৮. অঞ্ঞতিত্থিযসুত্তৱণ্ণনা

৬৯. অট্ঠমে ভগৱংমূলকাতি ভগৱা মূলং এতেসন্তি ভগৱংমূলকা. ইদং ৱুত্তং হোতি – ইমে, ভন্তে, অম্হাকং ধম্মা পুব্বে কস্সপসম্মাসম্বুদ্ধেন উপ্পাদিতা, তস্মিং পৰিনিব্বুতে একং বুদ্ধন্তৰং অঞ্ঞো সমণো ৱা ব্ৰাহ্মণো ৱা ইমে ধম্মে উপ্পাদেতুং সমত্থো নাম নাহোসি, ভগৱতো পন নো ইমে ধম্মা উপ্পাদিতা. ভগৱন্তঞ্হি নিস্সায মযং ইমে ধম্মে আজানাম পটিৱিজ্ঝামাতি এৱং ভগৱংমূলকা নো, ভন্তে, ধম্মাতি. ভগৱংনেত্তিকাতি ভগৱা ধম্মানং নেতা ৱিনেতা অনুনেতা যথাসভাৱতো পাটিযেক্কং পাটিযেক্কং নামং গহেত্ৱাৱ দস্সেতাতি ধম্মা ভগৱংনেত্তিকা নাম হোন্তি. ভগৱংপটিসৰণাতি চতুভূমকধম্মা সব্বঞ্ঞুতঞ্ঞাণস্স আপাথং আগচ্ছমানা ভগৱতি পটিসৰন্তি নামাতি ভগৱংপটিসৰণা. পটিসৰন্তীতি ওসৰন্তি সমোসৰন্তি. অপিচ মহাবোধিমণ্ডে নিসিন্নস্স ভগৱতো পটিৱেধৱসেন ফস্সো আগচ্ছতি – ‘‘অহং ভগৱা কিন্নামো’’তি. ত্ৱং ফুসনট্ঠেন ফস্সো নাম. ৱেদনা, সঞ্ঞা, সঙ্খাৰা, ৱিঞ্ঞাণং আগচ্ছতি – ‘‘অহং ভগৱা কিন্নাম’’ন্তি. ত্ৱং ৱিজাননট্ঠেন ৱিঞ্ঞাণং নামাতি. এৱং চতুভূমকধম্মানং যথাসভাৱতো পাটিযেক্কং পাটিযেক্কং নামং গণ্হন্তো ভগৱা ধম্মে পটিসৰতীতি ভগৱংপটিসৰণা. ভগৱন্তংযেৱ পটিভাতূতি ভগৱতোৱ এতস্স ভাসিতস্স অত্থো উপট্ঠাতু, তুম্হেযেৱ নো কথেত্ৱা দেথাতি অত্থো.

ৰাগো খোতি ৰজ্জনৱসেন পৱত্তৰাগো. অপ্পসাৱজ্জোতি লোকৱজ্জৱসেনপি ৱিপাকৱজ্জৱসেনপীতি দ্ৱীহিপি ৱজ্জেহি অপ্পসাৱজ্জো, অপ্পদোসোতি অত্থো. কথং? মাতাপিতৰো হি ভাতিভগিনিআদযো চ পুত্তভাতিকানং আৱাহৱিৱাহমঙ্গলং নাম কাৰেন্তি. এৱং তাৱেসো লোকৱজ্জৱসেন অপ্পসাৱজ্জো. সদাৰসন্তোসমূলিকা পন অপাযে পটিসন্ধি নাম ন হোতীতি এৱং ৱিপাকৱজ্জৱসেন অপ্পসাৱজ্জো. দন্ধৱিৰাগীতি ৱিৰজ্জমানো পনেস সণিকং ৱিৰজ্জতি, ন সীঘং মুচ্চতি. তেলমসিৰাগো ৱিয চিৰং অনুবন্ধতি, দ্ৱে তীণি ভৱন্তৰানি গন্ত্ৱাপি নাপগচ্ছতীতি দন্ধৱিৰাগী.

