১০. উপোসথসুত্তৱণ্ণনা

৭১. দসমে তদহুপোসথেতি তস্মিং অহু উপোসথে তং দিৱসং উপোসথে, পন্নৰসিকউপোসথদিৱসেতি ৱুত্তং হোতি. উপসঙ্কমীতি উপোসথঙ্গানি অধিট্ঠায গন্ধমালাদিহত্থা উপসঙ্কমি. হন্দাতি ৱৱস্সগ্গত্থে নিপাতো. দিৱা দিৱস্সাতি দিৱসস্স দিৱা নাম মজ্ঝন্হো, ইমস্মিং ঠিতে মজ্ঝন্হিকে কালেতি অত্থো. কুতো নু ত্ৱং আগচ্ছসীতি কিং কৰোন্তী ৱিচৰসীতি পুচ্ছতি. গোপালকুপোসথোতি গোপালকেহি সদ্ধিং উপৱসনউপোসথো. নিগণ্ঠুপোসথোতি নিগণ্ঠানং উপৱসনউপোসথো. অৰিযুপোসথোতি অৰিযানং উপৱসনউপোসথো. সেয্যথাপি ৱিসাখেতি যথা নাম, ৱিসাখে. সাযন্হসমযে সামিকানং গাৱো নিয্যাতেত্ৱাতি গোপালকা হি দেৱসিকৱেতনেন ৱা পঞ্চাহদসাহঅদ্ধমাসমাসছমাসসংৱচ্ছৰপৰিচ্ছেদেন ৱা গাৱো গহেত্ৱা ৰক্খন্তি. ইধ পন দেৱসিকৱেতনেন ৰক্খন্তং সন্ধাযেতং ৱুত্তং – নিয্যাতেত্ৱাতি পটিচ্ছাপেত্ৱা ‘‘এতা ৱো গাৱো’’তি দত্ৱা. ইতি পটিসঞ্চিক্খতীতি অত্তনো গেহং গন্ত্ৱা ভুঞ্জিত্ৱা মঞ্চে নিপন্নো এৱং পচ্চৱেক্খতি. অভিজ্ঝাসহগতেনাতি তণ্হায সম্পযুত্তেন. এৱং খো, ৱিসাখে, গোপালকুপোসথো হোতীতি অৰিযুপোসথোৱ অযং, অপৰিসুদ্ধৱিতক্কতায পন গোপালকউপোসথট্ঠানে ঠিতো. ন মহপ্ফলোতি ৱিপাকফলেন ন মহপ্ফলো. ন মহানিসংসোতি ৱিপাকানিসংসেন ন মহানিসংসো. ন মহাজুতিকোতি ৱিপাকোভাসেন ন মহাওভাসো. ন মহাৱিপ্ফাৰোতি ৱিপাকৱিপ্ফাৰস্স অমহন্ততায ন মহাৱিপ্ফাৰো.

সমণজাতিকাতি সমণাযেৱ. পৰং যোজনসতন্তি যোজনসতং অতিক্কমিত্ৱা ততো পৰং. তেসু দণ্ডং নিক্খিপাহীতি তেসু যোজনসততো পৰভাগেসু ঠিতেসু সত্তেসু দণ্ডং নিক্খিপ, নিক্খিত্তদণ্ডো হোহি. নাহং ক্ৱচনি কস্সচি কিঞ্চনতস্মিন্তি অহং কত্থচি কস্সচি পৰস্স কিঞ্চনতস্মিং ন হোমি. কিঞ্চনং ৱুচ্চতি পলিবোধো, পলিবোধো ন হোমীতি ৱুত্তং হোতি. ন চ মম ক্ৱচনি কত্থচি কিঞ্চনতত্থীতি মমাপি ক্ৱচনি অন্তো ৱা বহিদ্ধা ৱা কত্থচি একপৰিক্খাৰেপি কিঞ্চনতা নত্থি, পলিবোধো নত্থি, ছিন্নপলিবোধোহমস্মীতি ৱুত্তং হোতি. ভোগেতি মঞ্চপীঠযাগুভত্তাদযো. অদিন্নংযেৱ পৰিভুঞ্জতীতি পুনদিৱসে মঞ্চে নিপজ্জন্তোপি পীঠে নিসীদন্তোপি যাগুং পিৱন্তোপি ভত্তং ভুঞ্জন্তোপি তে ভোগে অদিন্নেযেৱ পৰিভুঞ্জতি. ন মহপ্ফলোতি নিপ্ফলো. ব্যঞ্জনমেৱ হি এত্থ সাৱসেসং, অত্থো পন নিৰৱসেসো. এৱং উপৱুত্থস্স হি উপোসথস্স অপ্পমত্তকম্পি ৱিপাকফলং ইট্ঠং কন্তং মনাপং নাম নত্থি. তস্মা নিপ্ফলোত্ৱেৱ ৱেদিতব্বো. সেসপদেসুপি এসেৱ নযো.

