(১৯৬) ৩. নিৰযপালকথা

৮৬৬. নত্থি নিৰযেসু নিৰযপালাতি? আমন্তা. নত্থি নিৰযেসু কম্মকাৰণাতি? ন হেৱং ৱত্তব্বে…পে… অত্থি নিৰযেসু কম্মকাৰণাতি? আমন্তা. অত্থি নিৰযেসু নিৰযপালাতি? ন হেৱং ৱত্তব্বে…পে….

অত্থি মনুস্সেসু কম্মকাৰণা, অত্থি চ কাৰণিকাতি? আমন্তা. অত্থি নিৰযেসু কম্মকাৰণা, অত্থি চ কাৰণিকাতি? ন হেৱং ৱত্তব্বে…পে… অত্থি নিৰযেসু কম্মকাৰণা, নত্থি চ কাৰণিকাতি? আমন্তা. অত্থি মনুস্সেসু কম্মকাৰণা, নত্থি চ কাৰণিকাতি? ন হেৱং ৱত্তব্বে…পে….

৮৬৭. অত্থি নিৰযেসু নিৰযপালাতি? আমন্তা. ননু ৱুত্তং ভগৱতা –

‘‘ন ৱেস্সভূ নোপি চ পেত্তিৰাজা,

সোমো যমো ৱেস্সৱণো চ ৰাজা;

সকানি কম্মানি হনন্তি তত্থ, ইতো পণুন্নং [পণুণ্ণং (স্যা. ক.), পনুন্নং (সী.)] পৰলোকপত্ত’’ন্তি.

অত্থেৱ সুত্তন্তোতি? আমন্তা. তেন হি নত্থি নিৰযেসু নিৰযপালাতি.

৮৬৮. নত্থি নিৰযেসু নিৰযপালাতি? আমন্তা. ননু ৱুত্তং ভগৱতা – ‘‘তমেনং, ভিক্খৱে, নিৰযপালা পঞ্চৱিধবন্ধনং নাম কাৰণং কাৰেন্তি [কৰোন্তি (ম. নি. ৩.২৫০; অ. নি. ৩.৩৬)] – তত্তং অযোখীলং হত্থে গমেন্তি, তত্তং অযোখীলং দুতিযে হত্থে গমেন্তি, তত্তং অযোখীলং পাদে গমেন্তি, তত্তং অযোখীলং দুতিযে পাদে গমেন্তি, তত্তং অযোখীলং মজ্ঝেউৰস্মিং গমেন্তি; সো তত্থ দুক্খা তিব্বা কটুকা ৱেদনা ৱেদেতি; ন চ তাৱ কালং কৰোতি যাৱ ন তং পাপকম্মং ব্যন্তীহোতী’’তি [ম. নি. ৩.২৫০; অ. নি. ৩.৩৬]! অত্থেৱ সুত্তন্তোতি? আমন্তা. তেন হি অত্থি নিৰযেসু নিৰযপালাতি.

নত্থি নিৰযেসু নিৰযপালাতি? আমন্তা. ননু ৱুত্তং ভগৱতা – ‘‘তমেনং, ভিক্খৱে, নিৰযপালা সংৱেসেত্ৱা কুঠাৰীহি [কুধাৰীহি (সব্বত্থ)] তচ্ছন্তি…পে… তমেনং, ভিক্খৱে, নিৰযপালা উদ্ধম্পাদং অধোসিৰং ঠপেত্ৱা ৱাসীহি তচ্ছন্তি…পে… তমেনং, ভিক্খৱে, নিৰযপালা ৰথে যোজেত্ৱা আদিত্তায পথৱিযা সম্পজ্জলিতায সজোতিভূতায [সঞ্জোতিভূতায (স্যা.)] সাৰেন্তিপি পচ্চাসাৰেন্তিপি…পে… তমেনং, ভিক্খৱে, নিৰযপালা মহন্তং অঙ্গাৰপব্বতং আদিত্তং সম্পজ্জলিতং সজোতিভূতং আৰোপেন্তিপি ওৰোপেন্তিপি…পে… তমেনং, ভিক্খৱে, নিৰযপালা উদ্ধম্পাদং অধোসিৰং গহেত্ৱা তত্তায লোহকুম্ভিযা পক্খিপন্তি আদিত্তায সম্পজ্জলিতায সজোতিভূতায. সো তত্থ ফেণুদ্দেহকং পচ্চতি, সো তত্থ ফেণুদ্দেহকং পচ্চমানো সকিম্পি উদ্ধং গচ্ছতি, সকিম্পি অধো গচ্ছতি, সকিম্পি তিৰিযং গচ্ছতি. সো তত্থ দুক্খা তিব্বা কটুকা ৱেদনা ৱেদযতি, ন চ তাৱ কালং কৰোতি যাৱ ন তং পাপকম্মং ব্যন্তীহোতি. তমেনং, ভিক্খৱে, নিৰযপালা মহানিৰযে পক্খিপন্তি! সো খো পন, ভিক্খৱে, মহানিৰযো –

‘‘চতুক্কণ্ণো চতুদ্ৱাৰো, ৱিভত্তো ভাগসো মিতো;

অযোপাকাৰপৰিযন্তো, অযসা পটিকুজ্জিতো.

‘‘তস্স অযোমযা ভূমি, জলিতা তেজসা যুতা;

সমন্তা যোজনসতং, ফৰিত্ৱা তিট্ঠতি সব্বদা’’তি [ম. নি. ৩.২৫০; অ. নি. ৩.৩৬; পে. ৱ. ৭১].

অত্থেৱ সুত্তন্তোতি? আমন্তা. তেন হি অত্থি নিৰযেসু নিৰযপালাতি.

নিৰযপালকথা নিট্ঠিতা.