তত্ৰিদং ৱত্থু – একো কিৰ পুৰিসো ভাতু জাযায মিচ্ছাচাৰং চৰতি. তস্সাপি ইত্থিযা অত্তনো সামিকতো সোযেৱ পিযতৰো অহোসি. সা তমাহ – ‘‘ইমস্মিং কাৰণে পাকটে জাতে মহতী গৰহা ভৱিস্সতি, তৱ ভাতিকং ঘাতেহী’’তি. সো ‘‘নস্স, ৱসলি, মা এৱং পুন অৱচা’’তি অপসাদেসি. সা তুণ্হী হুত্ৱা কতিপাহচ্চযেন পুন কথেসি, তস্স চিত্তং দ্ৱজ্ঝভাৱং অগমাসি. ততো ততিযৱাৰং কথিতো ‘‘কিন্তি কত্ৱা ওকাসং লভিস্সামী’’তি আহ. অথস্স সা উপাযং কথেন্তী ‘‘ত্ৱং মযা ৱুত্তমেৱ কৰোহি, অসুকট্ঠানে মহাককুধসমীপে তিত্থং অত্থি, তত্থ তিখিণং দণ্ডকৱাসিং গহেত্ৱা তিট্ঠাহী’’তি. সো তথা অকাসি. জেট্ঠভাতাপিস্স অৰঞ্ঞে কম্মং কত্ৱা ঘৰং আগতো. সা তস্মিং মুদুচিত্তা ৱিয হুত্ৱা ‘‘এহি সামি, সীসে তে ওলিখিস্সামী’’তি ওলিখন্তী ‘‘উপক্কিলিট্ঠং তে সীস’’ন্তি আমলকপিণ্ডং দত্ৱা ‘‘গচ্ছ অসুকট্ঠানে সীসং ধোৱিত্ৱা আগচ্ছাহী’’তি পেসেসি. সো তায ৱুত্ততিত্থমেৱ গন্ত্ৱা আমলককক্কেন সীসং মক্খেত্ৱা উদকং ওৰুয্হ ওনমিত্ৱা সীসং ধোৱি. অথ নং ইতৰো ৰুক্খন্তৰতো নিক্খমিত্ৱা খন্ধট্ঠিকে পহৰিত্ৱা জীৱিতা ৱোৰোপেত্ৱা গেহং অগমাসি.

ইতৰো ভৰিযায সিনেহং পৰিচ্চজিতুমসক্কোন্তো তস্মিংযেৱ গেহে মহাধম্মনি হুত্ৱা নিব্বত্তি. সো তস্সা ঠিতাযপি নিসিন্নাযপি গন্ত্ৱা সৰীৰে পততি. অথ নং সা ‘‘সোযেৱ অযং ভৱিস্সতী’’তি ঘাতাপেসি. সো পুন তস্সা সিনেহেন তস্মিংযেৱ গেহে কুক্কুৰো হুত্ৱা নিব্বত্তি. সো পদসা গমনকালতো পট্ঠায তস্সা পচ্ছতো পচ্ছতো চৰতি. অৰঞ্ঞং গচ্ছন্তিযাপি সদ্ধিংযেৱ গচ্ছতি. তং দিস্ৱা মনুস্সা ‘‘নিক্খন্তো সুনখলুদ্দকো, কতৰট্ঠানং গমিস্সতী’’তি উপ্পণ্ডেন্তি. সা পুন তং ঘাতাপেসি.

