২০. ৱীসতিমৱগ্গো

(১৯৭) ৪. তিৰচ্ছানকথা

৮৬৯. অত্থি দেৱেসু তিৰচ্ছানগতাতি? আমন্তা. অত্থি তিৰচ্ছানগতেসু দেৱাতি? ন হেৱং ৱত্তব্বে…পে… অত্থি দেৱেসু তিৰচ্ছানগতাতি? আমন্তা. দেৱলোকো তিৰচ্ছানযোনীতি? ন হেৱং ৱত্তব্বে…পে… অত্থি দেৱেসু তিৰচ্ছানগতাতি? আমন্তা. অত্থি তত্থ কীটা পটঙ্গা মকসা মক্খিকা অহী ৱিচ্ছিকা সতপদী গণ্ডুপ্পাদাতি [গণ্ডুপাদাতি (স্যা. কং. পী.)]? ন হেৱং ৱত্তব্বে…পে….

৮৭০. নত্থি দেৱেসু তিৰচ্ছানগতাতি? আমন্তা. ননু অত্থি তত্থ এৰাৱণো নাম হত্থিনাগো সহস্সযুত্তং দিব্বং যানন্তি? আমন্তা. হঞ্চি অত্থি তত্থ এৰাৱণো নাম হত্থিনাগো সহস্সযুত্তং দিব্বং যানং, তেন ৱত ৰে ৱত্তব্বে – ‘‘অত্থি দেৱেসু তিৰচ্ছানগতা’’তি.

৮৭১. অত্থি দেৱেসু তিৰচ্ছানগতাতি? আমন্তা. অত্থি তত্থ হত্থিবন্ধা অস্সবন্ধা [হত্থিভণ্ডা অস্সভণ্ডা (?)] যাৱসিকা কাৰণিকা ভত্তকাৰকাতি? ন হেৱং ৱত্তব্বে. তেন হি নত্থি দেৱেসু তিৰচ্ছানগতাতি.

তিৰচ্ছানকথা নিট্ঠিতা.