সতি. তং সন্ধাযেতং ৱুত্তং.

এৱমেৱ খোতি এত্থ পন ইদং ওপম্মসংসন্দনং – সালাদীসু অঞ্ঞতৰৰুক্খো ৱিয হি অযং সত্তো দট্ঠব্বো, তিস্সো মালুৱালতা ৱিয তীণি অকুসলমূলানি, যাৱ ৰুক্খসাখা অসম্পত্তা, তাৱ তাসং লতানং উজুকং ৰুক্খাৰোহনং ৱিয লোভাদীনং দ্ৱাৰং অসম্পত্তকালো, সাখানুসাৰেন গমনকালো ৱিয দ্ৱাৰৱসেন গমনকালো, পৰিযোনদ্ধকালো ৱিয লোভাদীহি পৰিযুট্ঠিতকালো, খুদ্দকসাখানং পলুজ্জনকালো ৱিয দ্ৱাৰপ্পত্তানং কিলেসানং ৱসেন খুদ্দানুখুদ্দকা আপত্তিযো আপন্নকালো, মহাসাখানং পলুজ্জনকালো ৱিয গৰুকাপত্তিং আপন্নকালো, লতানুসাৰেন ওতিণ্ণেন উদকেন মূলেসু তিন্তেসু ৰুক্খস্স ভূমিযং পতনকালো ৱিয কমেন চত্তাৰি পাৰাজিকানি আপজ্জিত্ৱা চতূসু অপাযেসু নিব্বত্তনকালো দট্ঠব্বো.

সুক্কপক্খো ৱুত্তৱিপল্লাসেন ৱেদিতব্বো. এৱমেৱ খোতি এত্থ পন ইদং ওপম্মসংসন্দনং – সালাদীসু অঞ্ঞতৰৰুক্খো ৱিয অযং সত্তো দট্ঠব্বো, তিস্সো মালুৱালতা ৱিয তীণি অকুসলমূলানি, তাসং অপ্পৱত্তিং কাতুং আগতপুৰিসো ৱিয যোগাৱচৰো, কুদ্দালো ৱিয পঞ্ঞা, কুদ্দালপিটকং ৱিয সদ্ধাপিটকং, পলিখননখণিত্তি ৱিয ৱিপস্সনাপঞ্ঞা, খণিত্তিযা মূলচ্ছেদনং ৱিয ৱিপস্সনাঞাণেন অৱিজ্জামূলস্স ছিন্দনকালো, খণ্ডাখণ্ডিকং ছিন্দনকালো ৱিয খন্ধৱসেন দিট্ঠকালো, ফালনকালো ৱিয মগ্গঞাণেন কিলেসানং সমুগ্ঘাতিতকালো, মসিকৰণকালো ৱিয ধৰমানকপঞ্চক্খন্ধকালো, মহাৱাতে ওপুণিত্ৱা অপ্পৱত্তনকালো ৱিয উপাদিন্নকক্খন্ধানং অপ্পটিসন্ধিকনিৰোধেন নিৰুজ্ঝিত্ৱা পুনব্ভৱে পটিসন্ধিঅগ্গহণকালো দট্ঠব্বোতি. ইমস্মিং সুত্তে ৱট্টৱিৱট্টং কথিতং.