উপক্কিলিট্ঠস্স চিত্তস্সাতি ইদং কস্মা আহ? সংকিলিট্ঠেন হি চিত্তেন উপৱুত্থো উপোসথো ন মহপ্ফলো হোতীতি দস্সিতত্তা ৱিসুদ্ধেন চিত্তেন উপৱুত্থস্স মহপ্ফলতা অনুঞ্ঞাতা হোতি. তস্মা যেন কম্মট্ঠানেন চিত্তং ৱিসুজ্ঝতি, তং চিত্তৱিসোধনকম্মট্ঠানং দস্সেতুং ইদমাহ. তত্থ উপক্কমেনাতি পচ্চত্তপুৰিসকাৰেন, উপাযেন ৱা. তথাগতং অনুস্সৰতীতি অট্ঠহি কাৰণেহি তথাগতগুণে অনুস্সৰতি. এত্থ হি ইতিপি সো ভগৱাতি সো ভগৱা ইতিপি সীলেন, ইতিপি সমাধিনাতি সব্বে লোকিযলোকুত্তৰা বুদ্ধগুণা সঙ্গহিতা. অৰহন্তিআদীহি পাটিযেক্কগুণাৱ নিদ্দিট্ঠা. তথাগতং অনুস্সৰতো চিত্তং পসীদতীতি লোকিযলোকুত্তৰে তথাগতগুণে অনুস্সৰন্তস্স চিত্তুপ্পাদো পসন্নো হোতি.

চিত্তস্স উপক্কিলেসাতি পঞ্চ নীৱৰণা. কক্কন্তি আমলককক্কং. তজ্জং ৱাযামন্তি তজ্জাতিকং তদনুচ্ছৱিকং কক্কেন মক্খনঘংসনধোৱনৱাযামং. পৰিযোদপনা হোতীতি সুদ্ধভাৱকৰণং হোতি. কিলিট্ঠস্মিং হি সীসে পসাধনং পসাধেত্ৱা নক্খত্তং কীড়মানো ন সোভতি, পৰিসুদ্ধে পন তস্মিং পসাধনং পসাধেত্ৱা নক্খত্তং কীড়মানো সোভতি, এৱমেৱ কিলিট্ঠচিত্তেন উপোসথঙ্গানি অধিট্ঠায উপোসথো উপৱুত্থো ন মহপ্ফলো হোতি, পৰিসুদ্ধেন পন চিত্তেন উপোসথঙ্গানি অধিট্ঠায উপৱুত্থো উপোসথো মহপ্ফলো হোতীতি অধিপ্পাযেন এৱমাহ. ব্ৰহ্মুপোসথং উপৱসতীতি ব্ৰহ্মা ৱুচ্চতি সম্মাসম্বুদ্ধো, তস্স গুণানুস্সৰণৱসেন অযং উপোসথো ব্ৰহ্মুপোসথো নাম, তং উপৱসতি. ব্ৰহ্মুনা সদ্ধিং সংৱসতীতি সম্মাসম্বুদ্ধেন সদ্ধিং সংৱসতি. ব্ৰহ্মঞ্চস্স আৰব্ভাতি সম্মাসম্বুদ্ধং আৰব্ভ.

