(৩৫. ক) অযোনিসো মনসিকাৰো

৯৩৬. তত্থ কতমো অযোনিসো মনসিকাৰো? অনিচ্চে ‘‘নিচ্চ’’ন্তি অযোনিসো মনসিকাৰো, দুক্খে ‘‘সুখ’’ন্তি অযোনিসো মনসিকাৰো, অনত্তনি ‘‘অত্তা’’তি অযোনিসো মনসিকাৰো, অসুভে ‘‘সুভ’’ন্তি অযোনিসো মনসিকাৰো, সচ্চৱিপ্পটিকুলেন ৱা চিত্তস্স আৱট্টনা অনাৱট্টনা আভোগো সমন্নাহাৰো মনসিকাৰো – অযং ৱুচ্চতি ‘‘অযোনিসো মনসিকাৰো’’.

(খ) কুম্মগ্গসেৱনা

তত্থ কতমা কুম্মগ্গসেৱনা? তত্থ কতমো কুম্মগ্গো? মিচ্ছাদিট্ঠি, মিচ্ছাসঙ্কপ্পো, মিচ্ছাৱাচা, মিচ্ছাকম্মন্তো, মিচ্ছাআজীৱো, মিচ্ছাৱাযামো, মিচ্ছাসতি, মিচ্ছাসমাধি – অযং ৱুচ্চতি ‘‘কুম্মগ্গো’’. যা ইমস্স কুম্মগ্গস্স সেৱনা নিসেৱনা সংসেৱনা ভজনা সম্ভজনা ভত্তি সম্ভত্তি তংসম্পৱঙ্কতা – অযং ৱুচ্চতি ‘‘কুম্মগ্গসেৱনা’’.

(গ) চেতসো চ লীনত্তং

তত্থ কতমং চেতসো চ লীনত্তং? যা চিত্তস্স অকল্যতা অকম্মঞ্ঞতা ওলীযনা সল্লীযনা লীনং লীযনা লীযিতত্তং থিনং থিযনা থিযিতত্তং চিত্তস্স – ইদং ৱুচ্চতি ‘‘চেতসো চ লীনত্তং’’.

তিকং.