সোপি পুন তস্মিংযেৱ গেহে ৱচ্ছকো হুত্ৱা নিব্বত্তি. তথেৱ তস্সা পচ্ছতো পচ্ছতো চৰতি. তদাপি নং মনুস্সা দিস্ৱা ‘‘নিক্খন্তো গোপালকো, কত্থ গাৱিযো চৰিস্সন্তী’’তি উপ্পণ্ডেন্তি. সা তস্মিম্পি ঠানে তং ঘাতাপেসি. সো তদাপি তস্সা উপৰি সিনেহং ছিন্দিতুং অসক্কোন্তো চতুত্থে ৱাৰে তস্সাযেৱ কুচ্ছিযং জাতিস্সৰো হুত্ৱা নিব্বত্তি. সো পটিপাটিযা চতূসু অত্তভাৱেসু তায ঘাতিতভাৱং দিস্ৱা ‘‘এৱৰূপায নাম পচ্চত্থিকায কুচ্ছিস্মিং নিব্বত্তোস্মী’’তি ততো পট্ঠায তস্সা হত্থেন অত্তানং ফুসিতুং ন দেতি. সচে নং সা ফুসতি, কন্দতি ৰোদতি. অথ নং অয্যকোৱ পটিজগ্গতি. তং অপৰভাগে ৱুদ্ধিপ্পত্তং অয্যকো আহ – ‘‘তাত, কস্মা ত্ৱং মাতু হত্থেন অত্তানং ফুসিতুং ন দেসি. সচেপি তং ফুসতি, মহাসদ্দেন ৰোদসি কন্দসী’’তি. অয্যকেন পুট্ঠো ‘‘ন এসা ময্হং মাতা, পচ্চামিত্তা এসা’’তি তং পৱত্তিং সব্বং আৰোচেসি. সো তং আলিঙ্গিত্ৱা ৰোদিত্ৱা ‘‘এহি, তাত, কিং অম্হাকং ঈদিসে ঠানে নিৱাসকিচ্চ’’ন্তি তং আদায নিক্খমিত্ৱা একং ৱিহাৰং গন্ত্ৱা পব্বজিত্ৱা উভোপি তত্থ ৱসন্তা অৰহত্তং পাপুণিংসু.

মহাসাৱজ্জোতি লোকৱজ্জৱসেনপি ৱিপাকৱজ্জৱসেনপীতি দ্ৱীহিপি কাৰণেহি মহাসাৱজ্জো. কথং? দোসেন হি দুট্ঠো হুত্ৱা মাতৰিপি অপৰজ্ঝতি, পিতৰিপি ভাতিভগিনিআদীসুপি পব্বজিতেসুপি. সো গতগতট্ঠানেসু ‘‘অযং পুগ্গলো মাতাপিতূসুপি অপৰজ্ঝতি, ভাতিভগিনিআদীসুপি, পব্বজিতেসুপী’’তি মহতিং গৰহং লভতি. এৱং তাৱ লোকৱজ্জৱসেন মহাসাৱজ্জো. দোসৱসেন পন কতেন আনন্তৰিযকম্মেন কপ্পং নিৰযে পচ্চতি. এৱং ৱিপাকৱজ্জৱসেন মহাসাৱজ্জো. খিপ্পৱিৰাগীতি খিপ্পং ৱিৰজ্জতি. দোসেন হি দুট্ঠো মাতাপিতূসুপি চেতিযেপি বোধিম্হিপি পব্বজিতেসুপি অপৰজ্ঝিত্ৱা ‘‘ময্হং খমথা’’তি. অচ্চযং দেসেতি. তস্স সহ খমাপনেন তং কম্মং পাকতিকমেৱ হোতি.

মোহোপি দ্ৱীহেৱ কাৰণেহি মহাসাৱজ্জো. মোহেন হি মূড়্হো হুত্ৱা মাতাপিতূসুপি চেতিযেপি বোধিম্হিপি পব্বজিতেসুপি অপৰজ্ঝিত্ৱা গতগতট্ঠানে গৰহং লভতি. এৱং তাৱ লোকৱজ্জৱসেন মহাসাৱজ্জো. মোহৱসেন পন কতেন আনন্তৰিযকম্মেন কপ্পং নিৰযে পচ্চতি. এৱং ৱিপাকৱজ্জৱসেনপি মহাসাৱজ্জো. দন্ধৱিৰাগীতি সণিকং ৱিৰজ্জতি. মোহেন মূড়্হেন হি কতকম্মং সণিকং মুচ্চতি. যথা হি অচ্ছচম্মং সতক্খত্তুম্পি ধোৱিযমানং ন পণ্ডৰং হোতি, এৱমেৱ মোহেন মূড়্হেন কতকম্মং সীঘং ন মুচ্চতি, সণিকমেৱ মুচ্চতীতি. সেসমেত্থ উত্তানমেৱাতি.