ধম্মং অনুস্সৰতীতি সহতন্তিকং লোকুত্তৰধম্মং অনুস্সৰতি. সোত্তিন্তি কুৰুৱিন্দকসোত্তিং. কুৰুৱিন্দকপাসাণচুণ্ণেন হি সদ্ধিং লাখং যোজেত্ৱা মণিকে কত্ৱা ৱিজ্ঝিত্ৱা সুত্তেন আৱুণিত্ৱা তং মণি কলাপপন্তিং উভতো গহেত্ৱা পিট্ঠিং ঘংসেন্তি, তং সন্ধায ৱুত্তং – ‘‘সোত্তিঞ্চ পটিচ্চা’’তি. চুণ্ণন্তি ন্হানীযচুণ্ণং. তজ্জং ৱাযামন্তি উব্বট্টনঘংসনধোৱনাদিকং তদনুৰূপৱাযামং. ধম্মুপোসথন্তি সহতন্তিকং নৱলোকুত্তৰধম্মং আৰব্ভ উপৱুত্থত্তা অযং উপোসথো ‘‘ধম্মুপোসথো’’তি ৱুত্তো. ইধাপি পৰিযোদপনাতি পদে ঠত্ৱা পুৰিমনযেনেৱ যোজনা কাতব্বা.

সঙ্ঘং অনুস্সৰতীতি অট্ঠন্নং অৰিযপুগ্গলানং গুণে অনুস্সৰতি. উস্মঞ্চ পটিচ্চাতি দ্ৱে তযো ৱাৰে গাহাপিতং উসুমং পটিচ্চ. উসঞ্চাতিপি পাঠো, অযমেৱত্থো. খাৰন্তি ছাৰিকং. গোমযন্তি গোমুত্তং ৱা অজলণ্ডিকা ৱা. পৰিযোদপনাতি ইধাপি পুৰিমনযেনেৱ যোজনা কাতব্বা. সঙ্ঘুপোসথন্তি অট্ঠন্নং অৰিযপুগ্গলানং গুণে আৰব্ভ উপৱুত্থত্তা অযং উপোসথো ‘‘সঙ্ঘুপোসথো’’তি ৱুত্তো.

সীলানীতি গহট্ঠো গহট্ঠসীলানি, পব্বজিতো পব্বজিতসীলানি. অখণ্ডানীতিআদীনং অত্থো ৱিসুদ্ধিমগ্গে (ৱিসুদ্ধি. ১.২১) ৱিত্থাৰিতোৱ. ৱালণ্ডুপকন্তি অস্সৱালেহি ৱা মকচিৱালাদীহি ৱা কতং অণ্ডুপকং. তজ্জং ৱাযামন্তি তেলেন তেমেত্ৱা মলস্স তিন্তভাৱং ঞত্ৱা ছাৰিকং পক্খিপিত্ৱা ৱালণ্ডুপকেন ঘংসনৱাযামো. ইধ পৰিযোদপনাতি পদে ঠত্ৱা এৱং যোজনা কাতব্বা কিলিট্ঠস্মিঞ্হি আদাসে মণ্ডিতপসাধিতোপি অত্তভাৱো ওলোকিযমানো ন সোভতি, পৰিসুদ্ধে সোভতি. এৱমেৱ কিলিট্ঠেন চিত্তেন উপৱুত্থো উপোসথো ন মহপ্ফলো হোতি, পৰিসুদ্ধেন পন মহপ্ফলো হোতীতি. সীলুপোসথন্তি অত্তনো সীলানুস্সৰণৱসেন উপৱুত্থো উপোসথো সীলুপোসথো নাম. সীলেন সদ্ধিন্তি অত্তনো পঞ্চসীলদসসীলেন সদ্ধিং. সীলঞ্চস্স আৰব্ভাতি পঞ্চসীলং দসসীলঞ্চ আৰব্ভ.

