১৮. অট্ঠাৰসমৱগ্গো

(১৮৫) ৯. চক্খুনা ৰূপং পস্সতীতিকথা

৮২৬. চক্খুনা ৰূপং পস্সতীতি? আমন্তা. ৰূপেন ৰূপং পস্সতীতি? ন হেৱং ৱত্তব্বে…পে… ৰূপেন ৰূপং পস্সতীতি? আমন্তা. ৰূপেন ৰূপং পটিৱিজানাতীতি? ন হেৱং ৱত্তব্বে…পে… ৰূপেন ৰূপং পটিৱিজানাতীতি? আমন্তা. ৰূপং মনোৱিঞ্ঞাণন্তি? ন হেৱং ৱত্তব্বে…পে… চক্খুনা ৰূপং পস্সতীতি? আমন্তা. অত্থি চক্খুস্স আৱট্টনা…পে… পণিধীতি? ন হেৱং ৱত্তব্বে…পে… ননু নত্থি চক্খুস্স আৱট্টনা…পে… পণিধীতি? আমন্তা. হঞ্চি নত্থি চক্খুস্স আৱট্টনা…পে… পণিধি, নো চ ৱত ৰে ৱত্তব্বে – ‘‘চক্খুনা ৰূপং পস্সতী’’তি.

সোতেন সদ্দং সুণাতীতি…পে… ঘানেন গন্ধং ঘাযতীতি…পে… জিৱ্হায ৰসং সাযতীতি…পে… কাযেন ফোট্ঠব্বং ফুসতীতি? আমন্তা. ৰূপেন ৰূপং ফুসতীতি? ন হেৱং ৱত্তব্বে…পে….

ৰূপেন ৰূপং ফুসতীতি? আমন্তা. ৰূপেন ৰূপং পটিৱিজানাতীতি? ন হেৱং ৱত্তব্বে…পে… ৰূপেন ৰূপং পটিৱিজানাতীতি? আমন্তা. ৰূপং মনোৱিঞ্ঞাণন্তি? ন হেৱং ৱত্তব্বে …পে… কাযেন ফোট্ঠব্বং ফুসতীতি? আমন্তা. অত্থি কাযস্স আৱট্টনা…পে… পণিধীতি? ন হেৱং ৱত্তব্বে…পে… ননু নত্থি কাযস্স আৱট্টনা…পে… পণিধীতি? আমন্তা. হঞ্চি নত্থি কাযস্স আৱট্টনা…পে… পণিধি, নো চ ৱত ৰে ৱত্তব্বে – ‘‘কাযেন ফোট্ঠব্বং ফুসতী’’তি…পে….

৮২৭. ন ৱত্তব্বং – ‘‘চক্খুনা ৰূপং পস্সতী’’তি…পে… ‘‘কাযেন ফোট্ঠব্বং ফুসতী’’তি? আমন্তা. ননু ৱুত্তং ভগৱতা – ‘‘ইধ, ভিক্খৱে, ভিক্খু চক্খুনা ৰূপং পস্সতি…পে… কাযেন ফোট্ঠব্বং ফুসতী’’তি [ম. নি. ১.৩৪৯; অ. নি. ৪.৩৭ (অট্ঠকথা পস্সিতব্বা)]! অত্থেৱ সুত্তন্তোতি? আমন্তা. তেন হি চক্খুনা ৰূপং পস্সতি…পে… কাযেন ফোট্ঠব্বং ফুসতীতি.

চক্খুনা ৰূপং পস্সতীতিকথা নিট্ঠিতা.

অট্ঠাৰসমৱগ্গো.

তস্সুদ্দানং –

বুদ্ধো ভগৱা মনুস্সলোকে অট্ঠাসি, বুদ্ধেন ভগৱতা ধম্মো দেসিতো, নত্থি বুদ্ধস্স ভগৱতো কৰুণা, বুদ্ধস্স ভগৱতো উচ্চাৰপস্সাৱো অতিৱিয অঞ্ঞে গন্ধজাতে অধিগ্গণ্হাতি, একেন অৰিযমগ্গেন চত্তাৰি সামঞ্ঞফলানি সচ্ছিকৰোতি, ঝানা ঝানং সঙ্কমতি, অত্থি ঝানন্তৰিকা, সমাপন্নো সদ্দং সুণাতি, চক্খুনা ৰূপং পস্সতি কাযেন ফোট্ঠব্বং ফুসতি.