দেৱতা অনুস্সৰতীতি দেৱতা সক্খিট্ঠানে ঠপেত্ৱা অত্তনো সদ্ধাদিগুণে অনুস্সৰতি. উক্কন্তি উদ্ধনং. লোণন্তি লোণমত্তিকা. গেৰুকন্তি গেৰুকচুণ্ণং. নাড়িকসণ্ডাসন্তি ধমননাড়িকঞ্চেৱ পৰিৱত্তনসণ্ডাসঞ্চ. তজ্জং ৱাযামন্তি উদ্ধনে পক্খিপনধমনপৰিৱত্তনাদিকং অনুৰূপং ৱাযামং. ইধ পৰিযোদপনাতি পদে ঠত্ৱা এৱং যোজনা ৱেদিতব্বা – সংকিলিট্ঠসুৱণ্ণমযেন হি পসাধনভণ্ডেন পসাধিতা নক্খত্তং কীড়মানা ন সোভন্তি, পৰিসুদ্ধসুৱণ্ণমযেন সোভন্তি. এৱমেৱ সংকিলিট্ঠচিত্তস্স উপোসথো ন মহপ্ফলো হোতি, পৰিসুদ্ধচিত্তস্স মহপ্ফলো. দেৱতুপোসথন্তি দেৱতা সক্খিট্ঠানে ঠপেত্ৱা অত্তনো গুণে অনুস্সৰন্তেন উপৱুত্থউপোসথো দেৱতুপোসথো নাম. সেসং ইমেসু বুদ্ধানুস্সতিআদীসু কম্মট্ঠানেসু যং ৱত্তব্বং সিযা, তং সব্বং ৱিসুদ্ধিমগ্গে (ৱিসুদ্ধি. ১.১২৩ আদযো) ৱুত্তমেৱ.

পাণাতিপাতন্তি পাণৱধং. পহাযাতি তং পাণাতিপাতচেতনাসঙ্খাতং দুস্সীল্যং পজহিত্ৱা. পটিৱিৰতাতি পহীনকালতো পট্ঠায ততো দুস্সীল্যতো ওৰতা ৱিৰতাৱ. নিহিতদণ্ডা নিহিতসত্থাতি পৰূপঘাতত্থায দণ্ডং ৱা সত্থং ৱা আদায অৱত্তনতো নিক্খিত্তদণ্ডা চেৱ নিক্খিত্তসত্থা চাতি অত্থো. এত্থ চ ঠপেত্ৱা দণ্ডং সব্বম্পি অৱসেসং উপকৰণং সত্তানং ৱিহিংসনভাৱতো সত্থন্তি ৱেদিতব্বং. যং পন ভিক্খূ কত্তৰদণ্ডং ৱা দন্তকট্ঠৱাসিং ৱা পিপ্ফলকং ৱা গহেত্ৱা ৱিচৰন্তি, ন তং পৰূপঘাতত্থায. তস্মা নিহিতদণ্ডা নিহিতসত্থাত্ৱেৱ সঙ্খং গচ্ছন্তি. লজ্জীতি পাপজিগুচ্ছনলক্খণায লজ্জায সমন্নাগতা. দযাপন্নাতি দযং মেত্তচিত্ততং আপন্না. সব্বপাণভূতহিতানুকম্পীতি সব্বে পাণভূতে হিতেন অনুকম্পকা, তায এৱ দযাপন্নতায সব্বেসং পাণভূতানং হিতচিত্তকাতি অত্থো. অহম্পজ্জাতি অহম্পি অজ্জ. ইমিনাপি অঙ্গেনাতি ইমিনাপি গুণঙ্গেন. অৰহতং অনুকৰোমীতি যথা পুৰতো গচ্ছন্তং পচ্ছতো গচ্ছন্তো অনুগচ্ছতি নাম, এৱং অহম্পি অৰহন্তেহি পঠমং কতং ইমং গুণং পচ্ছা কৰোন্তো তেসং অৰহন্তানং অনুকৰোমি. উপোসথো চ মে উপৱুত্থো ভৱিস্সতীতি এৱং কৰোন্তেন মযা অৰহতঞ্চ অনুকতং ভৱিস্সতি, উপোসথো চ উপৱুত্থো ভৱিস্সতি.

অদিন্নাদানন্তি অদিন্নস্স পৰপৰিগ্গহিতস্স আদানং, থেয্যং চোৰিকন্তি অত্থো. দিন্নমেৱ আদিযন্তীতি দিন্নাদাযী. চিত্তেনপি দিন্নমেৱ পটিকঙ্খন্তীতি দিন্নপাটিকঙ্খী. থেনেতীতি থেনো, ন থেনেন অথেনেন. অথেনত্তাযেৱ সুচিভূতেন. অত্তনাতি অত্তভাৱেন, অথেনং সুচিভূতং অত্তভাৱং কত্ৱা ৱিহৰন্তীতি ৱুত্তং হোতি.

অব্ৰহ্মচৰিযন্তি অসেট্ঠচৰিযং. ব্ৰহ্মং সেট্ঠং আচাৰং চৰন্তীতি ব্ৰহ্মচাৰী. আৰাচাৰীতি অব্ৰহ্মচৰিযতো দূৰাচাৰী. মেথুনাতি ৰাগপৰিযুট্ঠানৱসেন সদিসত্তা মেথুনকাতি লদ্ধৱোহাৰেহি পটিসেৱিতব্বতো মেথুনোতি সঙ্খং গতা অসদ্ধম্মা. গামধম্মাতি গামৱাসীনং ধম্মা.

মুসাৱাদাতি অলিকৱচনা তুচ্ছৱচনা. সচ্চং ৱদন্তীতি সচ্চৱাদী. সচ্চেন সচ্চং সংদহন্তি ঘট্টেন্তীতি সচ্চসন্ধা, ন অন্তৰন্তৰা মুসা ৱদন্তীতি অত্থো. যো হি পুৰিসো কদাচি মুসাৱাদং ৱদতি, কদাচি সচ্চং. তস্স মুসাৱাদেন অন্তৰিতত্তা সচ্চং সচ্চেন ন ঘটীযতি. তস্মা ন সো সচ্চসন্ধো. ইমে পন ন তাদিসা, জীৱিতহেতুপি মুসা অৱত্ৱা সচ্চেন সচ্চং সংদহন্তিযেৱাতি সচ্চসন্ধা. থেতাতি থিৰা, ঠিতকথাতি অত্থো. একো পুগ্গলো হলিদ্দিৰাগো ৱিয থুসৰাসিম্হি নিখাতখাণু ৱিয অস্সপিট্ঠে ঠপিতকুম্ভণ্ডমিৱ চ ন ঠিতকথো হোতি. একো পাসাণলেখা ৱিয ইন্দখীলো ৱিয চ ঠিতকথো হোতি, অসিনা সীসং ছিন্দন্তেপি দ্ৱে কথা ন কথেতি. অযং ৱুচ্চতি থেতো. পচ্চযিকাতি পত্তিযাযিতব্বকা, সদ্ধাযিকাতি অত্থো. একচ্চো হি পুগ্গলো ন পচ্চযিকো হোতি, ‘‘ইদং কেন ৱুত্তং, অসুকেন নামা’’তি ৱুত্তে ‘‘মা তস্স ৱচনং সদ্দহথা’’তি ৱত্তব্বতং আপজ্জতি. একো পচ্চযিকো হোতি, ‘‘ইদং কেন ৱুত্তং, অসুকেনা’’তি ৱুত্তে ‘‘যদি তেন ৱুত্তং, ইদমেৱ পমাণং, ইদানি পটিক্খিপিতব্বং নত্থি, এৱমেৱং ইদ’’ন্তি ৱত্তব্বতং আপজ্জতি. অযং ৱুচ্চতি পচ্চযিকো. অৱিসংৱাদকা লোকস্সাতি তায সচ্চৱাদিতায লোকং ন ৱিসংৱাদেন্তীতি অত্থো.

সুৰামেৰযমজ্জপমাদট্ঠানন্তি সুৰামেৰযমজ্জানং পানচেতনাসঙ্খাতং পমাদকাৰণং. একভত্তিকাতি পাতৰাসভত্তং সাযমাসভত্তন্তি দ্ৱে ভত্তানি. তেসু পাতৰাসভত্তং অন্তোমজ্ঝন্হিকেন পৰিচ্ছিন্নং, ইতৰং মজ্ঝন্হিকতো উদ্ধং অন্তোঅৰুণেন. তস্মা অন্তোমজ্ঝন্হিকে দসক্খত্তুং ভুঞ্জমানাপি একভত্তিকাৱ হোন্তি. তং সন্ধায ৱুত্তং – ‘‘একভত্তিকা’’তি. ৰত্তিভোজনং ৰত্তি, ততো উপৰতাতি ৰত্তূপৰতা. অতিক্কন্তে মজ্ঝন্হিকে যাৱ সূৰিযত্থঙ্গমনা ভোজনং ৱিকালভোজনং নাম, ততো ৱিৰতত্তা ৱিৰতা ৱিকালভোজনা.

সাসনস্স অননুলোমত্তা ৱিসূকং পটাণিভূতং দস্সনন্তি ৱিসূকদস্সনং, অত্তনা নচ্চননচ্চাপনাদিৱসেন নচ্চঞ্চ গীতঞ্চ ৱাদিতঞ্চ, অন্তমসো মযূৰনচ্চনাদিৱসেনাপি পৱত্তানং নচ্চাদীনং ৱিসূকভূতং দস্সনঞ্চাতি নচ্চগীতৱাদিতৱিসূকদস্সনং. নচ্চাদীনি হি অত্তনা পযোজেতুং ৱা পৰেহি পযোজাপেতুং ৱা পযুত্তানি পস্সিতুং ৱা নেৱ ভিক্খূনং, ন ভিক্খুনীনং ৱট্টন্তি.

মালাদীসু মালাতি যংকিঞ্চি পুপ্ফং. গন্ধন্তি যংকিঞ্চি গন্ধজাতং. ৱিলেপনন্তি ছৱিৰাগকৰণং. তত্থ পিড়ন্ধন্তো ধাৰেতি নাম, ঊনট্ঠানং পূৰেন্তো মণ্ডেতি নাম, গন্ধৱসেন ছৱিৰাগৱসেন চ সাদিযন্তো ৱিভূসেতি নাম. ঠানং ৱুচ্চতি কাৰণং, তস্মা যায দুস্সীল্যচেতনায তানি মালাধাৰণাদীনি মহাজনো কৰোতি, ততো পটিৱিৰতাতি অত্থো. উচ্চাসযনং ৱুচ্চতি পমাণাতিক্কন্তং, মহাসযনং অকপ্পিযত্থৰণং, ততো পটিৱিৰতাতি অত্থো.

কীৱমহপ্ফলোতি কিত্তকং মহপ্ফলো. সেসপদেসুপি এসেৱ নযো. পহূতৰত্তৰতনানন্তি পহূতেন ৰত্তসঙ্খাতেন ৰতনেন সমন্নাগতানং, সকলজম্বুদীপতলং ভেৰিতলসদিসং কত্ৱা কটিপ্পমাণেহি সত্তহি ৰতনেহি পূৰিতানন্তি অত্থো. ইস্সৰিযাধিপচ্চন্তি ইস্সৰভাৱেন ৱা ইস্সৰিযমেৱ ৱা আধিপচ্চং, ন এত্থ সাহসিককম্মন্তিপি ইস্সৰিযাধিপচ্চং. ৰজ্জং কাৰেয্যাতি এৱৰূপং চক্কৱত্তিৰজ্জং কাৰেয্য. অঙ্গানন্তিআদীনি তেসং জনপদানং নামানি. কলং নাগ্ঘতি সোড়সিন্তি একং অহোৰত্তং উপৱুত্থউপোসথে পুঞ্ঞং সোড়সভাগে কত্ৱা ততো একং ভাগঞ্চ ন অগ্ঘতি. একৰত্তুপোসথস্স সোড়সিযা কলায যং ৱিপাকফলং, তংযেৱ ততো বহুতৰং হোতীতি অত্থো. কপণন্তি পৰিত্তকং.

অব্ৰহ্মচৰিযাতি অসেট্ঠচৰিযতো. ৰত্তিং ন ভুঞ্জেয্য ৱিকালভোজনন্তি উপোসথং উপৱসন্তো ৰত্তিভোজনঞ্চ দিৱাৱিকালভোজনঞ্চ ন ভুঞ্জেয্য. মঞ্চে ছমাযংৱ সযেথ সন্থতেতি মুট্ঠিহত্থপাদকে কপ্পিযমঞ্চে ৱা সুধাদিপৰিকম্মকতায ভূমিযং ৱা তিণপণ্ণপলালাদীনি সন্থৰিত্ৱা কতে সন্থতে ৱা সযেথাতি অত্থো. এতং হি অট্ঠঙ্গিকমাহুপোসথন্তি এৱং পাণাতিপাতাদীনি অসমাচৰন্তেন উপৱুত্থং উপোসথং অট্ঠহি অঙ্গেহি সমন্নাগতত্তা অট্ঠঙ্গিকন্তি ৱদন্তি. তং পন উপৱসন্তেন ‘‘স্ৱে উপোসথিকো ভৱিস্সামী’’তি অজ্জেৱ ‘‘ইদঞ্চ ইদঞ্চ কৰেয্যাথা’’তি আহাৰাদিৱিধানং ৱিচাৰেতব্বং. উপোসথদিৱসে পাতোৱ ভিক্খুস্স ৱা ভিক্খুনিযা ৱা দসসীললক্খণঞ্ঞুনো উপাসকস্স ৱা উপাসিকায ৱা সন্তিকে ৱাচং ভিন্দিত্ৱা উপোসথঙ্গানি সমাদাতব্বানি. পাড়িং অজানন্তেন পন ‘‘বুদ্ধপঞ্ঞত্তং উপোসথং অধিট্ঠামী’’তি অধিট্ঠাতব্বং. অঞ্ঞং অলভন্তেন অত্তনাপি অধিট্ঠাতব্বং, ৱচীভেদো পন কাতব্বোযেৱ. উপোসথং উপৱসন্তেন পৰূপৰোধপটিসংযুত্তা কম্মন্তা ন ৱিচাৰেতব্বা, আযৱযগণনং কৰোন্তেন ন ৱীতিনামেতব্বং, গেহে পন আহাৰং লভিত্ৱা নিচ্চভত্তিকভিক্খুনা ৱিয পৰিভুঞ্জিত্ৱা ৱিহাৰং গন্ত্ৱা ধম্মো ৱা সোতব্বো, অট্ঠতিংসায আৰম্মণেসু অঞ্ঞতৰং ৱা মনসিকাতব্বং.

সুদস্সনাতি সুন্দৰদস্সনা. ওভাসযন্তি ওভাসযমানা. অনুপৰিযন্তীতি ৱিচৰন্তি. যাৱতাতি যত্তকং ঠানং. অন্তলিক্খগাতি আকাসঙ্গমা. পভাসন্তীতি জোতন্তি পভা মুঞ্চন্তি. দিসাৱিৰোচনাতি সব্বদিসাসু ৱিৰোচমানা. অথ ৱা পভাসন্তীতি দিসাহি দিসা ওভাসন্তি. ৱিৰোচনাতি ৱিৰোচমানা. ৱেড়ুৰিযন্তি মণীতি ৱত্ৱাপি ইমিনা জাতিমণিভাৱং দস্সেতি. একৱস্সিকৱেড়ুৱণ্ণঞ্হি ৱেড়ুৰিযং জাতিমণি নাম. তং সন্ধাযেৱমাহ. ভদ্দকন্তি লদ্ধকং. সিঙ্গীসুৱণ্ণন্তি গোসিঙ্গসদিসং হুত্ৱা উপ্পন্নত্তা এৱং নামকং সুৱণ্ণং. কঞ্চনন্তি পব্বতেয্যং পব্বতে জাতসুৱণ্ণং. জাতৰূপন্তি সত্থুৱণ্ণসুৱণ্ণং. হটকন্তি কিপিল্লিকাহি নীহটসুৱণ্ণং. নানুভৱন্তীতি ন পাপুণন্তি. চন্দপ্পভাতি সামিঅত্থে পচ্চত্তং, চন্দপ্পভাযাতি অত্থো. উপৱস্সুপোসথন্তি উপৱসিত্ৱা উপোসথং. সুখুদ্ৰযানীতি সুখফলানি সুখৱেদনীযানি. সগ্গমুপেন্তি ঠানন্তি সগ্গসঙ্খাতং ঠানং উপগচ্ছন্তি, কেনচি অনিন্দিতা হুত্ৱা দেৱলোকে উপ্পজ্জন্তীতি অত্থো. সেসমেত্থ যং অন্তৰন্তৰা ন ৱুত্তং, তং ৱুত্তানুসাৰেনেৱ ৱেদিতব্বন্তি.

মহাৱগ্গো দুতিযো.